ឯកឧត្ដមអភិសន្តិបណ្ឌិត ស សុខា៖ Soccer League នឹង​ផ្ដល់ឱ្យយុវជនជួប​ជុំ​សាមគ្គី និងលើកកម្ពស់​​កីឡាបាល់ទាត់​នៅកម្ពុជា

ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណកម្មការរៀបចំការប្រកួត បាល់ទាត់ពានរង្វាន់ បាល់ទាត់ពានរង្វាន់ Soccer League លើកទី៩ ឆ្នាំ២០២៦ បានមានប្រសាសន៍ក្នុងពិធីបើកជាផ្លូវការ នារសៀលថ្ងៃទី៦ ខែមិថុនា ឆ្នាំ២០២៦នេះ ថា៖ ការរៀបចំព្រឹត្តិការណ៍ប្រកួតបាល់ទាត់ នឹងផ្ដល់ឱ្យយុវជន ក៏ដូចជាអ្នកចូលរួមបានជួបជុំគ្នា រិតចំណងមិត្តភាព សាមគ្គីភាព បង្កើតភាពស្និតស្នាលជាមួយគ្នា ជាពិសេសលើកកម្ពស់វិស័យកីឡាបាល់ទាត់នៅកម្ពុជាឱ្យកាន់តែរីកចម្រើនបន្ថែមទៀត។

ពិធីបើកព្រឹត្តិការណ៍រកួតបាល់ទាត់ពានរង្វាន់ Soccer League លើកទី៩ ឆ្នាំ២០២៦ ប្រព្រឹត្តិទៅក្រោមវត្តមានដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណកម្មការរៀបចំការប្រកួត នៅកីឡដ្ឋានវិសាខា នៅថ្ងៃទី៦ ខែមិថុនា ឆ្នាំ២០២៦។

ឯកឧត្ដមអភិសន្តិបណ្ឌិត ស សុខា បានបន្តទៀតថា៖ «យើងសង្គេតឃើញថា ពានរង្វាន់ Soccer League ពីមួយរដូវកាលទៅមួយរដូវកាល យើងទទួលបានការគាំទ្រយ៉ាងខ្លាំងទាំង គុណភាព ទាំងបរិមាណ តាមរយ:កីឡាករកីឡាការិនីចូលរួមប្រកួត។ បើរំលឹកពីការកកើតបាល់ទាត់ ពានរង្វាន់ Soccer League កាលពីឆ្នាំ២០១២ យើងមានក្រុមចូលរួមតែជាង ២០ក្រុមប៉ុណ្ណោះ ហើយនៅលើទី៦ ឆ្នាំ២០២៣ ក៏ជាលើកដំបូងរបស់ Soccer League ដែលបានផ្ដួចផ្ដើមឱ្យមានក្រុមបាល់ទាត់ផ្នែកនារីបានចូលរួម»។

ឯកឧត្ដមអភិសន្តិបណ្ឌិត ស សុខា បានបន្ថែមទៀតថា៖ «លើសពីពានរង្វាន់ Soccer League ក្នុងរយ:ពេល ២ឆ្នាំចុងក្រោយនេះ គណកម្មការរៀបចំការប្រកួត ក្រោមការដឹងនាំចង្អុលបង្ហាញរបស់ឯកឧត្តម ហ៊ុន ម៉ានី តែងតែផ្សាយនៅលើទូទាំងពិភពលោក ក៏ដូចជាប្រទេសកម្ពុជា ពាក់ព័ន្ធនឹងវិស័យកីឡាផ្សាភ្ជាប់ជាមួយការងារមនុស្សធ៌មតាមរយ:ការរៀបចំឱ្យមានការប្រកួតបាល់ទាត់សប្បុរសធម៌រវាងក្រុម ស.ស.យ.ក អលស្តា និងក្រុមផ្ការីកគ្រប់រដូវរបស់នាយពាក់មី ដើម្បីគៀគរថវិកា ជួយដល់កុមារ ជនភៀសសឹក និងកងទ័ពជួរមុខ»។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា(ស.ស.យ.ក) មានប្រសាសន៍ថា៖ «ពានរង្វាន់បាល់ទាត់ Soccer League រៀបចំឡើងក្នុងគោលបំណងបង្កើតនូវឱកាសបន្ថែមទៀត សម្រាប់យុវជនកម្ពុជា ដែលមកពីអង្គភាព ស្ថាប័ន មុខងារ និងវិជ្ជាជីវផ្សេងគ្នា និងមិនមែនជាកីឡាករអាជីព ក្នុងការជួបជុំគ្នា ស្គាល់គ្នា ស្វែងយល់ពីគ្នា និងរឹតចំណងសាមគ្គីភាព មិត្តភាព និងភាតរភាព តាមរយៈវិស័យកីឡា»។

ឯកឧត្តម ហ៊ុន ម៉ានី បានបន្ថែមថា Soccer League ក៏ដើម្បីជំរុញទឹកចិត្តយុវជន ដែលមិនមែនជាកីឡាករអាជីព ឱ្យលេងកីឡា ដើម្បីសុខភាព ទាំងផ្លូវកាយ និងផ្លូវចិត្ត ព្រមទាំងអាចបញ្ចេញសមត្ថភាព និងទេពកោសល្យរបស់ខ្លួន នៅក្នុងវិស័យកីឡាបាល់ទាត់ និងរួមចំណែកអប់រំស្មារតីយុវជនឲ្យប្រើប្រាស់ពេលវេលាទំនេរពីការសិក្សា និងការងាររបស់ខ្លួនមកលេងកីឡា ជាជាងយកពេលវេលាប្រព្រឹត្តអំពើអបាយមុខផ្សេងៗ។

ឯកឧត្តម ខៀវ ភារិទ្ធ បានលើកឡើងបន្តថា៖ ឆ្នាំនេះជាឆ្នាំទី៩ នៃ Soccer League តែមានការគាំទ្រយ៉ាងខ្លាំងពីសំណាក់មហាជន ពិសេសអ្នកស្នេហាវិស័យកីឡាបាល់ទាត់។ Soccer League មិនត្រឹមតែជាការប្រកួតតែជាកត្តាកាតាលីករ ដែលបានចូលរួមចំណែកយ៉ាងសកម្មជាមយយរាជរដ្ឋាភិបាល ក៏ដូចជាក្រសួងអបរំ យុវជន និងកីឡា ក្នុងការបំផុសយុវជនក្នុងចលនាសាមគ្គីភាព រឹតចំណងមិត្តភាពរបស់យុវជននៅទូទាំងប្រទេស ជាពិសេសដើម្បីបង្កើតធនធានមនុស្សក្នុងវិស័យកីឡាបាល់ទាត់នៅ កម្ពុជា ឱ្យកាន់តែមានភាពរីកចម្រើន និងរឹងមាំ ដើម្បីជាថ្នាលឆ្ពោះទៅកាន់ថ្នាក់ជាតិ និងអន្តរជាតិ ក្រោមពាក្យ ស្លោកមួយគឺ «ស្មារតីសាមគ្គីភាព» ។

ឯកឧត្តម ខៀវ ភារិទ្ធ បន្តថា ព្រឹត្តិការណ៍ប្រកួតបាល់ទាត់ Soccer League លើកទី៩ ឆ្នាំ២០២៦ មាន ៦៤ក្រុមចូលរួមប្រកួត ក្នុងនោះមានក្រុមនារី ចំនួន ៨ក្រុម ចែកចេញជា ២ពូល និងបុរស ៥៦ក្រុម ចែកចេញជា ១៦ពូល។ ការប្រកួតនឹងប្រើប្រាស់កីឡដ្ឋាន វិសាខា ទីលានសាកលវិទ្យាល័យ អាមេរិកកាំង ភ្នំពេញ និងទីលានវិទ្យាស្ថានអបរំកាយ និងកីឡា។ ការប្រកួតនឹងចាប់ផ្ដើមជាផ្លូវការពីថ្ងៃទី៧ ខែមិថុនា រហូតដល់ថ្ងៃទី២១ ខែកក្កដា ឆ្នាំ២០២៧៕