កំពង់ធំ៖ បុរសម្នាក់បានស្លាប់នៅនឹងកន្លែង បន្ទាប់ពីរថយន្តដឹកកុងតឺន័រមួយគ្រឿង បើករេចង្កូតទៅបុករថយន្ត Tacoma ដែលធ្វើដំណើរបញ្ច្រាសទិសគ្នា លើកំណាត់ផ្លូវជាតិលេខ៦។ហេតុការណ៍ដ៏រន្ធត់នេះ បានកើតឡើងនៅវេលាម៉ោង ១០:៤០នាទី ព្រឹកថ្ងៃទី៥ ខែកក្កដា ឆ្នាំ២០២៦ ត្រង់ចំណុចវាលសសៃ ស្ថិតក្នុងភូមិសូយោង ឃុំសូយោង ស្រុកតាំងគោក ខេត្តកំពង់ធំ។
តាមសមត្ថកិច្ច រថយន្តបង្កម៉ាក FUSO ដឹកកុងតឺន័រ ពាក់ស្លាកលេខ ភ្នំពេញ 3F-8463 និងសឺមីរ៉ឺម៉កលេខ ភ្នំពេញ 4A-9535 បើកបរពីត្បូងទៅជើង ដោយអ្នកបើកបរមិនទាន់ស្គាល់អត្តសញ្ញាណ ហើយបានរត់គេចខ្លួនក្រោយកើតហេតុ។ ចំណែករថយន្តរងគ្រោះម៉ាក Tacoma ពាក់ស្លាកលេខ ភ្នំពេញ 2AB-3231 បើកបរដោយឈ្មោះ វន គឹមឡុង អាយុ ៥៥ឆ្នាំ រស់នៅឃុំសូយោង ស្រុកតាំងគោក ខេត្តកំពង់ធំ បានស្លាប់ភ្លាមៗនៅកន្លែងកើតហេតុ។
ក្រោយកើតហេតុ សមត្ថកិច្ចបានចុះអន្តរាគមន៍សម្រួលចរាចរណ៍ភ្លាមៗ ខណៈការកកស្ទះនៅលើផ្លូវជាតិលេខ៦ បានអូសបន្លាយជិត ៣ម៉ោង។ រថយន្តទាំងពីរគ្រឿងត្រូវបានយកទៅរក្សាទុកនៅអធិការដ្ឋាននគរបាលស្រុកតាំងគោក ដើម្បីបន្តនីតិវិធី។
ជំហានបឋម សមត្ថកិច្ចសន្និដ្ឋានថា គ្រោះថ្នាក់នេះបង្កឡើងដោយអ្នកបើកបររថយន្ត FUSO បើកបរខ្វះការប្រុងប្រយ័ត្ន រេចង្កូតចូលគន្លងផ្លូវម្ខាងទៀត ទៅបុករថយន្ត Tacoma ដែលកំពុងបើកបរត្រឹមត្រូវតាមគន្លងរបស់ខ្លួន។
