តាមប្រព័ន្ធផ្សព្វផ្សាយអន្តរជាតិបានបញ្ជាក់ឱ្យដឹងថា ក្នុងរយៈពេលត្រឹមតែជាងមួយខែប៉ុណ្ណោះ សហរដ្ឋអាមេរិកបានជួបប្រទះនឹងហេតុការណ៍ផ្ទុះ និងឆេះនៅរោងចក្រចម្រាញ់ប្រេងយក្សចំនួនពីរយ៉ាងធ្ងន់ធ្ងរ គឺនៅរដ្ឋ California និងរដ្ឋ Texas ដែលជាបេះដូងនៃឧស្សាហកម្មថាមពលរបស់ប្រទេស។
ហេតុការណ៍នេះបានបង្កើតឱ្យមានការខាតបង់សមត្ថភាពចម្រាញ់ប្រេងសរុបជិត ៨០ ម៉ឺនបារ៉ែលក្នុងមួយថ្ងៃ ដែលមិនត្រឹមតែជាការខាតបង់ផ្នែកសេដ្ឋកិច្ចដ៏ធំសម្បើមប៉ុណ្ណោះទេ ប៉ុន្តែថែមទាំងជាសញ្ញាបញ្ជាក់យ៉ាងច្បាស់អំពី ភាពផុយស្រួយ នៃហេដ្ឋារចនាសម្ព័ន្ធថាមពលដ៏សំខាន់បំផុតមួយរបស់ពិភពលោក។
ហេតុការណ៍ទីមួយបានផ្ទុះឡើងនៅថ្ងៃទី ១៩ ខែកុម្ភៈ នៅរោងចក្រ Chevron ក្រុង El Segundo រដ្ឋ California ដែលមានសមត្ថភាពចម្រាញ់ប្រេង ២៦៩,០០០ បារ៉ែលក្នុងមួយថ្ងៃ។ រោងចក្រនេះផ្គត់ផ្គង់ប្រេងយន្តហោះជាង ៤០% និងប្រេងសាំងប្រហែល ២០% សម្រាប់តំបន់ភាគខាងត្បូងនៃរដ្ឋ California ដែលជាសេដ្ឋកិច្ចធំជាងគេទី ៥ របស់ពិភពលោកប្រសិនបើរាប់ជារដ្ឋនីមួយៗ។
រហូតដល់ថ្ងៃទី ២៣ ខែមីនា រោងចក្រ Valero នៅក្រុង Port Arthur រដ្ឋ Texas ដែលជារោងចក្រចម្រាញ់ប្រេងធំជាងគេមួយរបស់សហរដ្ឋអាមេរិកដែលមានសមត្ថភាពរហូតដល់ ៤៣៥,០០០ បារ៉ែលក្នុងមួយថ្ងៃ ក៏បានផ្ទុះឡើងដែរ។ បើគិតជារួម រោងចក្រទាំងពីរនេះមានសមត្ថភាពចម្រាញ់ប្រេងសរុបជាង ៧០៤,០០០ បារ៉ែលក្នុងមួយថ្ងៃ ឬស្មើនឹងជិត ៣% នៃសមត្ថភាពចម្រាញ់ប្រេងសរុបរបស់សហរដ្ឋអាមេរិកទាំងមូល។
ទោះបីជានៅមិនទាន់ដឹងច្បាស់ពីបរិមាណប្រេងដែលឆេះខាតបង់ពិតប្រាកដ ឬត្រឹមរយៈពេលដែលរោងចក្រទាំងនេះត្រូវបិទដំណើរការនោះទេ ប៉ុន្តែការបាត់បង់សមត្ថភាពផលិតភ្លាមៗចំនួនជិត ៨០ ម៉ឺនបារ៉ែលក្នុងមួយថ្ងៃនេះ បានបង្កើតជា ការតក់ស្លុតផ្នែកផ្គត់ផ្គង់ដែលធ្វើឱ្យទីផ្សារប្រេងឥន្ធនៈញ័ររន្ធត់ ជាពិសេសនៅតំបន់ West Coast និង Gulf Coast។
អ្វីដែលគួរឱ្យព្រួយបារម្ភជាងការខាតបង់សេដ្ឋកិច្ចទៅទៀតនោះ គឺផលប៉ះពាល់ផ្នែកបរិស្ថាន និងសុខភាពសាធារណៈ។ ហេតុការណ៍ទាំងពីរបានបញ្ចេញផ្សែងពុល និងធូលីដីដែលផ្ទុកសារធាតុគ្រោះថ្នាក់ដូចជា បេនហ្សេន និងស៊ីលីន ទៅក្នុងបរិយាកាស។ នៅរដ្ឋ Texas អាជ្ញាធរត្រូវប្រកាសឱ្យប្រជាពលរដ្ឋស្នាក់នៅក្នុងផ្ទះដើម្បីជៀសវាងការប៉ះពាល់នឹងផ្សែងពុលដែលសាយភាយពីការផ្ទុះ។
ទីភ្នាក់ងារការពារបរិស្ថានសហរដ្ឋអាមេរិក (EPA) ទើបតែបានសម្របសម្រួលទឹកប្រាក់ចំនួន ៤.២ លានដុល្លារ សម្រាប់ករណីរោងចក្រ Philadelphia Energy Solutions ដែលបានផ្ទុះកាលពីឆ្នាំ ២០១៩ ដែលជាភស្តុតាងបង្ហាញថា ការដោះស្រាយផលប៉ះពាល់បរិស្ថានត្រូវចំណាយពេលច្រើនឆ្នាំ និងថវិការាប់លានដុល្លារ៕
