ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ គឺជាប្រធានសហព័ន្ធកីឡាបាល់ទះកម្ពុជា បានផ្ញើសារអបអរសាទរ ដល់ក្រុមកីឡាបាល់ទះបុរសជម្រើសជាតិកម្ពុជា ដែលដណ្តើមបានពានជាប្រវត្តិសាស្រ្ត ក្នុងជើងឯកតំបន់អាស៊ាន SEA V-CUP លើកទី៦ ជើងទី១ ឆ្នាំ២០២៦។
ឯកឧត្តមអភិសន្តិបណ្ឌិត ស សុខា ប្រធានសហព័ន្ធកីឡាបាល់ទះកម្ពុជា បានបង្ហោះសារនៅហ្វេសបុកថា៖ សូមអបអរសាទរក្រុមកីឡាបាល់ទះបុរសជម្រើសជាតិកម្ពុជា បានយកឈ្នះឥណ្ឌូណេស៊ី ក្នុងវគ្គផ្តាច់ព្រ័ត្រ ពានរង្វាន់ SEA V-CUP លើក ទី៦ ជើងទី១ ដោយលទ្ធផល ៣សិតទល់២ នៅថ្ងៃអាទិត្យ ទី១៩ ខែកក្កដា ឆ្នាំ២០២៦ ក្នុងសលបាល់ទះ Candon City Arena ប្រទេសហ្វីលីពីន។
ឯកឧត្តមប្រធាន បានបន្ថែមថា ទន្ទឹមនឹងការអបអរសាទរជាមួយមហាគ្រួសារបាល់ទះកម្ពុជា ក្នុងនាមជាប្រធានសហព័ន្ធកីឡាបាល់ទះកម្ពុជា ខ្ញុំសូមថ្លែងអំណរគុណជាពិសេសដល់ប្រតិភូ ក្រុមការងារគ្រូបង្វឹក និងប្អូនៗកីឡាករ ដែលបានខិតខំប្រឹងប្រែងប្រកួតតាំងពីវគ្គចែកពូល រហូតដណ្តើមបានជើងឯកតំបន់អាស៊ាន SEA V-CUP ជូនជាតិមាតុភូមិ។
ឯកឧត្តមប្រធាន បានបញ្ជាក់ថា ការគាំទ្ររបស់ជនរួមជាតិ ទាំងក្នុងនិងក្រៅប្រទេស ពុកម៉ែ បងប្អូនទាំងអស់ មិនថាអញ្ជើញលើកទឹកចិត្តកីឡាករយើង នៅទីលានផ្ទាល់ ឬទស្សនាតាមប្រព័ន្ធផ្សព្វផ្សាយនានាទេ គឺជាកម្លាំងខ្មែរតែមួយ ជួយពីក្រោយខ្នង។ សម្រាប់វិញ្ញសាបាល់ទះបុរសរបស់យើង បានបញ្ចប់ពាក្យថា«ប្រជាជនតិចជាង ផ្ទៃដីតូចជាង» ដែលជារនាំងថាយើងមិនអាចធ្វើបាន។
គួរបញ្ជាក់ថា ក្រុមកីឡាករ និងគ្រូបង្វឹករបស់យើង នឹងបន្តបេសកកម្មការប្រកួត SEA V-CUP លើកទី៦ ជើងទី២ ឆ្នាំ២០២៦ នៅឥណ្ឌូណេស៊ី ចាប់ពីថ្ងៃទី២២ ដល់ថ្ងៃទី២៦ ខែកក្កដា ឆ្នាំ២០២៦។
- ថ្ងៃទី២២ ខែកក្កដា ឆ្នាំ២០២៦ ប៉ះឥណ្ឌូណេស៊ី ម៉ោង ៧:០០យប់
- ថ្ងៃទី២៣ ខែកក្កដា ឆ្នាំ២០២៦ ប៉ះហ្វីលីពីន ម៉ោង ៧:០០យប់៕
