ខេត្តព្រៃវែង៖ ស្របតាមគោលនយោបាយលើកកម្ពស់វិស័យសុខាភិបាលរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងក្រោមការតម្រង់ទិសពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង, នាថ្ងៃទី១២ ខែមីនា ឆ្នាំ២០២៦ ឯកឧត្តមបណ្ឌិត ងិន បាណាល់ ប្រធានក្រុមការងាររាជរដ្ឋាភិបាលចុះមូលដ្ឋានស្រុកបាភ្នំ បានដឹកនាំសកម្មភាពមនុស្សធម៌ដ៏ធំមួយ ក្នុងការពិនិត្យ ព្យាបាលជំងឺ និងចែកអំណោយជូនប្រជាពលរដ្ឋ។
សកម្មភាពនេះត្រូវបានរៀបចំឡើងនៅក្នុងឃុំរោងដំរី ស្រុកបាភ្នំ ដោយមានកិច្ចសហការយ៉ាងជិតស្និទ្ធរវាងក្រុមការងារចុះមូលដ្ឋានស្រុកបាភ្នំ និង ក្រុមគ្រូពេទ្យមនុស្សធម៌ប៉ាយសួយឡាវយិនកម្ពុជា ដើម្បីផ្តល់សេវាសុខភាពដោយឥតគិតថ្លៃជូនប្រជាពលរដ្ឋប្រមាណ ១,៥០០នាក់។
ចំណុចសំខាន់ៗនៃសកម្មភាព៖
- ការយកចិត្តទុកដាក់ខ្ពស់៖ ឯកឧត្តមបណ្ឌិត ងិន បាណាល់ បានបញ្ជាក់ថា រាជរដ្ឋាភិបាលតែងតែតម្កល់សុខទុក្ខ និងសុខភាពរបស់ប្រជាពលរដ្ឋជាអាទិភាពចម្បង។
- សេវាសុខាភិបាលប្រកបដោយសមធម៌៖ ការចុះផ្ទាល់ដល់មូលដ្ឋាននេះ គឺដើម្បីធានាថាជនចាស់ជរា និងគ្រួសារដែលមានជីវភាពខ្វះខាត ទទួលបានការថែទាំសុខភាពប្រកបដោយគុណភាព បន្ថែមលើសេវាសាធារណៈរបស់រដ្ឋ។
- កិច្ចសហការអន្តរជាតិ៖ ឯកឧត្តមបណ្ឌិត បានថ្លែងអំណរគុណយ៉ាងជ្រាលជ្រៅចំពោះក្រុមគ្រូពេទ្យប៉ាយសួយឡាវយិនកម្ពុជា ដែលបានលះបង់ធនធាន និងពេលវេលា ដើម្បីរួមចំណែកកាត់បន្ថយភាពក្រីក្រ និងពង្រឹងវិស័យសុខាភិបាលនៅកម្ពុជា។
សកម្មភាពនេះមិនត្រឹមតែជាការផ្តល់សេវាព្យាបាលប៉ុណ្ណោះទេ ប៉ុន្តែក៏ជាសក្ខីភាពនៃសាមគ្គីភាព និងការយកចិត្តទុកដាក់យ៉ាងជិតស្និទ្ធរបស់ថ្នាក់ដឹកនាំ ចំពោះសុខុមាលភាពរបស់បងប្អូនប្រជាពលរដ្ឋនៅតាមមូលដ្ឋានដាច់ស្រយាលផងដែរ៕