ថ្នាក់ដឹកនាំជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានជួបពិភាក្សាការងារជាមួយលោក Dipen Joshi តំណាងក្រុមហ៊ុន Olam Food Ingredients ដើម្បីស្វែងរកកិច្ចសហប្រតិបត្តិការ វិនិយោគការកែច្នៃគ្រាប់ស្វាយចន្ទីនៅកម្ពុជា សម្រាប់នាំចេញទៅកាន់ទីផ្សារអន្តរជាតិ។
តបទៅតាមការស្នើសុំរបស់ភាគីក្រុមហ៊ុន ដែលជាក្រុមហ៊ុនអន្តរជាតិ មានការិយាល័យកណ្តាលនៅទីក្រុងសឹង្ហបូរី ដើម្បីពិនិត្យរួមគ្នាដោះស្រាយបញ្ហាប្រឈមសំខាន់ៗរបស់កសិករ និងសហគមន៍កសិកម្ម សំដៅអាចឱ្យក្រុមហ៊ុនទិញបាននូវគ្រាប់ស្វាយចន្ទី ដែលមានបរិមាណច្រើន និងមានគុណភាពសមស្រប។
ជាលទ្ធផលនៃជំនួបកិច្ចសហប្រតិបត្តិការនេះ អង្គប្រជុំយល់ស្របជំរុញការតភ្ជាប់ខ្សែច្រវាក់តម្លៃស្វាយចន្ទីសម្រាប់គ្រប់តួអង្គពាក់ព័ន្ធ ជាពិសេសគឺរួមចំណែកសម្រេចបាននូវគោលនយោបាយជាតិ។ អង្គប្រជុំក៏បានយល់ស្របថានឹងបន្តធ្វើការជាមួយគ្នា ដើម្បីកំណត់បាននូវសកម្មភាពជាក់លាក់ ដែលភាគីក្រុមហ៊ុន និងក្រសួងត្រូវធ្វើជាបន្តទៀត។
គួរបញ្ជាក់ថា កិច្ចពិភាក្សាការងារនេះ ធ្វើឡើងនៅទីស្តីការក្រសួងកសិកម្ម កាលពីថ្ងៃទី៣ ខែមិថុនា ឆ្នាំ២០២៦ ដោយមានការចូលរួមពីមន្ត្រីមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) និងកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT)៕
