កំណើនគ្រោះថ្នាក់ចរាចរណ៍ផ្លូវគោកនៅតាមដងផ្លូវនានានៅទូទាំងប្រទេសក្នុងឆមាសទី១ ឆ្នាំ២០២៦នេះ បាននិងកំពុងបង្កជាក្តីបារម្ភសម្រាប់កម្ពុជា ហើយដែលបានជំរុញឲ្យ រដ្ឋមន្ត្រីក្រសួងមហាផ្ទៃ ឯកឧត្តមអភិសន្តិបណ្ឌិត ស សុខា គោរពស្នើសុំគោលការណ៍អនវុត្តច្បាប់ចរាចរណ៍ផ្លូវគោកឡើងវិញពិសេសនៅតាមបណ្តារាជធានីខេត្តដែលមានតួលេខគ្រោះថ្នាក់ចរាចរណ៍ខ្ពស់។
ជាក់ស្តែង តាមរយៈលិខិតរបស់ក្រសួងមហាផ្ទៃចុះថ្ងៃទី៣០ខែកក្កដាឆ្នាំ២០២៦នេះ រដ្ឋមន្ត្រីក្រសួងមហាផ្ទៃបានជម្រាបជូននាយករដ្ឋមន្ត្រីថា នៅក្នុងឆមាសទី១ឆ្នាំ២០២៦នេះ ករណីគ្រោះថ្នាក់ចរាចរណ៍ផ្លូវគោកនៅទូទាំងប្រទេសបានកើនឡើងគួរឲ្យកត់សម្គាល់។ ធៀបនឹងរយៈពេលដូចគ្នានៃឆ្នាំ២០២៥ គ្រោះថ្នាក់ចរាចរណ៍ផ្លូវគោកមានកំណើន ២១៣លើក ស្មើ២០% (១ ១២៩លើក លើ ១០៦២លើក) ចំនួនអ្នកស្លាប់មានកំណើន ៧៩នាក់ ស្មើ១១% (៧៧៣នាក់ លើ ៦៩៤នាក់) និងចំនួនអ្នករបួសមានកំណើន ៤៦៨ នាក់ ស្មើ៣២% (១ ៩៤៤នាក់ លើ ១ ៤៧៦នាក់)។
រដ្ឋមន្ត្រីក្រសួងមហាផ្ទៃបានកត់សម្គាល់ដែរថាចំពោះគ្រោះថ្នាក់ទាំងនេះ បានកើតឡើងដោយមូលហេតុ ការបើកបរហួសល្បឿនលឿន៤៦% ការមិនគោរពសិទ្ធិអាទិភាព ២២% ការមិនប្រកាន់ស្តាំ១២% ការវ៉ាជែង៧% ការបើកបរមិនប្រយ័ត្នចំនួន៦% ការបើកបរក្នុងស្ថានភាពស្រវឹង៥% ការមិនគោរពសញ្ញាចរាចរណ៍ ២% និងកត្តាយានជំនិះ១%។
បើតាមរដ្ឋមន្ត្រីក្រសួងមហាផ្ទៃ ភាគច្រើនលើសលប់នៃការព្យួរគ្រោះថ្នាក់ គឺបណ្តាលមកពីកត្តាអ្នកបើកបរយានយន្តមិនគោរពច្បាប់ ឬធ្វេសប្រហែស ដែលអាចបញ្ជាក់បានថា ស្មារតីអ្នកបើកបរ ខ្លាចនគរបាល ជាងខ្លាចច្បាប់។
ជាការកត់សម្គាល់ ប៉ុន្មានឆ្នាំចុងក្រោយនេះ ការពង្រឹងការអនុវត្តច្បាប់របស់នគរបាលចរាចរណ៍ត្រូវបានធ្វើឡើងជាប់ជាបន្តបន្ទាប់និងជាប់ជាប្រចាំលើកឡើងតែក្នុងអំឡុងពេលដែលកម្ពុជារងគ្រោះដោយសារសង្គ្រាមឈ្លានពានពីក្រុមយោធាថៃ និងក្រោយមក ស្ថានភាពដែលកម្ពុជារងផលប៉ះពាល់ដោយសារវិបត្តិសកលតែប៉ុណ្ណោះ។តាមការកត់សម្គាល់ ការផ្អាកការអនុវត្តច្បាប់ចរាចរណ៍នេះ ធ្វើឲ្យអ្នកបើកបរក្នុងចំនួនកាន់តែច្រើនឡើងមានការធ្វេសប្រហែស បើកបរដោយខ្វះការទទួលខុសត្រូវដូចជាបើកបរក្នុងល្បឿនលឿនដែលច្បាប់អនុញ្ញាត ផ្ទុកលើសទម្ងន់រួមទាំងបើកបរក្រោមឥទ្ធិពលនៃគ្រឿងស្រវឹងជាដើម។
ជាមួយគ្នានេះ បើយើងពិនិត្យមើលទៅលើស្ថានភាពនៃគ្រោះថ្នាក់វិញ យើងឃើញថា មានហេតុការគ្រោះថ្នាក់ដែលមានលក្ខណៈធ្ងន់ធ្ងរបណ្តាលឲ្យមានជនរងគ្រោះជាច្រើននាក់ក្នុងពេលតែមួយ ខណៈដែលជនបង្កខ្លះដែលជាអ្នកមានយសស័ក្តិឬក្រុមគ្រួសារអ្នកមាន បានរត់គេចវេសពីការទទួលខុសត្រូវ ស្របពេលដែលការអនុវត្តច្បាប់របស់សមត្ថកិច្ចពេលខ្លះត្រូវបានមហាជនរិះគន់ថា មានភាពលម្អៀងរវាងអ្នកមាននិងអ្នកក្រជាដើម។ក្នុងន័យនេះ បង្ហាញថា ជាចំណុចចន្លោះប្រហោងរបស់សមត្ថកិច្ចអនុវត្តច្បាប់ ហើយដែលមហាជនទាមទរឲ្យមានការកែប្រែផងដែរ ដើម្បីធានាយុត្តិធម៌សង្គមយោងតាមស្មារតីនៃ រដ្ឋធម្មនុញ្ញដែលបានកត់កំណត់ថា ពលរដ្ឋទាំងអស់ គឺស្មើគ្នានៅចំពោះមុខច្បាប់ មានន័យថា បើនរណាម្នាក់ប្រព្រឹត្តខុសគឺត្រូវប្រឈមមុខនៅចំពោះមុខច្បាប់ដូចគ្នាមិនថា អ្នកនោះមានឋានៈ បុណ្យស័ក្តិ យ៉ាងណានោះទេ។
ទន្ទឹមនឹងនេះ ពលរដ្ឋដែលជាអ្នកប្រើប្រាស់មធ្យោបាយយានជំនិះគ្រប់ប្រភេទ ក៏ល្មមដល់ពេលដែលត្រូវចូលរួមគោរពច្បាប់ឲ្យបានគត់មត់ជាប្រចាំ ដើម្បីសុវត្ថិភាពផ្ទាល់ខ្លួននិងអ្នកដទៃផងដែរ។សូម កុំគោរពច្បាប់តែនៅនឹងមុខនគរបាលចរាចរណ៍។ សង្គមមួយដែលមានសណ្តាប់ធ្នាប់ល្អ គឺផ្តើមចេញពីពលរដ្ឋគ្រប់រូបមានសីលធម៌ល្អក្នុងការរស់នៅ ចេះគោរពច្បាប់សង្គម និងវៀរចាកនូវទង្វើទាំងឡាយណាដែលនាំឲ្យសង្គមមានបញ្ហា។
ដូច្នេះអំណើះតទៅ មិនមែនជាពេលដែលត្រូវបន្ទោសគ្នានោះឡើយ ប៉ុន្តែជាពេលវេលាដែលត្រូវរួមគ្នាគោរពនិងអនុវត្តច្បាប់សង្គមក្នុងនោះមានទាំងច្បាប់ស្តីពីចរាចរណ៍ផ្លូវគោកដើម្បីលើកមុខមាត់និងសេចក្តីថ្លៃថ្នូររបស់សង្គមពិសេសកាត់បន្ថយគ្រោះថ្នាក់ចរាចរណ៍ ដែលជាឃាតករដ៏កាចសាហាវសម្ងំលាក់ខ្លួនចាំផ្តាច់ជីវិតអ្នកធ្វើដំណើរនៅតាមដងផ្លូវជារៀងរាល់ថ្ងៃ។សូមចូលរួមលើកកម្ពស់ទិសស្លោក “ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍”។គួររួមគ្នាលើកកម្ពស់វប្បធម៌គោរពច្បាប់ ឲ្យបានខ្លាំងក្លាជាងវប្បធម៌ខ្លាចប៉ូលិស៕
