កម្ពុជាបានស្តែងឱ្យឃើញយ៉ាងច្បាស់ពីការប្រើប្រាស់ «សិល្បៈការទូតវប្បធម៌» ដើម្បីកសាងស្ពានទំនាក់ទំនង និងលើកកម្ពស់កិត្យានុភាពជាតិនៅលើឆាកអន្តរជាតិ តាមរយៈការនាំយកមរតក និងស្នាដៃភាពយន្តខ្មែរទៅដាក់បញ្ចាំងនៅក្នុងព្រឹត្តិការណ៍វប្បធម៌ដ៏ធំមួយនៅលើទឹកដីនៃសាធារណរដ្ឋបារាំង។
តបតាមព្រះរាជឱង្ការណែនាំដ៏ខ្ពង់ខ្ពស់របស់ ព្រះករុណា ព្រះមហាក្សត្រនៃព្រះរាជាណាចក្រកម្ពុជា សម្តេចរាជបុត្រីព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ព្រះមហាក្សត្រ និងជាសមាជិកាព្រឹទ្ធសភាកម្ពុជា នាថ្ងៃទី២៤ ខែសីហា ឆ្នាំ២០២៦ បានយាងជាព្រះអធិបតីដ៏ខ្ពង់ខ្ពស់ក្នុងពិធីបើក «មហោស្រពភាពយន្តនិយាយភាសាបារាំងអង់ហ្គូលែម» នៅក្នុងខេត្ត ឆារង់ ប្រទេសបារាំង។
ពិធីបើកមហោស្រពភាពយន្តអន្តរជាតិនេះ បានប្រព្រឹត្តទៅយ៉ាងមហោឡារិក ដោយមានវត្តមាន ឯកឧត្តម លុយ ដាវីត ឯកអគ្គរាជទូតកម្ពុជាប្រចាំសាធារណរដ្ឋបារាំង ព្រមទាំងមានការចូលរួមពី ឯកឧត្តម François HOLLANDE (ហ្វ្រង់ស្វ័រ ហូឡង់) អតីតប្រធានាធិបតីបារាំង តំណាងអង្គការហ្វ្រង់កូហ្វូនី និងអាជ្ញាធរដែនដីបារាំង។ នៅក្នុងឱកាសនោះ សម្តេចរាជបុត្រីព្រះអនុជ បានសម្តែងនូវការគោរព និងរំលឹកគុណូបការៈយ៉ាងជ្រាលជ្រៅបំផុតចំពោះវិញ្ញាណក្ខន្ធ ព្រះករុណា ព្រះបាទសម្តេចព្រះ នរោត្តម សីហនុ «ព្រះបរមរតនកោដ្ឋ» ដែលព្រះអង្គមិនត្រឹមតែជាផលិតករភាពយន្តដ៏ល្អឯកអស្ចារ្យប៉ុណ្ណោះទេ ប៉ុន្តែថែមទាំងជាព្រះស្ថាបនិកមួយព្រះអង្គនៃអង្គការហ្វ្រង់កូហ្វូនីផងដែរ។
នៅក្នុងព្រឹត្តិការណ៍នេះ ភាពយន្តខ្មែរចំនួន ៩ រឿង ដែលលាតត្រដាងពីទំព័រប្រវត្តិសាស្ត្រក្នុងប្រាំបួនទសវត្សរ៍ ត្រូវបានរៀបចំចាក់បញ្ចាំងជូនសាធារណជនអន្តរជាតិបានទស្សនា ក្នុងនោះរួមមានទាំងស្នាព្រះហស្តភាពយន្តភាគរឿង «រស់ដោយសប្បាយ» របស់ព្រះករុណា ព្រះបរមរតនកោដ្ឋ ផងដែរ។ ផ្ទាំងទស្សនីយភាពទាំងនេះ បានឆ្លុះបញ្ចាំងពីភាពរស់រវើកនៃសិល្បៈ ការតស៊ូ និងភាពរឹងមាំរបស់ប្រជាជនខ្មែរដែលបានឆ្លងកាត់ទុក្ខវេទនាក្នុងប្រវត្តិសាស្ត្ររបស់ខ្លួន ព្រមទាំងបង្ហាញពីឥទ្ធិពលនៃសិល្បៈទីប្រាំពីរក្នុងការភ្ជាប់ទំនាក់ទំនងរវាងប្រជាជាតិ និងវប្បធម៌។
វត្តមាន និងការចូលរួមយ៉ាងសកម្មរបស់កម្ពុជាក្នុងមហោស្រពភាពយន្តដ៏ធំនេះ គឺជាជំហានការទូតវប្បធម៌ដ៏មានសារៈសំខាន់បំផុត ខណៈដែលកម្ពុជាកំពុងត្រៀមខ្លួនធ្វើជាម្ចាស់ផ្ទះទទួលស្វាគមន៍ កិច្ចប្រជុំកំពូលហ្វ្រង់កូហ្វូនីលើកទី ២០ នាពេលខាងមុខ។ ព្រឹត្តិការណ៍នេះមិនត្រឹមតែបានធ្វើឱ្យព្រលឹង និងអត្តសញ្ញាណវប្បធម៌ខ្មែរបន្លឺឡើងយ៉ាងរន្ទឺនៅលើទឹកដីអឺរ៉ុបប៉ុណ្ណោះទេ ប៉ុន្តែថែមទាំងបានពង្រឹងរូបភាពវិជ្ជមានរបស់កម្ពុជាលើឆាកអន្តរជាតិ តាមរយៈស្ពានសិល្បៈ និងវប្បធម៌យ៉ាងពិតប្រាកដ៕