ចប់ការប្រកួតពេញ ៩០នាទីដ៏តានតឹង ព្រះខ័នរាជស្វាយរៀងបានយកឈ្នះភ្នំពេញក្រោន ដោយលទ្ធផល ៤ទល់និង១ នៃពានរង្វាន់លំដាប់ទី៣ប្រចាំទ្វីប AFC Challenge League 2025-26 ជើងទី១ វគ្គ៨ក្រុមចុងក្រោយ នាពហុកីឡដ្ឋានជាតិរាជធានីភ្នំពេញ នៅរាត្រីថ្ងៃទី៥ ខែមីនា ឆ្នាំ២០២៦។
ក្រោមក្រសែភ្នែកអ្នកគាំទ្រជាច្រើន ក្រុមទាំង២ បានសម្រុកគ្នាចាប់ពីនាទីទី១ ដោយភ្នំពេញ រកបាន១គ្រាប់មុននៅនាទីទី៣ រកបានដោយកីឡាករ Mosses Dyer ឈានដល់នាទីទី២៩ ស្វាយរៀង រកបានគ្រាប់តាមស្មើវិញ ដោយកីឡាករ Peprah Kwame រហូតដល់ចប់វគ្គទី១។
លុះដល់វគ្គទី២ ខ្សែប្រយុទ្ធសញ្ជាតិហ្គាណា Peprah Kwame បន្ថែម ១គ្រាប់ទៀត នៅនាទីទី៦៧ មិនទាន់ស្ងាត់សម្លេងហ៊ោរបស់អ្នកគាំទ្រ ស្វាយរៀងបានបន្ថែមសម្ពាធលើភ្នំពេញក្រោន នៅគ្រាប់ទី៣ ដោយកីឡាករ Patrick នៅនាទីទី៧៥ រំលង់បាន៧នាទី ពោលនៅនាទីទី៨២ ខ្សែប្រយុទ្ធ Peprah Kwame ស៊ុតគ្រាប់បាល់ទី៤ និងជាគ្រាប់ Hat-Trick (៣គ្រាប់ម្នាក់ឯង) រក្សាលទ្ធផលរហូតដល់ចប់ការប្រកួត ភ្នំពេញក្រោន ១-៤ ស្វាយរៀង។
សម្រាប់កម្មវិធីប្រកួត ទាំង២ជើង របស់ក្រុមទាំង២៖
- ជើងទី១ ភ្នំពេញក្រោន ១-៤ ព្រះខ័នរាជស្វាយរៀង ពហុកីឡដ្ឋានជាតិ រាជធានីភ្នំពេញ
- ជើងទី២ ព្រះខ័័នរាជស្វាយរៀង ប៉ះ ភ្នំពេញក្រោន ថ្ងៃទី១២ ខែមីនា ឆ្នាំ២០២៦ ពហុកីឡដ្ឋានមរតកតេជោ
ការប្រកួតវគ្គជម្រុះក្នុងពូលតាមតំបន់ទាំង២ ពានរង្វាន់កម្រិតទី៣ ប្រចាំទ្វីប AFC Challenge League ២០២៥-២៦ ត្រូវបានចាប់ផ្ដើមកាលពីថ្ងៃទី២៥ តុលា សម្រាប់តំបន់អាស៊ីខាងលិច និងថ្ងៃទី២៦ តុលា សម្រាប់តំបន់អាស៊ីខាងកើត ខណ:វគ្គ ៨ក្រុម តំបន់ខាងកើតចាប់ផ្ដើមនៅថ្ងៃទី៥ មីនា ស្របពេលតំបន់ខាងលិតត្រូវបានពន្យាពេល ដោយសារស្ថានភាពភូមិសាស្ត្រ ខណៈវគ្គផ្ដាច់ព្រ័ត្រ នឹងធ្វើឡើងនៅថ្ងៃទី៩ ខែឧសភា ឆ្នាំ២០២៦ ខាងមុខ
គួរបញ្ជាក់ថា សម្រាប់ពានរង្វាន់កម្រិតទី៣ប្រចាំទ្វីបអាស៊ី AFC Challenge League រដូវកាល ២០២៤-២៥ ម្ចាស់ជើងឯកបានទៅលើ ក្រុមបាល់ទាត់ FK Arkadag របស់តួកម៉េនីស្ថាន ក្រោយយកឈ្នះលើក្រុមព្រះខ័នរាជស្វាយរៀង របស់កម្ពុជា ២ទល់នឹង១ ក្រោយចំណាយពេលនៅលើទីលានសរុប ១២០នាទី នៅពហុកីឡដ្ឋានជាតិមរតតេជោ រាជធានីភ្នំពេញ កាលពីថ្ងៃទី១០ ខែឧសភា ឆ្នំា ២០២៥៕
