ស្របពេលដែលស្ថានភាពនៅតំបន់មជ្ឈិមបូព៌ាបន្តមានការវិវត្តប្រែប្រួល រាជរដ្ឋាភិបាលកម្ពុជា តាមរយៈក្រសួងការបរទេស និងសហប្រតិបត្តិការអន្តរជាតិ បានបង្ហាញនូវការយកចិត្តទុកដាក់យ៉ាងខ្លាំងក្លាចំពោះសុខទុក្ខ និងសុវត្ថិភាពរបស់ប្រជាពលរដ្ឋខ្មែរដែលកំពុងរស់នៅ និងសិក្សានៅទីនោះ។
តាមរបាយការណ៍ចុងក្រោយបំផុត គិតត្រឹមថ្ងៃទី១០ ខែមីនា ឆ្នាំ២០២៦ ប្រជាពលរដ្ឋ រួមទាំងសិស្ស-និស្សិតកម្ពុជាសរុបចំនួន ៥៩៥ នាក់ ដែលកំពុងស្ថិតក្នុងតំបន់មជ្ឈិមបូព៌ា បាននិងកំពុងរក្សាការប្រុងប្រយ័ត្នយ៉ាងខ្ជាប់ខ្ជួនបំផុត។ ក្រសួងបានបញ្ជាក់ដោយក្តីសោមនស្សថា រហូតមកទល់ពេលនេះ បងប្អូនខ្មែរយើងទាំងអស់គឺ “មានសុវត្ថិភាពជាធម្មតា” និងពុំទាន់មានការរងគ្រោះថ្នាក់ណាមួយឡើយ។
ដើម្បីធានាបាននូវសុវត្ថិភាពជាអតិបរមា ក្រសួងការបរទេសបានដាក់ចេញនូវវិធានការចាំបាច់មួយចំនួនដូចជា ការតាមដានជាប់ជានិច្ចនូវស្ថានទូតកម្ពុជាប្រចាំតំបន់មជ្ឈិមបូព៌ា កំពុងតាមដានសភាពការណ៍យ៉ាងដិតដល់ និងរក្សាទំនាក់ទំនងប្រចាំជាមួយអាជ្ញាធរមូលដ្ឋាន ក៏ដូចជាតំណាងសហគមន៍ខ្មែរ។ មួយវិញទៀត ក្រសួងអំពាវនាវឱ្យពលរដ្ឋខ្មែរទាំងអស់ ក្នុងប្រទេសអ៊ីស្រាអែល កាតា គុយវ៉ែត អារ៉ាប៊ីសាអូឌីត អេហ្ស៊ីប និងហ្ស៊កដានី បន្តអនុវត្តតាមការណែនាំរបស់អាជ្ញាធរនៃប្រទេសដែលខ្លួនកំពុងស្នាក់នៅឱ្យបានម៉ឺងម៉ាត់។
ក្នុងករណីមានតម្រូវការជំនួយផ្នែកកុងស៊ុល ឬព័ត៌មានបន្ទាន់ បងប្អូនអាចទាក់ទងមកកាន់លេខទូរស័ព្ទ ក្រសួងការបរទេស ស្ថានទូតកម្ពុជាប្រចាំតួកគី ស្ថានទូតកម្ពុជាប្រចាំគុយវ៉ែត និងស្ថានទូតកម្ពុជាប្រចាំអេហ្ស៊ីប ដូចដែលមាននៅក្នុងសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។
យ៉ាងណាមិញ សកម្មភាពឆ្លើយតបយ៉ាងរហ័ស និងការផ្សព្វផ្សាយព័ត៌មានច្បាស់លាស់ពីសំណាក់ក្រសួងការបរទេសនៅពេលនេះ គឺជាសក្ខីភាពបង្ហាញពីការមិនបោះបង់ពលរដ្ឋខ្លួនឯងទោះស្ថិតក្នុងកាលៈទេសៈណាក៏ដោយ។ ក្នុងនាមជាពលរដ្ឋ យើងគួរជួយចែកចាយព័ត៌មាន និងលេខទូរស័ព្ទបន្ទាន់ទាំងនេះ ដល់សាច់ញាតិ ឬមិត្តភក្តិដែលកំពុងស្នាក់នៅតំបន់នោះ ដើម្បីជាប្រយោជន៍ដល់សុវត្ថិភាពរួម៕
អត្ថបទ៖ សង្គម
