ខេត្តកំពង់ចាម៖ ដើម្បីបង្កើនភាពអធិកអធម និងទាក់ទាញភ្ញៀវទេសចរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ រដ្ឋបាលខេត្តកំពង់ចាម បានសម្រេចរៀបចំការតាំងបង្ហាញ «លៀសហាល» យក្សដែលមានទម្ងន់រហូតដល់ ៥តោន និងតម្រៀបជាជួរប្រវែងដល់ទៅ ១,២០០ម៉ែត្រ សម្រាប់ព្រឹត្តិការណ៍សង្ក្រាន្តកំពង់ចាម ឆ្នាំ២០២៦។
ក្នុងកិច្ចប្រជុំត្រៀមរៀបចំពិធីបុណ្យចូលឆ្នាំថ្មី នាព្រឹកថ្ងៃទី១៣ ខែកុម្ភៈ ឆ្នាំ២០២៦ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានបញ្ជាក់ថា ការជ្រើសរើសយក “លៀសហាល” មកធ្វើជាចំណុចទាក់ទាញខ្លាំងនាឆ្នាំនេះ គឺក្នុងគោលបំណង៖
- លើកកម្ពស់អត្តសញ្ញាណតំបន់៖ បង្ហាញពីចំណីអាហារដ៏ពេញនិយមបំផុតរបស់ខេត្តកំពង់ចាម ដែលគ្រប់អ្នកធ្វើដំណើរឆ្លងកាត់តែងតែនឹកឃើញមុនគេ។
- បង្ហាញធនធានជលផល៖ ឆ្លុះបញ្ចាំងពីភាពសម្បូរបែបនៃធនធានទឹកសាប និងការច្នៃប្រឌិតម្ហូបអាហាររបស់ប្រជាជនក្នុងមូលដ្ឋាន។
- ជំរុញសេដ្ឋកិច្ចទេសចរណ៍៖ ជាយុទ្ធសាស្ត្រទាក់ទាញភ្ញៀវទេសចរជាតិ និងអន្តរជាតិឱ្យមកកម្សាន្តកាន់តែច្រើន ដែលជួយបង្កើនចំណូលដល់បងប្អូនអាជីវករ តាមរយៈការស្នាក់នៅ និងការហូបចុក។
ក្រៅពីការបង្ហាញលៀសហាលដ៏អស្ចារ្យនេះ ព្រឹត្តិការណ៍ «សង្ក្រាន្តកំពង់ចាម ២០២៦» ក៏មានកម្មវិធីកម្សាន្តសម្បូរបែបជាច្រើនទៀត រួមមាន៖
- ការលេងល្បែងប្រជាប្រិយខ្មែរគ្រប់ប្រភេទ។
- ការប្រគុំតន្ត្រីខ្នាតយក្ស និងការរាំកម្សាន្ត។
- ការតុបតែងភ្លើងលម្អយ៉ាងស្រស់ស្អាតតាមបណ្តោយមាត់ទន្លេ និងមុខសាលាខេត្ត។
រដ្ឋបាលខេត្តកំពង់ចាម រំពឹងថាព្រឹត្តិការណ៍ឆ្នាំនេះនឹងក្លាយជាចំណុចដៅទេសចរណ៍ដ៏សំខាន់បំផុតមួយ ដែលផ្តល់នូវភាពសប្បាយរីករាយ និងការចងចាំមិនអាចបំភ្លេចបានជូនដល់បងប្អូនប្រជាពលរដ្ឋ៕
អត្ថបទ៖ត្រយង