ភ្នំពេញ៖ សាលារៀនហ្គ្រែនវីយូ (Grandview School) បានរៀបចំ «ពិធីបញ្ចប់ឆ្នាំសិក្សា ២០២៥-២០២៦» ព្រមទាំងពិធីប្រគល់វិញ្ញាបនបត្របញ្ចប់ភូមិសិក្សា និងប័ណ្ណសរសើរជូនដល់សិស្សានុសិស្សឆ្នើម ចំនួន២ថ្នាក់ គឺថ្នាក់មត្តេយ្យកំរិត៣ និង ថ្នាក់ទី៣ សរុបទាំងអស់ ៨០នាក់ ស្រី៥៣នាក់ ដែលប្រព្រឹត្តទៅនៅថ្ងៃទី២៤ ខែកក្កដា ឆ្នាំ២០២៦ នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ស្ថិតក្នុងបរិវេណវិទ្យាស្ថានភាសាបរទេស (IFL)។
ព្រឹត្តិការណ៍ដ៏មានអត្ថន័យនេះ រៀបចំឡើងដើម្បីអបអរសាទរនូវសមិទ្ធផលសិក្សា និងការខិតខំប្រឹងប្រែងរបស់សិស្សានុសិស្សគ្រប់កម្រិតសិក្សា ឆ្នាំសិក្សាកន្លងមក ដោយមានការចូលរួមពីសំណាក់គណៈអធិបតី ភ្ញៀវកិត្តិយស លោកគ្រូ អ្នកគ្រូ មាតាបិតា និងសិស្សានុសិស្សយ៉ាងច្រើនកុះករ។
នៅក្នុងពិធីដ៏អធិកអធមនេះ អាណាព្យាបាល មាតាបិតា បានបង្ហាញពីអារម្មណ៍រំភើបរីករាយ ក្នុងថ្ងៃជោគជ័យរបស់កូនៗ ដែលជាថ្ងៃដ៏មានន័យ និងពោរពេញដោយស្នាមញញឹម បន្ទាប់ពីបានឃើញកូនៗជាទីស្រឡាញ់ ឡើងទទួល វិញ្ញាបនបត្របញ្ចប់ការសិក្សា ដោយជោគជ័យនៅ សាលារៀនហ្គ្រែនវីយូ (Grandview School)។ ក្នុងនាមជាឪពុកម្តាយ គ្មានអ្វីដែលធ្វើឱ្យយើងមានសេចក្តីសុខ និងមោទនភាពជាងការបានឃើញការលូតលាស់ ទាំងចំណេះដឹង សីលធម៌ និងភាពក្លាហានរបស់កូនៗក្នុងថ្ងៃនេះឡើយ។
ពេលវេលាកន្លងផុតទៅយ៉ាងរហ័ស ពីក្មេងតូចៗដែលធ្លាប់តែអៀនប្រៀន និងកាន់កាបូបដើរចូលសាលាដំបូងៗ ពេលនេះពួកគេគឺជាយុវជន-យុវតីដែលមានភាពជឿជាក់ និងមានមូលដ្ឋានគ្រឹះចំណេះដឹងយ៉ាងរឹងមាំ។ ការទទួលបានវិញ្ញាបនបត្រនាថ្ងៃនេះ មិនត្រឹមតែជាលទ្ធផលនៃការខិតខំប្រឹងប្រែង រៀនសូត្រយប់ថ្ងៃរបស់កូនៗប៉ុណ្ណោះទេ ប៉ុន្តែជាការបើកទំព័រថ្មីនៃជីវិតឆ្ពោះទៅរកក្តីស្រមៃដ៏សមប្រកបនាពេលអនាគត។
ក្នុងនោះដែរ អាណាព្យាបាល មាតាបិតា បានលើកឡើងថា ភាពជោគជ័យរបស់កូនៗនៅថ្ងៃនេះ មិនអាចកាត់ផ្តាច់ចេញពីការលះបង់ និងការយកចិត្តទុកដាក់ខ្ពស់របស់សាលា សាលារៀនហ្គ្រែនវីយូ (Grandview School)
លោកគ្រូ-អ្នកគ្រូ ដែលបានផ្ទេរចំណេះដឹង ប្រៀបដូចជាអាណាព្យាបាលទីពីរ ប្រៀមប្រដៅដោយក្តីស្រឡាញ់ ភាពអត់ធ្មត់ និងបំផុសគំនិតច្នៃប្រឌិតដល់កូនៗ។
ថ្លែងក្នុងពិធពិធីប្រគល់សញ្ញាបត្រ និងប័ណ្ណសរសើរជូនដល់សិស្សានុសិស្សឆ្នើមលោកស្រី អំ គន្ធី នាយិកាសាលា រៀនហ្គ្រែនវីយូ (Grandview School) បានមានប្រសាសន៍ថា៖ « សេចក្តីសុខចេញមកតាមរយៈស្នាមញញឹមរបស់លោកប៉ា អ្នកម៉ាក់ ក៏ដូចជាកូនៗទាំងអស់គ្នា ហើយអ្នកគ្រូវិញក៏មានសេចក្តីសុខជាពន់ពេកណាស់ ដែលបានរៀបចំ ក៏ដូចជាចូលរួមនៅក្នុងកម្មវិធីដ៏ពិសេសវិសាលរបស់កូនៗ នាថ្ងៃនេះ។
លោកស្រី អំ គន្ធី បានបន្តថា នេះគឺជាឆ្នាំទី៥ ពេញលេញរបស់សាលារៀនហ្គ្រែនវីយូ ដែលយើងរៀបចំកម្មវិធីទទួលវិញ្ញាបនបត្របញ្ចប់ភូមិសិក្សា ពាក់កណ្តាលភូមិសិក្សា និងប្រគល់ពានរង្វាន់សិស្សពូកែជូនដល់កូនៗទាំងអស់គ្នា។ អ្នកគ្រូសប្បាយចិត្តខ្លាំង ពេលឃើញវត្តមានរបស់លោកប៉ា អ្នកម៉ាក់ លោកបានចំណាយពេលវេលាដ៏មានតម្លៃ ចូលរួមនៅក្នុងកម្មវិធីរបស់សាលា។ ការចូលរួមរបស់លោកប៉ា អ្នកម៉ាក់ គឺជាផ្តល់កិត្តិយសខ្លាំង និងមានតម្លៃព្រោះថាកូនៗបន្ទាប់ពីការរៀនសូត្រជាមួយលោកគ្រូ អ្នកគ្រូហើយ គាត់ពិតជាត្រូវការការជួយជ្រោមជ្រែងពីសំណាក់លោកប៉ា អ្នកម៉ាក់។
លោកស្រីនាយិកា បានវន្ថែមថា សម្រាប់ឆ្នាំសិក្សា២០២៥-២៦ យើងមានកម្មវិធីមួយដែលថ្មី ទើបតែដាក់ចូលឆ្នាំសិក្សានេះដែរ គឺកម្មវិធីសិក្សាហែលទឹករៀបចំឡើងគឺដើម្បីជួយឱ្យកូនៗគាត់មានជំនាញជួយខ្លួនឯងនៅពេលដែលគាត់ទៅតំបន់ណាដែលមានទឹក ឬក៏កន្លែងណាដែលមានទឹកជំនន់កើតឡើង ក៏ដូចជាជួយសង្គ្រោះជីវិតអ្នកដទៃ។
សម្រាប់គម្រោង ឬក៏ផែនការសម្រាប់ឆ្នាំសិក្សាថ្មីសាលារៀន ហ្គ្រែនវីយូ នឹងបន្ថែមកម្មវិធីចំនួន៣ ជូនកូនៗ៖
កម្មវិធីទី១ គឺកម្មវិធីភាសាចិន កម្មវិធីទី២ ទាក់ទងជាមួយនិងបំណិនជីវិត គឺកម្មវិធីរៀនចំអិនម្ហូប។
កម្មវិធីទី៣ មួយទៀតគឺកម្មវិធីរៀនតន្ត្រី។
លោកស្រីនាយិកា បានបញ្ជាក់ថា ការបញ្ចូលកម្មវិធីទាំងនេះ ដើម្បីឱ្យកូនៗមានពេលវេលាសម្រាកខួរក្បាល កំពុងតែគិតពីការសិក្សាប្រចាំថ្ងៃ អាចមានពេលបង្កើតពេលវេលាល្អៗជាមួយមិត្តភក្តិក្នុងថ្នាក់រៀន។ ដោយឡែកសម្រាប់មុខវិជ្ជាចំអិនម្ហូបនេះគឺសំខាន់ខ្លាំងណាស់ នៅពេលដែលកូនៗរៀនចប់ថ្នាក់ទី១២ ហើយគាត់ចង់បន្តទៅសាកលវិទ្យាល័យនៅក្រៅប្រទេស គាត់ត្រូវតែចេះចំអិនម្ហូប ហើយក៏អាចជាការជួយកាត់បន្ថយបន្ទក់ម៉ាក់ប៉ា ពិសេសចំណេញទាំងសុខភាព ចំណេញទាំងថវិកា។
ក្នុងនោះដែល Teacher Richard ដែលជាគ្រូបរទេសនៅសាលារៀនហ្គ្រែនវីយូ (Grandview School) បានបង្ហាញអារម្មណ៍ពោរពេញទៅដោយភាពសប្បាយរីករាយ មោទនភាព និងបានទទួលស្គាល់នូវការខិតខំប្រឹងប្រែង ការលូតលាស់ និងសមិទ្ធផលក្នុងរយៈពេលមួយឆ្នាំ។ លោកអរគុណយ៉ាងជ្រាលជ្រៅចេញពីចិត្តចំពោះអាណាព្យាបាល និងលោកគ្រូអ្នកគ្រូទាំងអស់ ដែលអត់ធ្មត់ លើកទឹកចិត្ត និងការប្តេជ្ញាចិត្តរបស់អស់លោកអ្នកក្នុងការណែនាំសិស្សានុសិស្សងគ្រប់ជំហាន។ ជោគជ័យរបស់ពួកគេនៅថ្ងៃនេះ គឺជាការឆ្លុះបញ្ចាំងពីការយកចិត្តទុកដាក់ និងការគាំទ្រដែលលោកគ្រូ អ្នកគ្រូ បានផ្តល់ឱ្យពេញមួយឆ្នាំ។
Teacher Richard បានសម្ដែងការអបអរសាទរចំពោះការសម្រេចបាននូវជោគជ័យដ៏សំខាន់ ដែលកើតចេញពីការប្តេជ្ញាចិត្ត ភាពអត់ធ្មត់ និងឆន្ទៈរបស់កូនៗក្នុងការរៀនសូត្រ ផងដែរ។ ការសិក្សាភាសាអង់គ្លេស ព្រមទាំងការអភិវឌ្ឍជំនាញភាសាខ្មែរ និងភាសាចិនបន្ថែមទៀតនោះ គឺជាសមិទ្ធផលដ៏អស្ចារ្យដែលទាមទារឱ្យមានការប្តេជ្ញាចិត្ត និងភាពអត់ធ្មត់ខ្ពស់។ ក្នុងរយៈពេលមួយឆ្នាំកន្លងមកនេះ កូនៗបានលូតលាស់លើច្រើនវិស័យ បានពង្រឹងចំណេះដឹង បង្កើនទំនុកចិត្ត រៀនដោះស្រាយបញ្ហា សហការគ្នាក្នុងថ្នាក់ និងបង្កើតមិត្តភាពដែលធ្វើឱ្យជីវិតសិក្សាមានន័យ។ សមិទ្ធផលទាំងនេះមានសារៈសំខាន់មិនចាញ់មេរៀនដែលមានក្នុងថ្នាក់ឡើង។
ជាចុងបញ្ចប់អាណាព្យាបាល មាតាបិតា បានថ្លៃអំណរគុណដល់គណៈគ្រប់គ្រងសាលា ដែលបានបង្កើតបរិយាកាសសិក្សាដ៏ល្អប្រសើរ បំពាក់ដោយកម្មវិធីសិក្សាទាន់សម័យ និងការយកចិត្តទុកដាក់លើសុវត្ថិភាព និងការលូតលាស់ផ្នែកផ្លូវចិត្តរបស់សិស្សគ្រប់រូប។ ទោះបីជាត្រូវឈានជើងចូលវគ្គថ្មីនៃការសិក្សា ឬដំណើរជីវិតនាពេលខាងមុខបែបណាក៏ដោយ អាណាព្យាបាល មាតាបិតាបានបង្ហាញភាពជឿជាក់លើសសាលារៀនហ្គ្រែនវីយូ (Grandview School) និងអាចនាំយកនូវការអប់រំដ៏ល្អ ឈានទៅរកការកសាងអនាគតឱ្យរស្មីភ្លឺស្វាង។
សាលារៀនបង្កើតឡើងនៅឆ្នាំ២០២០ រហូតដល់ពេលនេះមានរយៈពេល ៦ឆ្នាំ ។ នេះជាការទទួលវិញ្ញាបនបត្របញ្ចប់ភូមិសិក្សាលើកទី ៥ផងដែរ ដោយសារសាលាកាត់ឆ្នាំទទួលសញ្ញាបត្រសម័យកូវីដ។
សម្រាប់ព័ត៌មានលម្អិត លោក លោកស្រី អាចអញ្ជើញមកសាលាផ្ទាល់ដើម្បីសាកសួរព័ត៌មាន ឬ ទំនាក់ទំនងតាមលេខទូរស័ព្ទ (+855)70/78 438 439
ទីតាំងសាលា: https://maps.app.goo.gl/skDbANHF5stk1nE18
អាសយដ្ឋាន: #250, Street 201, Sangkat Kilometer 6, Phnom Penh
