[ភ្នំពេញ]៖ អគ្គលេខាធិការដ្ឋានកិច្ចការព្រំដែន បានចេញសេចក្តីប្រកាសព័ត៌មានផ្លូវការមួយ បង្ហាញពីវឌ្ឍនភាព និងជំហរម៉ឺងម៉ាត់របស់កម្ពុជា ក្នុងការបន្តការងារបោះបង្គោលព្រំដែនគោកជាមួយភាគីថៃ ដើម្បីប្រែក្លាយតំបន់ព្រំដែនឱ្យទៅជាតំបន់សន្តិភាព ស្ថិរភាព និងការអភិវឌ្ឍយូរអង្វែង។
យោងតាមសេចក្តីប្រកាស ភាគីកម្ពុជាបានស្នើទៅកាន់ភាគីថៃ ដើម្បីអនុវត្តការងារបច្ចេកទេសសំខាន់ៗក្នុងអំឡុងខែមីនា ឆ្នាំ២០២៦ ខាងមុខនេះ រួមមាន៖
- ការវាស់វែង និងបោះបង្គោលបណ្តោះអាសន្ន៖ នៅចន្លោះបង្គោលលេខ ៤២-៤៧ (ខេត្តបន្ទាយមានជ័យ) និងលេខ ៥២-៥៩ (ខេត្តបាត់ដំបង) ព្រមទាំងការសាងសង់ឡើងវិញនូវបង្គោលព្រំដែនចំនួន ១៥ តាមគំរូដើម។
- ការពិនិត្យចំណុចសេសសល់៖ ចុះពិនិត្យតំបន់បឹងត្រកួន តំបន់ច្រកទ្វារព្រំដែនអន្តរជាតិជប់ (ខេត្តបន្ទាយមានជ័យ) តំបន់ភ្នំកុកធំ និងតំបន់ព្រំដែនផ្សេងៗទៀតក្នុងខេត្តពោធិ៍សាត់។
- ការរៀបចំកិច្ចប្រជុំកម្រិតខ្ពស់៖ គ្រោងរៀបចំកិច្ចប្រជុំក្រុមប្រតិបត្តិការ (OG) លើកទី១២ និងកិច្ចប្រជុំពិសេសរបស់គណៈកម្មាធិការព្រំដែនចម្រុះ (JBC) ក្នុងសប្តាហ៍ទី២ នៃខែមីនា។
ការឆ្លើយតបចំពោះសកម្មភាពរំលោភបំពាន
នៅក្នុងសេចក្តីប្រកាសដដែលនេះ គណៈកម្មាធិការ JBC ភាគីកម្ពុជា បានសម្តែងការប្រឆាំងយ៉ាងដាច់អហង្ការចំពោះរាល់សកម្មភាពឈ្លានពាន និងការរំលោភបំពាននានាលើបូរណភាពទឹកដីកម្ពុជា។ កម្ពុជាបានទាមទារឱ្យភាគីថៃបញ្ឈប់រាល់សកម្មភាពខុសច្បាប់ ដូចជាការបោះតង់ ការលើកទង់ជាតិ ឬការសាងសង់សំណង់ផ្សេងៗនៅក្នុងតំបន់ដែលមិនទាន់ឯកភាពគ្នា ជាពិសេសនៅតំបន់ប្រាសាទតាម៉ាន់ និងប្រាសាទព្រះវិហារ។
ជំហរច្បាប់ និងការការពារអធិបតេយ្យភាព
អគ្គលេខាធិការដ្ឋានកិច្ចការព្រំដែន បានសង្កត់ធ្ងន់ថា រាល់ការដោះស្រាយបញ្ហាព្រំដែន ត្រូវតែផ្អែកលើ៖
- គោលការណ៍ច្បាប់អន្តរជាតិ និងគោលការណ៍ខ្សែព្រំដែនមិនកែប្រែ (Uti Possidetis Juris)។
- អនុសញ្ញា និងសន្ធិសញ្ញាបារាំង-សៀម ឆ្នាំ១៩០៤ និង ១៩០៧ ព្រមទាំងផែនទីដែលពាក់ព័ន្ធ។
- អនុស្សរណៈនៃការយោគយល់គ្នា (MOU) ឆ្នាំ២០០០។
“រាជរដ្ឋាភិបាលកម្ពុជា តែងតែប្រកាន់ខ្ជាប់នូវមនសិការស្នេហាជាតិ និងការទទួលខុសត្រូវខ្ពស់បំផុត ដើម្បីការពារបូរណភាពទឹកដី និងអធិបតេយ្យជាតិ ដោយមិនអនុញ្ញាតឱ្យមានការរំលោភបំពានណាមួយកើតឡើងឡើយ”។
ឆ្លៀតក្នុងឱកាសនេះ អគ្គលេខាធិការដ្ឋានកិច្ចការព្រំដែន ក៏បានអំពាវនាវដល់សាធារណជន និងបងប្អូនជនរួមជាតិទាំងអស់ មេត្តាជឿជាក់លើការដឹកនាំរបស់រាជរដ្ឋាភិបាល និងគណៈកម្មាធិការ JBC ក្នុងការការពារផលប្រយោជន៍ជាតិជាធំ៕
