ពានរង្វាន់បាល់ទះសម្តេចក្រឡាហោម ស ខេង លើកទី៤ ឆ្នាំ២០២៦ បានឈានដល់វគ្គផ្ដា់ព្រ័ត្រហើយ សម្រាបវិញ្ញាសាបាល់ទះបុរស ក្រោយបញ្ចប់ការប្រកួតវគ្គពាក់កណ្ដាលផ្ដាច់ព្រ័ត្រ កាលពីថ្ងៃទី២៧ ខែកុម្ភៈ ឆ្នាំ២០២៦ កន្លងទៅ នៅក្នុងសាលបាល់ទះ នៃពហុកីឡដ្ឋានជាតិ រាជធានីភ្នំពេញ។
ឆ្លងកាត់ការប្រកួតយ៉ាងស្វិតស្វាញ ស្នងការ ន.ប ខេត្តកោះកុងបានយកឈ្នះ កងពលធំអន្តរាគមនលេខ៣ ៣-០ កក់កៅអីវគ្គផ្ដាច់ព្រ័ត្រ ខណ:ស្នងការ ន.ប រាជធានៅភ្នំពេញ ក៏បានយកឈ្នះសមាគមកីឡាបាល់ទះវិសាខា ៣-០ ឡើងទៅកាន់វគ្គផ្ដាច់ព្រ័ត្រ ដូចគ្នា។
ដោយឡែកសម្រាប់ ការប្រកួតបាល់ទះសម្តេចក្រឡាហោម ស ខេង លើកទី៤ ឆ្នាំ២០២៦ ផ្នែកនារី គឺស្នងការ ន.ប រាជធានៅភ្នំពេញ ក៏កក់កៅអីវគ្គផ្ដាច់ព្រ័ត្រ ក្រោយយកឈ្នះមន្ទីរ អបរំខេត្តពោធិ៍សាត់ ៣-០ ស្របពេលក្លិបបាល់ទះអកសមុទ្រ បានយកឈ្នះសមាគមក្រសួងមហាផ្ទៃ ៣-០ ឡើងទៅកាន់វគ្គផ្ដាច់ព្រ័ត្រ។
ដូចនេះសម្រាប់ការប្រកួតវគ្គផ្ដាច់ព្រ័ត្រ ពានរង្វាន់បាល់ទះសម្តេចក្រឡាហោម ស ខេង លើកទី៤ ឆ្នាំ២០២៦ នឹងធ្វើឡើងនៅថ្ងៃទី០១ ខែមីនា ឆ្នាំ២០២៦ នៅក្នុងសាលបាល់ទះ នៃពហុកីឡដ្ឋានជាតិ រាជធានីភ្នំពេញ ចាប់ពីម៉ោង ៤:០០នាទីរសៀលតទៅ។
សូមបញ្ជាក់ថា ពានរង្វាន់បាល់ទះសម្តេចក្រឡាហោម ស ខេង លើកទី៤ ឆ្នាំ២០២៦ បានចាប់ផ្តើមប្រកួតកាលពីថ្ងៃទី៧ ខែកុម្ភ: ដោយមាន ៣២សមាគម-ក្លិប មកពី ២៥រាជធានី-ខេត្តទូទាំងប្រទេសកម្ពុជាចូលរួមប្រកួត ចំពោះផ្នែកបុរស និង៨សមាគម-ក្លិប សម្រាប់ផ្នែកនារី គ្រោងនឹងបញ្ចប់ទៅវិញនៅថ្ងៃទី១ ខែមីនា ឆ្នាំ២០២៦ ខាងមុខ៕
