នៅក្នុងការផ្សាយមួយរបស់សារព័ត៌មានថៃ បានលើកយកសម្ដីរបស់អ្នកកាសែតជើងចាស់ថៃឈ្មោះ វាសនា ណានួម ដែលបានលើកឡើងថា «ផ្នែកសន្តិសុខថៃលួចអន់ចិត្តនឹងប្រទេសចិន ក្រែងចិន និងថៃជាបងប្អូននឹងគ្នា ប៉ុន្តែចិនសម្រេចចិត្តជ្រើសរើសខាងគាំទ្រអាវុធដល់កម្ពុជា» ទៅវិញ។
នៅក្នុងបទសម្ភាសន៍រវាងស្ត្រីជាអ្នកយកព័ត៌មានជាន់ខ្ពស់ប្រចាំខ្សែត្រៀមកងទ័ពជាមួយនឹងអ្នកសារព័ត៌មានទូរទស្សន៍ PPTVhd36 ពាក់ព័ន្ធនឹងករណីដែលប្រទេសចិនបានប្រគល់រថក្រោះធុន T-59D ឱ្យទៅប្រទេសកម្ពុជា ស្ត្រីរូបនេះបានមើលឃើញ និងវិភាគថា ទោះបីជាខាងការទូតរបស់ថៃព្យាយាមរក្សាតុល្យភាព ដោយមិនជ្រើសរើសខាងរវាងចិន ឬសហរដ្ឋអាមេរិកក៏ដោយ ប៉ុន្តែនៅក្នុងខ្សែភ្នែករបស់ចិន គេអាចនឹងមើលឃើញថា ថៃគឺជាកូនអុក របស់សហរដ្ឋអាមេរិក ទើបចិនសម្រេចចិត្តចាក់ឆ្នោតជ្រើសរើសគាំទ្រខាងកម្ពុជាយ៉ាងពេញទំហឹងបែបនេះ។
នាង វាសនា បានបន្តទៀតថា ទោះបីជារថក្រោះធុន T-59D ត្រូវបានអភិវឌ្ឍឡើងពីម៉ូដែលចាស់ដែលធ្លាប់រក្សាទុកក្នុងឃ្លាំងក៏ដោយ ប៉ុន្តែមុននឹងប្រគល់ដល់ដៃកម្ពុជា ចិនបានធ្វើការកែលម្អទាំងប្រព័ន្ធបាញ់ឱ្យកាន់តែរហ័សនិងចំគោលដៅ បំពាក់ប្រព័ន្ធឡាស៊ែរ ព្រមទាំងប្រព័ន្ធប្រតិបត្តិការនៅពេលរាត្រីផងដែរ។ ហេតុនេះ វាមិនមែនជាយុទ្ធោបករណ៍ហួសសម័យសម្រាប់យកទៅទម្លាក់ចោលក្នុងសមុទ្រធ្វើជាជម្រកត្រី ឬជារថក្រោះចាស់ជំនាន់លោកតាឡើយ ប៉ុន្តែវាជាអាវុធដែលត្រៀមលក្ខណៈប្រើប្រាស់បានជាក់ស្តែង និងជួយបង្កើនសមត្ថភាពដល់កងទ័ពកម្ពុជា អាចធ្វើជាខែលការពារគ្រោះថ្នាក់ដល់ទាហានកម្ពុជា ហើយក៏អាចបង្កគ្រោះថ្នាក់ដល់កម្លាំងទ័ពថៃបានដូចគ្នា។
ជាមួយគ្នានេះ អង្គភាពសន្តិសុខរបស់ថៃបានដាក់ការសន្និដ្ឋានថា ប្រសិនបើចិន និងកម្ពុជាមានកិច្ចព្រមព្រៀង (Deal) រឿងអាវុធជាមួយគ្នាពិតមែន ក្រៅពីរថក្រោះហើយ តើអាចនឹងមានការគាំទ្រនូវយន្តហោះចម្បាំង ឬយុទ្ធោបករណ៍ទំនើបៗផ្សេងទៀតដែរឬទេ?
ផ្ទុយទៅវិញ ថៃបែរជាទទួលបានអាវុធពីចិនក្នុងទម្រង់ជា «ការជំនួញ» តែប៉ុណ្ណោះ។ ជាក់ស្តែងកន្លងមក ថៃបានបញ្ជាទិញដ្រូនបំពាក់អាវុធ (Armed Drone) ពីចិនតាំងពីអំឡុងខែមករា ឆ្នាំ២០២៥ ប៉ុន្តែត្រូវអូសបន្លាយពេលរហូតដល់ខែវិច្ឆិកា ជាងនេះទៅទៀតនោះ គឺទទួលបានតែតួដ្រូនទទេ ដោយខាងចិនអះអាងថាស្ថិតក្នុងដំណាក់កាលផលិត។ កត្តានេះបានបណ្តាលឱ្យការប្រយុទ្ធគ្នាជាមួយកម្ពុជាលើកទី២ ភាគីថៃត្រូវដោះស្រាយស្ថានការណ៍ចំពោះមុខ ដោយការយកគ្រាប់កាំភ្លើងត្បាល់ (គ.) និងគ្រាប់រ៉ុកកែតដែលមានស្រាប់ មកច្នៃដើម្បីប្រើប្រាស់ជាមួយដ្រូននោះជំនួសវិញ។
ហេតុការណ៍ទាំងនេះ ធ្វើឱ្យជារឿយៗអង្គភាពសន្តិសុខថៃមានអារម្មណ៍តូចចិត្ត និងលួចរអ៊ូថា “ក្រែងថាចិននិងថៃជាបងប្អូននឹងគ្នា?” ទាំងដែលថៃខំប្រឹងរក្សាទំនាក់ទំនងនៅចំណុចកណ្តាលរវាងចិន និងសហរដ្ឋអាមេរិក ប៉ុន្តែចិនបែរជាជ្រើសរើសខាងដោយខ្លួនឯងទៅវិញ។
សម្ដីរបស់អ្នកកាសែតរូបនេះ មិនមែនគ្រាន់តែជាការរាយការណ៍ព័ត៌មានធម្មតានោះទេ ប៉ុន្តែវាជា “ការវិភាគបែបបន្ទុះបង្អាប់ និងដាស់អារម្មណ៍ជាតិនិយម បែបជ្រុលនិយម។ ទោះបីជាភាគីថៃ (រដ្ឋាភិបាល) តែងតែចេញមុខបញ្ជាក់ពីទំនាក់ទំនងល្អរវាងថៃ-ចិនយ៉ាងណាក៏ដោយ ប៉ុន្តែការទម្លាយព័ត៌មានផ្ទៃក្នុងរបស់ផ្នែកសន្តិសុខឱ្យអ្នកសារព័ត៌មានដឹងបែបនេះ ភាគីចិនគួរតែពិចារណាឡើងវិញ ថាតើប្រទេសថៃពិតជាមានស្មោះត្រង់ជាមួយនឹងចិនកម្រិតណា ព្រោះសូម្បីតែរឿងផ្ទៃក្នុង ការសម្ងាត់យោធា ឬការទិញដូរអាវុធ បែរជាត្រូវបានអ្នកកាសែតលើកយកមកលាតត្រដាង ហើយរិះគន់ប្រទេសចិនជាសាធារណៈ ដែលជះឥទ្ធិពលអវិជ្ជមានដល់រូបភាពប្រទេសចិនក្នុងខ្សែភ្នែកប្រជាជនថៃដែលខ្វះការពិចារណា និងស្វះស្វែងរកការពិត។ ជាពិសេសគឺការដុតភ្លើង ធ្វើឱ្យស្ថានភាពនៅតាមបណ្ដោយព្រំដែនកម្ពុជាថៃកម្ពុជា ផ្នែកយោធាមានភាពតានតឹង និងប្រុងប្រយ័ត្នដាក់គ្នាកាន់តែខ្លាំង៕
