នៅថ្ងៃទី០៤ ខែកុម្ភៈ ឆ្នាំ២០២៦ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានផ្ញើលិខិតផ្លូវការមួយច្បាប់ជូនឯកឧត្តម អេម៉ានូអែល ម៉ាក្រុង ប្រធានាធិបតីនៃសាធារណរដ្ឋបារាំង ដើម្បីឆ្លើយតបទៅនឹងឆន្ទៈរបស់ប្រទេសបារាំង ក្នុងកិច្ចសហការផ្ដល់ឯកសារពាក់ព័ន្ធនឹងព្រំដែនអន្តរជាតិរវាងកម្ពុជា និងថៃ។
ក្រសួងការបរទេសនិងសហប្រតិបត្តិការអន្តរជាតិបានបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា សម្ដេចធិបតីនាយករដ្ឋមន្ត្រី បានសម្ដែងនូវការអរគុណយ៉ាងស្មោះអស់ពីដួងចិត្តចំពោះប្រទេសបារាំង ដែលបានប្រកាន់ជំហរគោរពគោលការណ៍ច្បាប់អន្តរជាតិ និងបានចូលរួមយ៉ាងសកម្មក្នុងកិច្ចខិតខំប្រឹងប្រែងសម្របសម្រួលដោះស្រាយជម្លោះដោយសន្តិវិធី។ កម្ពុជាក៏បានគូសបញ្ជាក់ពីសារៈសំខាន់នៃភាពជាដៃគូយុទ្ធសាស្ត្ររវាងប្រទេសទាំងពីរ ដែលបានរួមចំណែកដល់សន្តិភាព និងការកសាងជាតិឡើងវិញតាំងពីដើមរៀងមក។
បើតាមក្រសួងការបរទេស ក្នុងលិខិតនោះ សម្ដេចធិបតីបានស្នើឱ្យប្រទេសបារាំងពិចារណាផ្ដល់៖
- ការគាំទ្រផ្នែកបច្ចេកទេស ជំនាញ និងការប្រឹក្សាយោបល់។
- ការសម្របសម្រួលផ្ដល់ឯកសារ ប្រវត្តិសាស្ត្រ និងបច្ចេកទេសនានា ដែលជាមរតកតាំងពីសម័យអាណានិគម ដើម្បីប្រើប្រាស់ជាមូលដ្ឋានក្នុងការដោះស្រាយបញ្ហាព្រំដែន។
រាជរដ្ឋាភិបាលកម្ពុជាបានប្រកាសជាថ្មីនូវការប្តេជ្ញាចិត្តយ៉ាងមុតមាំក្នុងការដោះស្រាយរាល់បញ្ហាប្រឈមតាមរយៈ៖
- ការគោរពច្បាប់អន្តរជាតិ និងពហុភាគីនិយម។
- ការចរចាដោយសន្តិវិធី ដោយដាច់ខាតមិនធ្វើការគំរាមកំហែង ឬប្រើប្រាស់កម្លាំងឡើយ។
គោលដៅចម្បងនៃកិច្ចខិតខំប្រឹងប្រែងនេះ គឺដើម្បីសម្រេចបាននូវដំណោះស្រាយមួយដ៏យុត្តិធម៌ និងយូរអង្វែង ដែលអនុញ្ញាតឱ្យប្រជាជនកម្ពុជា និងថៃ អាចបន្តរស់នៅជាមួយគ្នាជាអ្នកជិតខាងល្អ ក្នុងសុខសន្តិភាព ស្ថិរភាព និងវិបុលភាពសម្រាប់មនុស្សជំនាន់ក្រោយ។
ការផ្ញើលិខិតនេះ បង្ហាញពីឆន្ទៈនយោបាយដ៏ខ្ពស់របស់កម្ពុជា ក្នុងការការពារបូរណភាពទឹកដីតាមរយៈយន្តការការទូត និងច្បាប់អន្តរជាតិ ឱ្យបានច្បាស់លាស់ និងត្រឹមត្រូវបំផុត៕
