ភ្នំពេញ៖ នាយកដ្ឋានប្រឆាំងបទល្មើសបច្ចេកវិទ្យា បានសម្រេចចាត់វិធានការដាក់វិន័យតាមរយៈការអប់រំណែនាំដល់មន្ត្រីទទួលពាក្យបណ្ដឹងម្នាក់ បន្ទាប់ពីមានការរិះគន់ថាបានប្រើពាក្យពេចន៍មិនសមរម្យ និងស្ដីបន្ទោសដាក់ប្រជាពលរដ្ឋ ដែលជាជនរងគ្រោះក្នុងករណីចាញ់បោកកម្ចីអនឡាញ។
ចំណាត់ការនេះធ្វើឡើងភ្លាមៗ បន្ទាប់ពីមានការចែកចាយវីដេអូសារសំឡេងនៅលើបណ្ដាញសង្គម ហ្វេសប៊ុករបស់លោក វ៉ាន់ សារ៉ាយ ដែលក្នុងនោះជនរងគ្រោះបានរៀបរាប់ថា ខ្លួនត្រូវបានមន្ត្រីនគរបាលស្ដីបន្ទោស និងនិយាយឌឺដង ខណៈកំពុងមានភាពតានតឹងផ្លូវចិត្ត និងធ្វើដំណើរទៅដាក់ពាក្យបណ្ដឹងសុំអន្តរាគមន៍។
សូមចុចអាន៖ ឈប់បារម្ភរឿងស្មុគស្មាញ! ឥឡូវនេះ លោកអ្នកអាចដាក់ពាក្យបណ្ដឹងមកក្រសួងមហាផ្ទៃតាម “អនឡាញ” បានយ៉ាងរហ័ស
តាមសេចក្តីជូនដំណឹងចេញផ្សាយនៅថ្ងៃទី១៩ ខែកុម្ភៈ ឆ្នាំ២០២៦ នាយកដ្ឋានបានបញ្ជាក់ថា មន្ត្រីដែលពាក់ព័ន្ធត្រូវបានអប់រំណែនាំភ្លាមៗ ដើម្បីពង្រឹងការយល់ដឹងអំពី «ក្រមសីលធម៌មន្ត្រីនគរបាលជាតិ» និងការបម្រើសាធារណៈដោយមានភាពថ្លៃថ្នូរ និងយោគយល់អធ្យាស្រ័យ។
ជាមួយគ្នានេះ ថ្នាក់ដឹកនាំនាយកដ្ឋានក៏បានក្រើនរំលឹកដល់មន្ត្រីក្រោមឱវាទទាំងអស់ ឲ្យប្រកាន់ខ្ជាប់នូវឥរិយាបថសមរម្យ ពិសេសចំពោះប្រជាពលរដ្ឋដែលកំពុងស្ថិតក្នុងស្ថានភាពរងគ្រោះ។
នាយកដ្ឋានបានបន្ថែមថា ខ្លួនបានទាក់ទងទៅកាន់ជនរងគ្រោះ ដើម្បីសម្របសម្រួលឲ្យមកដាក់ពាក្យបណ្ដឹងឡើងវិញ និងធានាថានឹងផ្តល់ការជួយដោះស្រាយតាមនីតិវិធីច្បាប់។ ព្រមទាំងថ្លែងអំណរគុណចំពោះសាធារណជនដែលបានចូលរួមផ្ដល់មតិយោបល់ក្នុងន័យស្ថាបនា។
ចំណាត់ការដ៏រហ័សខាងលើនេះ មិនត្រឹមតែជាការដោះស្រាយបញ្ហាចំពោះមុខប៉ុណ្ណោះទេ ប៉ុន្តែគឺជាការបង្ហាញពីការប្ដេជ្ញាចិត្តរបស់ក្រសួងមហាផ្ទៃ ក្នុងការលុបបំបាត់ភាពអសកម្ម និងការកសាងកងកម្លាំងនគរបាលជាតិមួយដែលប្រកបដោយគុណធម៌ និងសមត្ថភាព ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល៕
