នាព្រឹកថ្ងៃចន្ទ ទី៦ ខែកក្កដា ឆ្នាំ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) និងជាប្រធានក្រុមប្រឹក្សាជាតិភស្តុភារកម្ម បានដឹកនាំកិច្ចប្រជុំពិភាក្សាជាមួយសភាពាណិជ្ជកម្មអឺរ៉ុបប្រចាំនៅកម្ពុជា (EuroCham) ដឹកនាំដោយលោក Tassilo Brinzer ក្នុងគោលបំណងធ្វើឱ្យប្រសើរឡើងនូវប្រព័ន្ធដឹកជញ្ជូន និងវិស័យភស្តុភារកម្មជាតិ។
នៅក្នុងកិច្ចប្រជុំដែលមានការចូលរួមពីក្រសួង-ស្ថាប័នពាក់ព័ន្ធ និងតំណាងវិស័យឯកជន រួមមានក្រុមហ៊ុនផ្លូវល្បឿនលឿន ភ្នំពេញ-ព្រះសីហនុ និងក្រុមហ៊ុនរថភ្លើង Royal Railway ឯកឧត្តមឧបនាយករដ្ឋមន្ត្រី បានផ្តល់អនុសាសន៍ណែនាំ និងការចង្អុលបង្ហាញសំខាន់ៗ ក្នុងការដោះស្រាយបញ្ហាប្រឈម និងកង្វល់នានារបស់ EuroCham សំដៅលើកកម្ពស់ប្រសិទ្ធភាពខ្សែច្រវាក់ផ្គត់ផ្គង់ ក្នុងគោលដៅយុទ្ធសាស្ត្រប្រែក្លាយកម្ពុជាឱ្យទៅជាមជ្ឈមណ្ឌលភស្តុភារកម្មដ៏មានភាពប្រកួតប្រជែងខ្ពស់មួយនៅក្នុងតំបន់។
ទន្ទឹមនឹងនេះ អង្គប្រជុំក៏បានពិនិត្យមើលវឌ្ឍនភាពបច្ចេកវិទ្យានៃកំពង់ផែស្វយ័តក្រុងព្រះសីហនុ (ក.ស.ស.) ដែលក្នុងឆ្នាំ២០២៦ នេះ កម្មវិធីទូរស័ព្ទដៃ PASNet ត្រូវបានធ្វើសមាហរណកម្មភ្ជាប់ជាមួយប្រព័ន្ធទិន្នន័យគយស្វ័យប្រវត្តិ ASYCUDA ដើម្បីសម្រួលល្បឿនប្រតិបត្តិការជូនអតិថិជន និងអ្នកដឹកជញ្ជូន។
បន្ទាប់ពីកិច្ចប្រជុំ ឯកឧត្តមឧបនាយករដ្ឋមន្ត្រី បានបន្តដឹកនាំប្រតិភូចុះពិនិត្យប្រតិបត្តិការផ្ទាល់ (Site Visit) នៅក្នុងបរិវេណកំពង់ផែស្វយ័តក្រុងព្រះសីហនុ ដើម្បីវាយតម្លៃពីសមត្ថភាពជាក់ស្តែង និងវឌ្ឍនភាពហេដ្ឋារចនាសម្ព័ន្ធបច្ចេកទេស ក្នុងការឆ្លើយតបទៅនឹងកំណើននៃទំហំពាណិជ្ជកម្មអន្តរជាតិរបស់កម្ពុជា៕
