ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានបង្ហាញនូវចក្ខុវិស័យប្រកបដោយភាពជឿជាក់ថា តំបន់អាស៊ានកំពុងវិវត្តខ្លួនលើសពីសេណារីយ៉ូធម្មតា ដើម្បីឆ្ពោះទៅក្ដាប់យកតំណែងជាមហាអំណាចសេដ្ឋកិច្ចទី៤ របស់ពិភពលោកនៅត្រឹមឆ្នាំ២០៤៥ បើទោះបីជាត្រូវប្រឈមនឹងសម្ពាធប្រជាសាស្ត្រមួយចំនួនក៏ដោយ។
ការលើកឡើងនេះ បានធ្វើឡើងក្នុងឱកាសដែលសម្ដេចធិបតី អញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើក «កិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦» នាព្រឹកថ្ងៃទី៤ ខែមីនា ឆ្នាំ២០២៦ ក្រោមបរិយាកាសធុរកិច្ចដ៏រស់រវើក។
១. អាស៊ានជា «ក្បាលម៉ាស៊ីន» នៃតម្រូវការសកល
សម្ដេចធិបតី បានគូសបញ្ជាក់ថា អាស៊ានលែងជាតំបន់ដែលដើរតាមគេទៀតហើយ ប៉ុន្តែបានក្លាយជាក្បាលម៉ាស៊ីនរុញច្រានសេដ្ឋកិច្ចសកល។ ជាក់ស្ដែង៖
- អាស៊ានបូកបី៖ ត្រូវបានព្យាករថានឹងសម្រេចបានអត្រាកំណើន ៤% ក្នុងឆ្នាំ២០២៦។
- សន្ទុះសកល៖ អត្រានេះគឺខ្ពស់ជាងអត្រាកំណើនសកល ដែលស្ថិតក្នុងរង្វង់តែ ៣.៣% ប៉ុណ្ណោះ។
២. ភាពទាក់ទាញនៃរំហូរវិនិយោគ (FDI)
ខណៈដែលរំហូរវិនិយោគផ្ទាល់ពីបរទេស (FDI) ជាសកលមានការធ្លាក់ចុះ ១១% ប៉ុន្តែតំបន់អាស៊ានបែរជាបង្ហាញនូវភាពខ្លាំងគួរឱ្យកត់សម្គាល់៖
- កំណើនវិនិយោគ៖ កើនឡើង ៨.៥% ដែលមានទំហំទឹកប្រាក់សរុបដល់ទៅ ២២៦ ពាន់លានដុល្លារអាម៉េរិក។
- វិស័យបង្គោល៖ អាស៊ានបានក្លាយជាមជ្ឈមណ្ឌលយុទ្ធសាស្ត្រសម្រាប់ឧស្សាហកម្ម សឺមីកុងឌុចទ័រ (Semiconductors), វិស្វកម្មយានយន្ត និង សេវាកម្មឌីជីថល។
៣. ផែនការយុទ្ធសាស្ត្រ ២០២៦-២០៣០ និងភាពធន់របស់កម្ពុជា
សម្ដេចនាយករដ្ឋមន្ដ្រី ក៏បានបង្ហើបពីផែនការយុទ្ធសាស្ត្រសហគមន៍សេដ្ឋកិច្ចអាស៊ាន ឆ្នាំ២០២៦-២០៣០ ដែលផ្ដោតលើការធ្វើសមាហរណកម្ម និងសុខដុមនីយកម្មហេដ្ឋារចនាសម្ព័ន្ធរូបវ័ន្ត និងឌីជីថល ដើម្បីធានាថាអាស៊ានមិនមែនគ្រាន់តែជា «ជម្រើសបន្ថែម» សម្រាប់ក្រុមហ៊ុនសកលនោះទេ ប៉ុន្តែគឺជា «ស្នូលនៃខ្សែច្រវាក់ផ្គត់ផ្គង់» តែម្ដង។
ដោយឡែកសម្រាប់កម្ពុជា សម្ដេចធិបតីបានអះអាងពីភាពរឹងមាំនៃសេដ្ឋកិច្ចជាតិ៖
«សេដ្ឋកិច្ចកម្ពុជានៅតែមានភាពរឹងមាំ ដោយសម្រេចបានអត្រាកំណើន ៥,២% ក្នុងឆ្នាំ២០២៥ និងបន្តរក្សាសន្ទុះដ៏ល្អនេះក្នុងរយៈពេលមធ្យម ដែលផ្ដល់កាលានុវត្តភាពដ៏មហាសាលសម្រាប់អ្នកវិនិយោគ»។
៤. កម្ពុជា៖ ដៃគូយុទ្ធសាស្ត្រដែលមិនអាចខ្វះបាន
ជាចុងក្រោយ សម្ដេចមហាបវរធិបតី បានសង្កត់ធ្ងន់ថា កម្ពុជាបានរៀបចំខ្លួនរួចរាល់ក្នុងការធ្វើជាដៃគូយុទ្ធសាស្ត្រដ៏ជិតស្និទ្ធក្នុងគ្រួសារអាស៊ាន ដើម្បីជំរុញកំណើនប្រកបដោយចីរភាព និងបរិយាបន្ន ឆ្លើយតបទៅនឹងការប្រែប្រួលនៃសេដ្ឋកិច្ចសកល៕
អត្ថបទ៖ត្រយង