ព្រះខ័នរាជស្វាយរៀង របស់កម្ពុជា នឹងត្រូវជួបជាមួយ Lion City Sailors FC នៃពានរង្វាន់ក្លិបក្នុងតំបន់អាស៊ាន ASEAN Club Championship (Shopee Cup) 2024/25 វគ្គចែកពូល B នាថ្ងៃទី៥ កុម្ភ: ក្នុងកីឡដ្ឋាន Jalan Besar ម៉ោង ៧:៣០នាទីយប់ ក្នុងកីឡដ្ឋាន Jalan Besar។
ការប្រកួតរាត្រីនេះ ក៏ជាជំនួបដែលអ្នកគាំទ្រទន្ទឹងរង់ចាំថានឹងជក់ចិត្ត ដោយក្រុមរងជើងឯក AFC Champions League Two Lion City Sailors FC ទទួលក្រុម រងជើងឯក AFC Challenge League ព្រះខ័នរាជស្វាយរៀង រដូវកាលមុន។
មុនការប្រកួតមកដល់លោក Matthew McConkey គ្រូបង្គោលព្រះខ័នរាជស្វាយរៀង បានលើកឡើងថា៖ ការប្រកួតរបស់ពួកយើងសុទ្ធតែមានការប្រកួតប្រជែងខ្ពស់ ក្រុមពួកយើងមានការរៀបចំល្អប្រសើរជាងមុន តែយ៉ាងណាយើងសង្ឃឹមថានឹងធ្វើបានល្អផងដែរ។
ដោយឡែកសម្រាប់ប្រធានក្រុម សឿយ វិសាល ថា៖ «យើងធ្វើបានល្អរហូតមកដល់ពេលនេះនៅក្នុងពានរង្វាន់ Shopee Cup ហើយយើងស្ទើរតែយកឈ្នះ Johor។ សម្រាប់ការប្រកួតជាមួយ Lion City Sailors FC ការផ្តោតអារម្មណ៍របស់យើងគឺ រក្សាការប្រមូលអារម្មណ៍ឱ្យកាន់តែប្រសើរឡើង ដើម្បីឱ្យយើងអាចទទួលបានជ័យជម្នះ និងរក្សាក្តីសង្ឃឹមរបស់យើងក្នុងការឡើងទៅវគ្គបន្ទាប់»។
សម្រាប់លទ្ធផល និងកម្មវិធីប្រកួតរបស់ព្រះខ័នរាជស្វាយរៀង នៅក្នុងពូល B កន្លងមករួមមាន៖
- ថ្ងៃទី២១ សីហា ២០២៥៖ Shan United FC ០-៣ ព្រះខ័នរាជស្វាយរៀង
- ថ្ងៃទី២៥ កញ្ញា ២០២៥៖ Nam Dinh FC ២-០ ព្រះខ័នរាជស្វាយរៀង
- ថ្ងៃទី៤ ធ្នូ ២០២៥៖ ព្រះខ័នរាជស្វាយរៀង ២-២ Johor Darul Ta’zim FC
- ថ្ងៃទី៥ កុម្ភ: ២០២៥៖ Lion City Sailors FC ជួប ព្រះខ័នរាជស្វាយរៀង
ងាកមកជំនួបរវាងក្រុមព្រះខ័នរាជស្វាយរៀង របស់កម្ពុជា ទល់នឹងក្រុម Bangkok United FC របស់ថៃ ដែលគ្រោងធ្វើឡើងនាថ្ងៃទី២៩ ខែមករា កន្លងទៅ នៅពហុកីឡដ្ឋានជាតិមរតកតេជោ រាជធានីភ្នំពេញ ត្រូវបានលើកពេល។
ឆ្លងកាត់ ៣ប្រកួតរួចមក ក្នុងពានរង្វាន់ក្លិបក្នុងតំបន់អាស៊ាន ព្រះខ័នរាជស្វារៀង ឈរនៅចំណាត់ថ្នាក់លេខ៣ ឈ្នះ១ ស្មើ១ និងចាញ់១ មាន៤ពិន្ទុ។
ដោយឡែកសម្រាប់ការប្រកួតនៅក្នុងពូល A វិញបានរកឃើញក្រុមឡើងទៅកាន់វគ្គពាក់កណ្ដាលផ្ដាច់ព្រ័ត្ររួចរាល់ គឺក្រុម Buriram United (ថៃ) ក្រោយឈរលេខ១ ក្នុងពូល ៥ប្រកួត ឈ្នះ២ ស្មើ៣ មាន ៩ពិន្ទុ ក្រុម Selangor FC (ម៉ាឡេស៊ី) ឈរលេខ២ ៥ប្រកួត ឈ្នះ២ ស្មើ៣ មាន ៩ពិន្ទុ ដូចគ្នាតែចាញ់គ្រាប់បាល់។
សូមបញ្ជាក់ថា សម្រាប់រូបមន្តប្រកួតនៅក្នុងពូលគឺក្រុមដែលមានពិន្ទុខ្ពស់ជាងគេ និងក្រុមលេខ២ តាមពូលទាំងពីរនឹងមានឈ្មោះឡើងទៅវគ្គពាក់កណ្តាលផ្តាច់ព្រ័ត្រ ប្រកួតគ្នាចំនួន២ជើង Home/Away ក្រុមឈ្នះ២ក្រុម នឹងឡើងទៅវគ្គផ្តាច់ព្រ័ត្រ។
ក្លិបបាល់ទាត់ថៃ Buriram United គឺជាម្ចាស់ជើងឯកឆ្នាំចាស់ នៃពានរង្វាន់ក្លិបកំពូលអាស៊ាន ASEAN Club Championship (Shopee Cup 2024/25) ក្រោយឈ្នះក្លឹបវៀតណាម Cong An Hanoi ៣ទល់២ ដោយបាល់កាត់សេចក្ដី១១ម៉ែត្រ នាយប់ថ្ងៃទី២១ ខែឧសភា ឆ្នាំ២០២៥។
គួរបញ្ជាក់ថា ពានរង្វាន់ជើងឯកតំបន់អាស៊ាន ASEAN Club Championship នេះធ្លាប់រៀបចំឡើង២លើកមក ដោយក្នុងឆ្នាំ២០០៣ ជើងឯកបានទៅក្រុម East Bengal របស់ឥណ្ឌា ក្រោយយកឈ្នះក្រុម BEC Tero Sasana របស់ថៃ នៅវគ្គផ្ដាច់ព្រ័ត្រ ក្នុងទីក្រុងហ្សាកាតា ប្រទេសឥណ្ឌូណេស៊ី ហើយឆ្នាំ២០០៥ ជើងឯកបានទៅក្រុម Tampines Rovers របស់សិង្ហបុរី ក្រោយយកឈ្នះលើក្រុម Pahang FA របស់ម៉ាឡេស៊ី ដោយលទ្ធផល ៤-២ នៅទីក្រុងបានដារសេរីបេហ្គាវ៉ាន់ ប្រទេសប្រ៊ុយណេ៕
