ក្នុងឱកាសខួបលើកទី២៧ នៃ «ទិវាជាតិយល់ដឹងអំពីមីន» ថ្ងៃទី២៤ ខែកុម្ភៈ ឆ្នាំ២០២៦ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានសព្វព្រះរាជហឫទ័យចេញព្រះរាជសារដ៏មានអត្ថន័យ ដើម្បីរំលឹកដល់ការលះបង់ និងផលវិបាកដែលបង្កឡើងដោយគ្រាប់មីន និងសំណល់ជាតិផ្ទុះ។
ក្នុងព្រះរាជសារដ៏ខ្ពង់ខ្ពស់ ព្រះអង្គបានលើកឡើងនូវចំណុចសំខាន់ៗដែលកម្ពុជាបានឆ្លងកាត់ រួមមាន៖
- សង្គ្រាមរ៉ាំរ៉ៃក្នុងស្រុក៖ ដែលបានបន្សល់ទុកនូវគ្រាប់មីន និងសំណល់ជាតិផ្ទុះយ៉ាងសន្ធឹកសន្ធាប់ បង្កជាសោកនាដកម្មដល់អាយុជីវិត និងការអភិវឌ្ឍជាតិ។
- ផលវិបាកពីសង្គ្រាមឈ្លានពាន៖ ព្រះអង្គបានបញ្ជាក់យ៉ាងច្បាស់ថា ក្នុងពេលបច្ចុប្បន្ននេះ ប្រទេសកម្ពុជាទើបតែបានរងការរំលោភបំពានដោយអាវុធធុនធ្ងន់ និងយន្តហោះពីសត្រូវឈ្លានពានថៃ នៅតាមបណ្តោយព្រំដែនកម្ពុជា-ថៃ។ ការឈ្លានពាននេះ បានបន្សល់ទុកនូវគ្រាប់បែកចង្កោម គ្រាប់រំសេវ និងយុទ្ធភណ្ឌមិនទាន់ផ្ទុះផ្សេងៗទៀត នៅតាមភូមិកររបស់ប្រជាជនកម្ពុជា ដែលបង្កជាបន្ទុកដ៏ធ្ងន់ធ្ងរសម្រាប់រាជរដ្ឋាភិបាលក្នុងការបោសសម្អាតបន្ថែមទៀត។
ព្រះមហាក្សត្រ បានសម្តែងនូវការអរគុណ និងកោតសរសើរដល់រាជរដ្ឋាភិបាលកម្ពុជា ដែលបានខិតខំបង្កើនសកម្មភាពយុទ្ធនាការបោសសម្អាតគ្រាប់មីនគ្រប់ប្រភេទ រួមទាំងគ្រាប់ដែលបន្សល់ទុកពីការឈ្លានពាននៅតាមព្រំដែនផងដែរ ដើម្បីរំដោះដីស្រែចម្ការជូនប្រជាកសិករ និងផ្តល់សុវត្ថិភាពដល់សហគមន៍។
ការអំពាវនាវដល់សហគមន៍អន្តរជាតិ
ដើម្បីសម្រេចបាននូវគោលដៅ “កម្ពុជាគ្មានមីន” ព្រះអង្គបានអំពាវនាវដល់៖
- ប្រទេសជាមិត្ត និងអង្គការអន្តរជាតិ៖ បន្តផ្តល់ជំនួយបច្ចេកទេស និងថវិកា សម្រាប់ប្រតិបត្តិការបោសសម្អាតមីន និងយុទ្ធភណ្ឌមិនទាន់ផ្ទុះ។
- ជនរួមជាតិគ្រប់រូប៖ ត្រូវមានការយល់ដឹងកាន់តែច្បាស់ និងប្រុងប្រយ័ត្នខ្ពស់បំផុតចំពោះគ្រោះថ្នាក់ដែលបង្កឡើងដោយសំណល់ជាតិផ្ទុះគ្រប់ប្រភេទ។
ព្រះរាជសារនេះបានបញ្ជាក់យ៉ាងច្បាស់ថា ទោះបីជាកម្ពុជាបានឆ្លងកាត់ការឈ្លានពាន និងសង្គ្រាមដ៏ឈឺចាប់ក៏ដោយ ប៉ុន្តែស្មារតីរួបរួមគ្នា និងការគាំទ្រពីអន្តរជាតិ នឹងក្លាយជាកម្លាំងចលករនាំកម្ពុជាទៅរកសន្តិភាព និងសុវត្ថិភាពពេញលេញ។ងការគាំទ្រពីអន្តរជាតិ នឹងក្លាយជាកម្លាំងចលករនាំកម្ពុជាទៅរកសន្តិភាព និងសុវត្ថិភាពពេញលេញ៕
អត្ថបទ៖ត្រយង