ភ្នំពេញក្រោន សមាគមកីឡាបាល់ទាត់ខេត្តត្បូងឃ្មុំ បឹងកេត ឡាយអ៊ិនឃីង ខេត្តសៀមរាប វិសាខា និងភ្នំពេញហ្គាឡាក់ស៊ី នឹងត្រូវជួបគ្នាក្នុងវគ្គ ១៦ក្រុមជើងទី២ ពានរង្វាន់សម្តេចតេជោ ហ៊ុន សែន ជើងឯកថ្នាក់ជាតិ លើកទី១៩ ឆ្នាំ២០២៥-២៦ វគ្គ១៦ចុងក្រោយ នារសៀលថ្ងៃទី៤ កុម្ភ: ២០២៦។
កម្មវិធីប្រកួតជើងទី២ និងលទ្ធផលការប្រកួតវគ្គ១៦ក្រុមចុងក្រោយ ថ្ងៃទី២១ មករា ២០២៦៖
- ភ្នំពេញក្រោន ប្រកួតជាមួយ សមាគមកីឡាបាល់ទាត់ខេត្តត្បូងឃ្មុំ កីឡដ្ឋានភ្នំពេញក្រោន (លទ្ធផលជើងទិ១ ៣-០)
- បឹងកេត ប្រកួតជាមួយ ឡាយអ៊ិនឃីង ខេត្តសៀមរាប ពហុកីឡដ្ឋានជាតិ (លទ្ធផលជើងទី១ ៩-០)
- វិសាខា ប្រកួតជាមួយ ភ្នំពេញហ្គាឡាក់ស៊ី កីឡដ្ឋានវិសាខា (លទ្ធផលជើងទី១ ១៣-០)
ដោយឡែកសម្រាប់ ព្រះខ័នរាជស្វាយរៀង ប្រកួតជាមួយ បាត់ដំបងយូណៃធីត នឹងត្រូវលើកពេលដោយសារតែ ស្វាយរៀង ត្រូវមានភារកិច្ចប្រកួតពានរង្វាន់ Shopee Cup ២០២៥-២៦ នៅទឹកដីប្រទេសសិង្ហបុរី នាថ្ងៃទី៥ ខែកុម្ភ: ឆ្នាំ២០២៦ សម្រាប់លទ្ឌផលជើងទី១ រវាងក្រុមទាំង២ ព្រះខ័នរាជស្វាយរៀង ៥-២ លើកក្រុមបាត់ដំបងយូណៃធីត។
លទ្ធផលការប្រកួតវគ្គ១៦ក្រុមចុងក្រោយ ថ្ងៃទី២៨ មករា ២០២៦៖
- គិរីវង់សុខសែនជ័យ ២-០ អង្គរថាយហ្គឺរ នៅកីឡដ្ឋានគិរីវង់សុខសែនជ័យ ខេត្តតាកែវ
- ខេត្តកំពង់ចាម ០-៤ កយោធពលខេមរភូមិន្ទ ទីលានវិទ្យាល័យព្រះសីហនុ
- អឹមអូអាយកំពង់ដេវ៉ា ២-៣ អាយអេសអាយដង្កោសែនជ័យ នៅកីឡដ្ឋានវិសាខា
- ឡាយហ្វខេត្តព្រះសីហនុ ១-០ ណាហ្គាវើលដ៍ នៅកីឡដ្ឋាឡាយហ្វខេត្តព្រះសីហនុ
សម្រាប់ការប្រកួតជើងឯកថ្នាក់ជាតិនេះ បានចាប់ផ្តើមជាផ្លូវការនៅថ្ងៃទី២១ ខែមករា គ្រោងនឹងបញ្ចប់ទៅវិញនៅថ្ងៃទី២៤ ខែឧសភា ឆ្នាំ២០២៦ ដោយតម្រូវឱ្យក្រុមទាំង១៦ ប្រកួតប៉ះដៃគូចំនួន២ជើង ក្នុងនិងក្រៅដី។ ចំនួនក្រុមដែលមានគ្រាប់បាល់ច្រើនជាងគេសរុបទាំងពីរជើង នឹងឡើងទៅវគ្គបន្ត ពីវគ្គ១៦ក្រុម ដល់វគ្គពាក់កណ្តាលផ្តាច់ព្រ័ត្រ ខណៈវគ្គផ្តាច់ព្រ័ត្រ គឺធ្វើតែមួយជើងទេ នៅទឹកដីកណ្តាល។
សូមរំឭកថា ក្រុមមន្ទីរ អយក ខេត្តកំពង់ចាម ម្ចាស់ជើងឯក ពានរង្វាន់សម្តេចតេជោ ហ៊ុន សែន (Hun Sen Cup) ជើងឯកថ្នាក់ខេត្ត លើកទី១៩ ឆ្នាំ២០២៥-២៦ ក្រោយយកឈ្នះក្លិបបាល់ទាត់ឡាយអ៊ិនឃីង ខេត្តសៀមរាប ២-១ នៅវគ្គផ្ដាច់ព្រ័ត្រ ក្នុងពហុកីឡដ្ឋានជាតិ រាជធានីភ្នំពេញ កាលពីថ្ងៃទី២១ ធ្នូ ២០២៥។
សម្រាប់ពានរង្វាន់សម្តេចតេជោ ហ៊ុន សែន (18th Hun Sen Cup) ថ្នាក់ជាតិ ត្រូវរៀបចំឡើងតាំងពីឆ្នាំ២០១៧ ដែលធ្វើឡើងជារៀងរាល់ឆ្នាំ ដោយព្រះខ័នរាជស្វាយរៀង ឈ្នះជើងឯកបានច្រើនជាងគេ ៥លើក ក្រសួងការពារជាតិ បាន ៣លើក វិសាខា បាន ៣លើក ភ្នំពេញក្រោន បាន ២លើក ខណ:ណាហ្គាវើលដ៍ ក្រសួងមហាផ្ទៃ បឹងកេត និងខេមរកីឡា ឈ្នះបាន ១លើកដូចគ្នា៕
