កាលពីljថ្ងៃទី៤ ខែសីហា ឆ្នាំ២០២៦ សហព័ន្ធកីឡាបាល់ទះកម្ពុជា បានរៀបចំពិធីសំណេះសំណាល និងពិសាអាហារសាមគ្គីជាមួយក្រុមកីឡាបាល់ទះជម្រើសជាតិកម្ពុជា ដែលដណ្តើមបានជើងឯក ក្នុងការប្រកួតពាន់រង្វាន់ SEA V CUP លើកទី៦ នៅសាធារណរដ្ឋហ្វីលីពីន នៅសណ្ឋាគារ Hyatt Regency រាជធានីភ្នំពេញ។
ពិធីសំណេះសំណាល និងពិសាអាហារសាមគ្គី មានការអញ្ញើញជាអធិបតី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានសហព័ន្ធកីឡាបាល់ទះកម្ពុជា អ្នកឧកញ៉ា លាង ម៉េង សហស្ថាបនិកក្រុមហ៊ុន វើក គ្រូបង្វឹក កីឡាករ ក្រុមការងារសហព័ន្ធ រួមជាមួយបងប្អូនអ្នកសារព័ត៌មានជាច្រើន។
អ្នកឧកញ៉ា លាង ម៉េង សហស្ថាបនិកក្រុមហ៊ុន វើក បានបង្ហាញអារម្មណ៍រីករាយ និងមានមោទនភាពដែលបានចូលរួមពិធីជប់លៀងសំណេះសំណាលជាមួយក្រុមបាល់ទះជម្រើសជាតិកម្ពុជា និងស្វាគមន៍ការវិលត្រឡប់មកកាន់មាតុភូមិវិញ ប្រកបដោយកិត្តិយស និងជ័យជំនះដ៏អស្ចារ្យក្នុងការដណ្តើមបានពានជើងឯក SEA V.Cup លើកទី៦ ជើងទី១ នៅប្រទេសហ្វីលីពីន។
អ្នកឧកញ៉ា លាង ម៉េង បានបន្តថា សមិទ្ធផលប្រវត្តិសាស្ត្រនេះ កើតមានឡើងបានដោយសារការចង្អុលបង្ហាញទិសយ៉ាងខ្ពង់ខ្ពស់ប្រកបដោយចក្ខុវិស័យពី ឯកឧត្តម សន្តិបណ្ឌិត ស សុខា ឧបនាយករដ្ឋមន្ត្រី ព្រមទាំងការដឹកនាំការងារប្រតិបត្តិយ៉ាងសកម្មរបស់ លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការ និងក្រុមការងារទាំងអស់។ ជ័យជំនះដ៏អស្ចារ្យនេះ គឺជានិមិត្តរូបដ៏មានតម្លៃសម្រាប់វិស័យកីឡាបាល់ទះកម្ពុជា ដែលបានចារឈ្មោះក្នុងប្រវត្តិសាស្ត្រ លើកពានរង្វាន់ថ្នាក់តំបន់។ សមិទ្ធផលនេះមិនត្រឹមតែជាមោទនភាពរបស់កីឡាករ គ្រូបង្វឹក និងថ្នាក់ដឹកនាំសហព័ន្ធប៉ុណ្ណោះទេ ប៉ុន្តែជាមោទនភាពរួមរបស់ប្រជាជនទាំងមូល ដែលបានឃើញទង់ជាតិកម្ពុជាបង្ហាញវត្តមានយ៉ាងមានកិត្តិយសនៅលើឆាកអន្តរជាតិ។
អ្នកឧកញ៉ា លាង ម៉េង បានរំលេចថា៖ ខ្ញុំបានសួរ បងឯកឧត្តមអភិ រឿងកីឡាករជម្រើសជាតិយើង បើសិនជាទទួលបានមេដាយមាស SEA Games មែន ខ្ញុំឱ្យ ២គីឡូ ហើយ ខ្ញុំសូមជប់លៀង ២ថ្ងៃទៀត ថ្ងៃសៅរ៍ និងអាទិត្យ។ ដោយសារកន្លែងនេះចង់សូមឱ្យកីឡាករយើងទាំងអស់គិតថា យើងលែងជាគ្រួសារ លេីសពីមនុស្ស ប្រជាជនយើងទាំងមូល បើយើងគិតថាតែគ្រួសារ មកគ្រាន់តែហាត់ដើម្បីយកប្រាក់ខែ ឬមួយចូលក្លឹបហ្នឹង គឺមិនអាចជ័យជំនះបានទេ។ ត្រូវគិតថាធ្វើម៉េចយកមុខមាត់ជាតិឱ្យបាន! ដូចខ្ញុំចឹង ការពិតទៅត្រូវជួយឧបត្ថម្ភថវិកា ៥០លានរៀលទេ តែមើលទៅរន្ធត់ និងជក់ចិត្ត ចឹងឱ្យ ១០០លានហ្មងទៅ។
តាមការឧបត្ថម្ភជាបន្តបន្ទាប់ បង្ហាញច្បាស់ពីការកោតសរសើរ និងគាំទ្រយ៉ាងពេញទំហឹង ចំពោះការខិតខំប្រឹងប្រែង ស្មារតីតស៊ូ គ្រូបង្វឹក និងថ្នាក់ដឹកនាំទាំងអស់ ដែលបានចូលរួមនូវមោទនភាព និងកិត្តិយសដ៏ធំធេងជូនមាតុភូមិ។ ត្បិតតែយើងមិនអាចដណ្តើមជើងឯកទាំង ២ជើង ក៏មហាជន ជាពិសេសអ្នកគាំទ្រ នៅតែបន្តគាំទ្រ និងឱ្យតម្លៃការខិតខំប្រឹងប្រែង ឆន្ទៈមុតមាំ និងស្មារតីតស៊ូរបស់កីឡាករគ្រប់រូប។ នេះហើយជាអ្វីដែលយើងមានមោទនភាពបំផុត។
ថ្លែងក្នុងពិធីសំណេះសំណាល និងពិសាអាហារសាមគ្គី ឯកឧត្តមអភិសន្តិបណ្ឌិត ស សុខា បានមានប្រសាសន៍ថា អ្វីដែលយើងឃើញនៅលើតុគឺជាស្នាដៃ ៦០ឆ្នាំ សមទ្ធផលទាំងអស់នេះ គឺជាសមិទ្ធផលហួសពីការរំពឹងទុក ក្នុយរយ:ពេលប្រមាណជា ៥ឆ្នាំចុងក្រោយនេះ។ ឯកឧត្តមអភិសន្តិបណ្ឌិត បានបន្តថាដើម្បីទទួលភាពជោគជ័យជូនជាតិបន្តទៀត ការលះបង់តែមួយម៉ាត់គត់មិនគ្រប់គ្រាន់ទេ គឺត្រូវមានវិន័យ ដូចនេះកីឡាករដែលមានជំនឿលើសហព័ន្ធ គឺត្រូវលះបង់ និងថែទាំសុខភាព ទាំងបាល់ទាត់និងបាល់ទះ។
ឯកឧត្តមអភិសន្តិបណ្ឌិត ស សុខា មានប្រសាសន៍បន្ថែមថា ពេលនេះ ឬថ្ងៃមុនក៏ដោយកីឡាករពេលទទួលបានប្រាក់ឧបត្ថម្ភកុំស៊ីម្ដងឱ្យអស់ និងត្រូវបន្តខិតខំប្រឹងប្រែងជាប្រចាំ។ ឯកឧត្តមអភិ ក៏បានសូមអធ្យាស្រ័យដែលពេលកន្លងមកក្រុមជម្រើសជាតិមួយចំនួនចេញតែពីក្លិបវិសាខា ដោយសារតែមានការប្រមូលផ្ដុំ ប៉ុន្តែទៅមុខទៀតយើងអត់បិទទ្វា ពាក្យសហព័ន្ធកឺសហព័ន្ធដើម្បីជាតិ មិនមែនដើម្បីខ្ញុំម្នាក់ ឬដើម្បីក្រុមបាល់ទះណាមួយឡើយ។ ដូចនេះកីឡាករដែលមានឆន្ទ:ការលះបង់ យើងនឹងជ្រើសរើសនៅពេលខាងមុខ។
លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា ក៏បានលើកឡើងពី សមិទ្ធផលសំខាន់ៗ ដែលសហព័ន្ធកីឡាបាល់ទះកម្ពុជា សម្រេចបានក្នុងអាណត្តិទី៦ ព្រមទាំងលទ្ធផលនៃការដឹកនាំក្រុមបាល់ទះជម្រើសជាតិកម្ពុជា ចូលរួមប្រកួតនៅលើឆាកអន្តរជាតិ ដែលជាពិសេស គឺការដណ្តើមបានជើងឯក និងមេដាយមាស ក្នុងការប្រកួត SEA V Cup លើកទី៦ ឆ្នាំ២០២៦ (ជើងទី១) នៅសាធារណរដ្ឋហ្វីលីពីន ។
សមិទ្ធផលដ៏ត្រចះត្រចង់នេះ មិនមែនកើតឡើងដោយចៃដន្យនោះទេ ប៉ុន្តែជាផ្លែផ្កានៃការដឹកនាំប្រកបដោយចក្ខុវិស័យដ៏ឈ្លាសវៃ និងការយកចិត្តទុកដាក់ជាប្រចាំរបស់ ឯកឧត្តមអភិសន្តិបណ្ឌិត ដែលបានដាក់ចេញនូវទិសដៅអភិវឌ្ឍន៍ច្បាស់លាស់ សំដៅលើការពង្រឹងរចនាសម្ព័ន្ធគ្រប់គ្រង ការអភិវឌ្ឍធនធានមនុស្ស ការលើកកម្ពស់សមត្ថភាពកីឡាករ និងការពង្រីកកិច្ចសហប្រតិបត្តិការជាមួយដៃគូជាតិ និងអន្តរជាតិ។
ក្នុងនោះលោកបណ្ឌិត អាំង សិរីពិសិដ្ឋ ក៏បានរំលេចបីកីឡាករជម្រើសជាតិ វឿន វាសនា ត្រូវបានសហព័ន្ធបញ្ជូនទៅហ្វឹកហាត់ជាមួយក្លិបអាជីព Taichung Win Streak នៅទីក្រុងតៃជុង កោះតៃវ៉ាន់ សាធារណរដ្ឋប្រជាមានិតចិន ដែលជាឱកាសដ៏មានតម្លៃក្នុងការទទួលបានបទពិសោធន៍កម្រិតអាជីព និងជួយលើកកម្ពស់គុណភាពកីឡាករជាតិឱ្យឈានដល់កម្រិតអន្តរជាតិ។ សមិទ្ធផលទាំងនេះ បានឆ្លុះបញ្ចាំងឱ្យឃើញថា ការវិនិយោគលើមនុស្ស គឺជាមូលដ្ឋានដ៏រឹងមាំ ដែលបានរួមចំណែកដោយផ្ទាល់ដល់ការដណ្តើមបានមេដាយ និងជើងឯកជាបន្តបន្ទាប់របស់ក្រុមជម្រើសជាតិកម្ពុជា។
លើកពីនេះ អនុប្រធានសហព័ន្ធ ក៏បានបង្ហាញពីវិនិយោគលើការអភិវឌ្ឍហេដ្ឋារចនាសម្ព័ន្ធ បច្ចេកវិទ្យា និងសម្ភារបច្ចេកទេស។ ការគាំទ្រយ៉ាងសកម្មពីដៃគូឧបត្ថម្ភជាច្រើន ដែលបានចូលរួមទាំងផ្នែកថវិកា សម្ភារ បច្ចេកទេស និងការផ្សព្វផ្សាយ។ ការរៀបចំព្រឹត្តិការណ៍កីឡាបាល់ទះថ្នាក់ជាតិ និងអន្តរជាតិ សរុប ៥៣ព្រឹត្តិការណ៍ ដែលជាចំនួនច្រើនជាងគេមិនធ្លាប់មានចាប់តាំងពីការបង្កើតសហព័ន្ធកីឡាបាល់ទះកម្ពុជា។ បន្ថែមលើសពីនេះ ក្នុងចំណោមសមិទ្ធផលសំខាន់ៗនៃអាណត្តិទី៦ មានសមិទ្ធផលមួយដែលអាចចាត់ទុកថាជាចំណុចរបត់ដ៏មានន័យជាប្រវត្តិសាស្ត្រសម្រាប់វិស័យកីឡាបាល់ទះកម្ពុជា គឺ ការទទួលបានចំណាត់ថ្នាក់ក្នុង FIVB World Ranking។
គួរបញ្ជាក់ថា ក្នុងរយៈពេល ៥ឆ្នាំចុងក្រោយនេះ ក្រុមបាល់ទះជម្រើសជាតិកម្ពុជា បានបង្ហាញពីការរីកចម្រើនគួរឱ្យកត់សម្គាល់ និងការឈ្នះមេដាយសំរិទ្ធ SEA Games ឆ្នាំ២០២២ នៅប្រទេសវៀតណាម និងបន្តមេដាយប្រាក់ SEA Games ឆ្នាំ២០២៣ នៅកម្ពុជា រហូតបង្កើតបានប្រវត្តិសាស្ត្រឈ្នះជើងឯក SEA V Cup លើកទី៦ ជើងទី១ នៅប្រទេសហ្វីលីពីន៕
