ក្រោយពីនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានថ្លែងការណ៍ស្ដីពីជំហរឥតងាករេរបស់កម្ពុជាពាក់ព័ន្ធនឹងការទាមទារដែនសមុទ្រត្រួតស៊ីគ្នាជាមួយនឹងប្រទេសថៃ ដោយបានផ្ញើលិខិតជូនភាគីថៃ និងអគ្គលេខាធិការអង្គការសហប្រជាជាតិដើម្បីឱ្យចាប់ផ្ដើមដំណើរការយន្តការផ្សះផ្សារដោយបង្ខំ ធ្វើឱ្យរង្គើដល់ក្រុងបាងកក រហូតមានបណ្ដាញសារព័ត៌មានជាច្រើនបានចោមរោមចាំសម្ភាសន៍នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃ លោកអនុទិនទីន ឆាន់វីរគុល នៅវិមានរដ្ឋាភិបាល ក្រោយកិច្ចប្រជុំគណៈរដ្ឋមន្ត្រីកាលពីថ្ងៃអង្គារ កន្លងទៅ។
ជាការឆ្លើយតប នាយករដ្ឋមន្ត្រីរូបនេះបានសង្កត់ធ្ងន់ថា ប្រទេសថៃមិនមានតម្រូវការក្នុងការផ្លាស់ប្តូរយុទ្ធសាស្ត្រ ឬ “ឆ្លើយតបត” ទៅនឹងចំណាត់ការផ្លូវច្បាប់អន្តរជាតិរបស់កម្ពុជានោះទេ បន្ទាប់ពីទីក្រុងភ្នំពេញបានជូនដំណឹងទៅកាន់អង្គការសហប្រជាជាតិ (UN) និងទីក្រុងបាងកក អំពីការចាប់ផ្តើមដំណើរការយន្តការផ្សះផ្សាដោយបង្ខំ ក្រោមអនុសញ្ញា UNCLOS ជុំវិញការទាមទារដែនសមុទ្រដែលកំពុងមានជម្លោះនៅក្នុងឈូងសមុទ្រថៃ ក្រោយពេលដែលថៃបានលុបចោល MOU ឆ្នាំ២០០១។ នេះបើយោងតាមការផ្សាយដោយកាសែត The Nation Thailand។
លោក អានុទិន បានមានលើកឡើងថា «លោកមិនទាន់ទទួលបានការជូនដំណឹងជាផ្លូវការអំពីចំណាត់ការចុងក្រោយរបស់កម្ពុជានៅឡើយទេ ហើយក៏មិនបានដឹងថាមានបញ្ហាថ្មីណាមួយកើតឡើងនោះដែរ។»
លោក អនុទិន បានបន្តថា ថៃបានជម្រាបជូនថ្នាក់ដឹកនាំកម្ពុជារួចរាល់ហើយអំពីជំហររបស់ខ្លួនចំពោះ MOU44 ក្នុងកំឡុងពេលកិច្ចប្រជុំកំពូលអាស៊ាននៅក្នុងប្រទេសហ្វីលីពីន ដោយលោកបានបន្ថែមថា ភាគីកម្ពុជាបានទទួលដឹងឮពីបញ្ហានេះ និងបានសម្តែងការខកចិត្ត។
ក្រោយមក កម្ពុជាបានបង្ហាញសញ្ញាថានឹងបន្តនីតិវិធីក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ទោះបីជាលោក អានុទិន បានបញ្ជាក់ថា មិនទាន់មានការកំណត់ពេលវេលាសម្រាប់ជំហានបន្ទាប់ក៏ដោយ។
កម្ពុជាបានចាប់ផ្តើមដំណើរការផ្សះផ្សាដោយបង្ខំ ដែលគាំទ្រដោយអង្គការសហប្រជាជាតិជាផ្លូវការក្រោមអនុសញ្ញា UNCLOS បន្ទាប់ពីប្រទេសថៃបានបញ្ចប់អនុស្សរណៈនៃការយោគយល់គ្នាឆ្នាំ ២០០១ ដែលអនុស្សរណៈនេះធ្លាប់ជាក្របខ័ណ្ឌសម្រាប់ការចរចាលើការទាមទារដែនសមុទ្រត្រួតស៊ីគ្នារបស់ប្រទេសទាំងពីរនៅក្នុងឈូងសមុទ្រថៃ។
យ៉ាងណាមិញ គណៈរដ្ឋមន្ត្រីថៃបានអនុម័តលើការបញ្ចប់ MOU ឆ្នាំ ២០០១ នេះកាលពីថ្ងៃទី ៥ ខែឧសភា ដោយលើកឡើងថា កិច្ចព្រមព្រៀងនេះមិនមានវឌ្ឍនភាពអ្វីទាល់តែសោះក្នុងរយៈពេល ២៥ ឆ្នាំកន្លងមកនេះ ហើយប្រទេសថៃនឹងប្រើប្រាស់ UNCLOS ធ្វើជាក្របខ័ណ្ឌយោងសម្រាប់ការចរចានៅពេលអនាគតជំនួសវិញ។
នៅពេលត្រូវបានសួរថាតើប្រទេសថៃកំពុងត្រូវបានគេមើលឃើញថា និយាយរឿងមួយជាសាធារណៈ ប៉ុន្តែបែរជាធ្វើរឿងមួយផ្សេងទៀតនៅពីក្រោយខ្នងដែរឬទេ លោក អានុទិន បានសួរអ្នកយកព័ត៌មានវិញថា៖ «តើនរណាជាអ្នកមើលឃើញបែបហ្នឹង?»
លោកបានឆ្លើយតបថា លោកមិនបានមើលឃើញស្ថានភាពក្នុងរូបភាពបែបនោះទេ ដោយទទូចថាជំហររបស់ប្រទេសថៃនៅតែមានភាពស៊ីសង្វាក់គ្នាយ៉ាងច្បាស់លាស់។
ចំពោះក្តីបារម្ភរបស់សាធារណជនដែលថា ជំហររបស់ថៃនៅលើឆាកអន្តរជាតិហាក់ដូចជាខុសប្លែកពីយុទ្ធសាស្ត្រជាក់ស្តែងនោះ លោក អានុទិន បានអះអាងថា ប្រទេសថៃនៅតែប្រកាន់ខ្ជាប់នូវគោលការណ៍របស់ខ្លួន ហើយមិនបានដើរជំហានណាមួយដែលធ្វើឱ្យប្រទេសខាតបង់ប្រយោជន៍នោះឡើយ។
លោកបាននិយាយថា៖ «ថៃនៅតែឈរលើគោលការណ៍ផ្ទាល់ខ្លួន ហើយមិនទាន់មានចំណុចណាមួយដែលធ្វើឱ្យប្រទេសជាតិត្រូវធ្លាក់ក្នុងស្ថានភាពចាញ់ប្រៀបនោះទេ»។
ប៉ុន្តែអ្វីដែលយើងអាចមើលឃើញគឺ លោក អនុទិន បានព្យាយាមនិយាយបង្វែរសាច់រឿង ដោយបានព្យាយាមយកករណីបើកបិទ ព្រំដែនជាមួយនឹងប្រទេសកម្ពុជា មកបន្ធូរបន្ថយស្ថានការណ៍និងការចាប់អារម្មណ៍របស់អ្នកសារព័ត៌មានថៃ ដោយបានព្យាយាមលើកឡើងជាដដែលថា ព័ត៌មានដែលកំពុងផ្ទុះនៅប្រទេសថៃរឿងបើកច្រកព្រំដែនជាមួយនឹងប្រទេសកម្ពុជា គឺជាព័ត៌មានក្លែងក្លាយតែប៉ុណ្ណោះ។
យ៉ាងណាមិញ នៅពេលអ្នកសារព័ត៌មានសួរថាតើរដ្ឋភិបាលថៃចាំបាច់ត្រូវឆ្លើយតបទៅនឹងការបង្កើនការចូលរួមរបស់កម្ពុជាជាមួយសហគមន៍អន្តរជាតិដែរឬទេ លោក អានុទិន បានឆ្លើយតបថា៖ «ហេតុអ្វីបានជាយើងត្រូវឆ្លើយតបត?»
ជាការកត់សម្គាល់ អនុទិន នៅតែព្យាយាមដើរតាមដានចាស់ គឺយកចិត្តក្រុមអភិរក្សនិយម និងកម្លាំងយោធាថៃ ដោយបានគូសបញ្ជាក់ថា ប្រទេសថៃនឹងបន្តដំណើរការតាមផ្លូវរបស់ខ្លួន ដោយស្តាប់មតិសាធារណៈ និងព្យាយាមធ្វើសកម្មភាពឱ្យស្របតាមបំណងប្រាថ្នារបស់ប្រជាជនថៃឱ្យបានច្រើនបំផុតតាមដែលអាចធ្វើទៅបាន ដោយធានាថាឋានៈរបស់ប្រទេសនៅលើឆាកអន្តរជាតិមិនត្រូវបានខូចខាត។
នេះ វាគ្រាន់តែជាការឆ្លើយតបបែបដោះទាល់ និងយករួចខ្លួនមួយគ្រាៗរបស់លោក អនុទិន នៅចំពោះមុខអ្នកសារព័ត៌មានថៃ មកពីគ្រប់ស្ថាប័នប៉ុណ្ណោះ ព្រោះកន្លងមក នាយករដ្ឋមន្ត្រីរូបនេះ រមែងប្រើវិធីសាស្ត្របែបនេះដើម្បីរំដោះខ្លួនពីសំនួរចាក់ដោត និងស៊ីជម្រៅពីបណ្ដាអ្នកសារព័ត៌មានថៃ ដែលមកប្រមូលផ្ដុំគ្នាដើម្បីចង់ដឹងពីជំហរ ទិសដៅ និងយុទ្ធសាស្ត្ររបស់រដ្ឋាភិបាលជុំវិញបញ្ហាជំលោះព្រំដែនជាមួយនឹងប្រទេសកម្ពុជា៕
