ក្រសួងពាណិជ្ជកម្មបានចេញសេចក្តីជូនដំណឹងជាសាធារណៈ ដោយធ្វើការអំពាវនាវយ៉ាងទទូចដល់បងប្អូនប្រជាកសិករទាំងអស់ នៅពេលជួបប្រទះបញ្ហាប្រឈមក្នុងការលក់កសិផល ឬមានការកកស្ទះទំនិញកសិកម្មមិនអាចបញ្ចេញទៅកាន់ទីផ្សារបានទាន់ពេលវេលា សូមប្រញាប់ផ្តល់ព័ត៌មាន និងទាក់ទងមកកាន់មន្ទីរពាណិជ្ជកម្មរាជធានី-ខេត្ត ឬមកកាន់អគ្គនាយកដ្ឋានអភិវឌ្ឍន៍វិស័យឯកជននៃក្រសួងពាណិជ្ជកម្មដោយផ្ទាល់។ ការអំពាវនាវនេះធ្វើឡើងក្នុងគោលបំណងបង្កើនប្រសិទ្ធភាពនៃការអន្តរាគមន៍ និងការស្វែងរកដំណោះស្រាយសមស្រប ដើម្បីការពារផលប្រយោជន៍របស់កសិករឱ្យបានទាន់ពេល ជាពិសេសក្នុងអំឡុងពេលប្រមូលផលដែលងាយនឹងរងគ្រោះដោយសារបញ្ហាតម្លៃ ឬកង្វះអ្នកបញ្ជាទិញ។
ដើម្បីសម្រួលដល់កិច្ចការងារនេះ ក្រសួងបានដាក់ចេញនូវយន្តការទំនាក់ទំនងតាមរយៈលេខទូរស័ព្ទ៖ ០១២ ៧២៣ ៦៤៥ និង ០១២ ២៥៩ ៩៩៧ ឬអាចទំនាក់ទំនងតាមរយៈប្រព័ន្ធទូរស័ព្ទសាធារណៈរបស់ក្រសួងលេខ ១២៦៦ ផងដែរ។ ក្រសួងពាណិជ្ជកម្មបានបញ្ជាក់ថា ក្រុមការងារមន្ទីរពាណិជ្ជកម្មតាមបណ្តាខេត្តនានា កំពុងបន្តតាមដានយ៉ាងសកម្មលើស្ថានភាពទីផ្សារកសិផល ហើយកន្លងមកក្រសួងក៏បានសហការជាមួយវិស័យឯកជនដើម្បីចុះសម្របសម្រួលទិញ-លក់ និងស្វែងរកទីផ្សារជូនកសិករនៅតាមតំបន់មួយចំនួនដែលមានបញ្ហាកកស្ទះរួចមកហើយ ដូចជាករណីកសិផលបន្លែគ្រប់ប្រភេទនៅខេត្តបាត់ដំបងជាដើម។
ក្រសួងពាណិជ្ជកម្មបានបញ្ជាក់ឆន្ទៈរបស់ខ្លួនយ៉ាងមុតមាំក្នុងការបន្តដោះស្រាយបញ្ហាទីផ្សារជូនប្រជាកសិករនៅគ្រប់ទីតាំងផលិតកម្មទាំងអស់ក្នុងទូទាំងប្រទេស។ អាស្រ័យហេតុនេះ ការផ្តល់ព័ត៌មានពីសំណាក់កសិករមកកាន់អាជ្ញាធរពាក់ព័ន្ធ គឺជាកត្តាចាំបាច់បំផុតដែលអនុញ្ញាតឱ្យក្រសួងអាចចាត់វិធានការសម្របសម្រួលជាមួយវិស័យឯកជន និងដៃគូពាក់ព័ន្ធ ដើម្បីជួយសង្គ្រោះកសិផលដែលកំពុងកកស្ទះ និងរក្សានូវស្ថិរភាពសេដ្ឋកិច្ចក្នុងវិស័យកសិកម្មឱ្យបានល្អប្រសើរ៕
