ពិព័រណ៌ចិន-អាស៊ីខាងត្បូងលើកទី១០ (10th China-South Asia Expo) ត្រូវបានរៀបចំឡើងនៅទីក្រុងគុនមីង ខេត្តយូណាន ប្រទេសចិន ក្នុងគោលបំណងពង្រឹងកិច្ចសហប្រតិបត្តិការ និងការផ្លាស់ប្តូររវាងប្រទេសចិន និងបណ្តាប្រទេសអាស៊ីខាងត្បូង ព្រមទាំងប្រទេសនៅអាស៊ីអាគ្នេយ៍ និងតំបន់ផ្សេងៗទៀត។ កម្មវិធីនេះផ្តោតលើការជំរុញពាណិជ្ជកម្ម ការវិនិយោគ វិទ្យាសាស្ត្រ បច្ចេកវិទ្យា កសិកម្ម វប្បធម៌ និងការតភ្ជាប់សេដ្ឋកិច្ចក្នុងតំបន់។
សូមចុចអាន៖ ផលិតផលខ្មែរចូលរួមតាំងបង្ហាញក្នុងពិព័រណ៌ចិន-អាស៊ីខាងត្បូងលើកទី១០
ពិព័រណ៌នេះមានសាលតាំងបង្ហាញជាច្រើន ដែលប្រមូលផ្តុំផលិតផល និងសេវាកម្មពីបណ្តាប្រទេសចូលរួម។ ប្រទេសដែលមានព្រំដែនជាប់ប្រទេសចិន ដូចជា វៀតណាម ឡាវ មីយ៉ាន់ម៉ា ឥណ្ឌា ប៉ាគីស្ថាន ម៉ុងហ្គោលី រុស្ស៊ី កាហ្សាក់ស្ថាន កៀហ្ស៊ីស៊ីស្ថាន តាជីគីស្ថាន និងនេប៉ាល់ បាននាំយកផលិតផលពិសេសៗរបស់ខ្លួនមកតាំងបង្ហាញ រួមមានផលិតផលកសិកម្ម អាហារ ភេសជ្ជៈ សិប្បកម្ម វាយនភណ្ឌ គ្រឿងប្រើប្រាស់ និងបច្ចេកវិទ្យាទំនើប។
ក្រៅពីការតាំងបង្ហាញផលិតផល ពិព័រណ៌នេះក៏មានការរៀបចំវេទិកាពាណិជ្ជកម្ម កិច្ចប្រជុំផ្គូផ្គងដៃគូអាជីវកម្ម កម្មវិធីសម្ពោធផលិតផលថ្មី និងសកម្មភាពផ្លាស់ប្តូរវប្បធម៌ជាច្រើន។ តាមរយៈព្រឹត្តិការណ៍នេះ ប្រទេសចូលរួមអាចពង្រីកឱកាសពាណិជ្ជកម្ម ស្វែងរកដៃគូវិនិយោគថ្មី និងរួមចំណែកលើកកម្ពស់ការអភិវឌ្ឍសេដ្ឋកិច្ចក្នុងតំបន់ឱ្យកាន់តែរឹងមាំ។
