នៅថ្ងៃទី៣ ខែមីនា ឆ្នាំ២០២៦ នេះ កិច្ចប្រជុំប្រចាំសប្តាហ៍ដើម្បីតាមដានវឌ្ឍនភាពការងារបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) ត្រូវបានរៀបចំឡើងយ៉ាងធំ នៅសាលប្រជុំទីស្តីការក្រសួងមហាផ្ទៃ និងតាមប្រព័ន្ធវីដេអូហ៊្សូម។ កិច្ចប្រជុំនេះត្រូវបានដឹកនាំដោយ ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន និង ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
ក្រោយកិច្ចប្រជុំដ៏មានសារៈសំខាន់នេះ លោក ទូច សុឃៈ អ្នកនាំពាក្យក្រសួងមហាផ្ទៃ បានបង្ហាញរបាយការណ៍បូកសរុបលទ្ធផលរយៈពេល ២សប្តាហ៍ (១៣-២៨ កុម្ភៈ) យ៉ាងដូច្នេះថា៖
១. ប្រតិបត្តិការបង្ក្រាបបទល្មើសអនឡាញ
ក្នុងរយៈពេលតែ ១៥ថ្ងៃ អាជ្ញាធរសម្រេចបាននូវលទ្ធផលគួរឱ្យកត់សម្គាល់៖
- ចំនួនបង្ក្រាប៖ ២១ លើក (ក្នុងរាជធានី-ខេត្តចំនួន ៧)។
- មនុស្សដែលត្រូវបានឃាត់ខ្លួន៖ សរុប ៤១៩ នាក់ (មាន ១២ សញ្ជាតិ) ក្នុងនោះរួមមានជនជាតិចិន ២៧៣ នាក់ និងខ្មែរ ៥០ នាក់។
- ភូមិសាស្ត្រឈានមុខ៖ រាជធានីភ្នំពេញមានការបង្ក្រាបច្រើនជាងគេ (១២ លើក) បន្ទាប់មកគឺខេត្តស្វាយរៀង កំពត បន្ទាយមានជ័យ បាត់ដំបង សៀមរាប និងត្បូងឃ្មុំ។
២. ការរឹតបន្តឹងរដ្ឋបាលតាមទីតាំងស្នាក់នៅប្រមូលផ្តុំ
ក្រៅពីការបង្ក្រាបផ្ទាល់ អាជ្ញាធរក៏បានចុះត្រួតពិនិត្យរដ្ឋបាលលើជនបរទេសស្នាក់នៅកម្ពុជា ដើម្បីធានាភាពស្របច្បាប់៖
- ទីតាំងដែលបានត្រួតពិនិត្យ៖ ១,៩៨៣ ទីតាំង ក្នុងខេត្តចំនួន ៩។
- ចំនួនជនបរទេសសរុប៖ ១២,៧១៥ នាក់ ត្រូវបានពិនិត្យឯកសារស្នាក់នៅ និងសៀវភៅការងារ។
- គោលបំណង៖ ដើម្បីផ្ទៀងផ្ទាត់ភាពត្រឹមត្រូវនៃលិខិតឆ្លងដែន ទិដ្ឋាការ និងបណ្ណការងារ ស្របតាមអនុក្រឹត្យលេខ ០៣។
៣. វិធានការតាមដាន និងស្ទាក់ចាប់តាមដងផ្លូវ
អាជ្ញាធរបានដាក់គោលដៅត្រួតពិនិត្យយានយន្តសង្ស័យដែលដឹកជញ្ជូនជនបរទេសខុសច្បាប់បានចំនួន ១៥ លើក ក្នុងខេត្តបន្ទាយមានជ័យ កោះកុង និងកំពង់ឆ្នាំង ដោយបានឃាត់ខ្លួនជនសង្ស័យមួយចំនួនធំបញ្ជូនទៅសាកសួរ។
លោក ទូច សុឃៈ បានបញ្ជាក់ថា កិច្ចប្រជុំប្រចាំសប្តាហ៍នេះ គឺជាយន្តការតាមដានការងារយ៉ាងជាប់លាប់ ដើម្បីធានាថាបទបញ្ជារបស់រាជរដ្ឋាភិបាលត្រូវបានអនុវត្តដោយគ្មានការថយដៃ។ លោកសង្កត់ធ្ងន់ថា៖ “ការងារនេះមិនមែនធ្វើតែមួយដងហើយឈប់នោះទេ គឺជាកិច្ចការងារបន្តបន្ទាប់ ដើម្បីជម្រះបញ្ជីបទល្មើសឆបោកអនឡាញឱ្យអស់ពីទឹកដីកម្ពុជា”។
តាមរយៈកិច្ចប្រជុំ និងលទ្ធផលខាងលើ បង្ហាញឱ្យឃើញថា ក្រសួងមហាផ្ទៃកំពុងបង្កើនសន្ទុះយ៉ាងខ្លាំងក្លាក្នុងការការពារសន្តិសុខឌីជីថល និងសុវត្ថិភាពសង្គម ក្នុងគោលដៅបង្កើនទំនុកចិត្តជូនប្រជាពលរដ្ឋ និងអ្នកវិនិយោគទុនបរទេសដែលមករកស៊ីដោយស្របច្បាប់នៅកម្ពុជា៕
អត្ថបទ៖ត្រយង