ការប្រកួតពានរង្វាន់ សុីភីអីល ឃែរ ខាប់ CPL Cares Cup U-14 ឆ្នាំ២០២៦ បានបញ្ចប់ ដោយក្រុមយុវជនអាយុក្រោម ១៤ឆ្នាំ របស់ក្លិបបាល់ទាត់វិសាខា គឺជាម្ចាស់ជើងឯកក្រោយយកឈ្នះក្រុមយុវជនអាយុក្រោម១៤ឆ្នាំ ភ្នំពេញក្រោន ដោយបាល់កាត់សេចក្ដី១១ម៉ែត្រ ២ទល់និង១ ក្រោយប្រកួតស្មើគ្នា។
សម្រាប់ជ័យជម្នះជាម្ចាស់ជើង របស់ក្រុមយុវជន១៤ឆ្នាំ របស់វិសាខា នេះគឺជាពានទី៤ ហើយសម្រាប់ឈុតយុវជន និងឈុត B របស់ក្លិបនៅរដូវកាលឆ្នាំ២០២៥-២៦។
ក្រុម B វិសាខា (ភាគច្រើនយុវជន) ឈ្នះជើងឯកលីគអភិវឌ្ឍន៍ ឆ្នាំ២០២៥-២៦
ក្រុមយុវជនអាយុក្រោម ១៨ឆ្នាំ វិសាខា ឈ្នះជើងឯក លីគយុវជនអាយុក្រោម ១៨ឆ្នាំ ឆ្នាំ២០២៥-២៦
ក្រុមយុវជនអាយុក្រោម ១៦ឆ្នាំ វិសាខា ឈ្នះជើងឯក លីគយុវជនអាយុក្រោម ១៦ឆ្នាំ ឆ្នាំ២០២៥-២៦
ក្រុមយុវជនអាយុក្រោម ១៤ឆ្នាំ វិសាខា ឈ្នះជើងឯក សុីភីអីល ឃែរ ខាប់ យុវជនអាយុក្រោម ១៤ឆ្នាំ ឆ្នាំ២០២៦
ក្រុមហ៊ុនខេមបូឌានព្រីមៀរលីគ (CPL) រៀបចំការប្រកួតបាល់ទាត់ពានរង្វាន់ CPL Cares Cup U-14 ឆ្នាំ២០២៦ ជាលើកទី១ ការប្រកួតរយៈពេល ២ថ្ងៃ ត្រូវបានធ្វើឡើងនៅថ្ងៃ សៅរ៍-អាទិត្យ ទី២៨-២៩ ខែមីនា នៅទីលានហ្វឹកហាត់ភ្នំពេញក្រោន។
តាមរយ:ការរៀបចំពានរង្វាន់ CPL Cares Cup U-14 របស់ក្រុមហ៊ុនខេមបូឌានព្រីមៀរលីគនេះ ធ្វើឡើងក្នុងគោលបំណងដើម្បជួយឱ្យបណ្តាក្លិបបាល់ទាត់ ដែលកំពុងចូលរួមការប្រកួតលីគកំពូលកម្ពុជា អាចបំពេញបាននូវលក្ខខណ្ឌតម្រូវតាមបទបញ្ជាអាជ្ញាបណ្ណក្លិបអន្តរជាតិ ជាពិសេសតាមចំណុចវិនិច្ឆ័យផ្នែកកីឡា របស់សហព័ន្ធកីឡាបាល់ទាត់ទ្វីបអាស៊ី(AFC) ដើម្បីទទួលបានសិទ្ធិពេញលេញក្នុងការចូលរួមការប្រកួតរៀបចំដោយស្ថាប័នប្រចាំទ្វីបនេះ។
គួរបញ្ជាក់ថា ពានរង្វាន់ CPL Cares Cup U-14 ឆ្នាំ២០២៦ មានក្រុមយុវជន នៃក្លិបសមាជិកលីគកំពូលកម្ពុជាចំនួន ១០ក្រុមរួមមាន៖ ភ្នំពេញក្រោន, ព្រះខ័នរាជស្វាយរៀង, វិសាខា, បឹងកេត, កងយោធពលខេមរភូមិន្ទ, អឹម អូ អាយ កំពង់ដេវ៉ា, អង្គរថាយហ្គឺរ, ឡាយហ្វ ខេត្តព្រះសីហនុ, អាយអេសអាយ ដង្កោសែនជ័យ និងណាហ្គាវើលដ៍ ដោយក្រុមនីមួយៗ អាចចុះឈ្មោះកីឡាករចាប់ពី ២១ ដល់ ៣៥នាក់ សម្រាប់កីឡាករមានឆ្នាំកំណើតចាប់ពីថ្ងៃទី១ ខែមករា ឆ្នាំ២០១២៕
