ក្ដៅគគុក! ស៊ុនធិ លីមថងគុន គំរាមផ្ដួលរម្លំរដ្ឋាភិបាល អនុទិន ឱ្យចេញពីតំណែង ដើម្បីធានាថាថៃមិនបាត់បង់ដី

បាងកក៖ សភាពការណ៍នយោបាយផ្ទៃក្នុងប្រទេសថៃ បានឈានដល់ចំណុចក្ដៅគគុកសារជាថ្មី បន្ទាប់ពីលោក ស៊ុនធិ លីមថងគុន (Sondhi Limthongkul) អតីតមេដឹកនាំអាវលឿង និងជាអ្នកនយោបាយចាស់វស្សា បានចេញមុខប្រកាសធ្វើបាតុកម្មនយោបាយទ្រង់ទ្រាយធំ ក្រោមប្រធានបទដុតកំដៅថា «ប្រគល់ទឹកដីប្រទេសថៃត្រឡប់មកវិញ» ដើម្បីរំលាយរដ្ឋាភិបាល២.០របស់លោក អនុទិន ឆានវីរៈកុល និងគណបក្សភូមិចៃថៃ។

នៅក្នុងសន្និសីទសារព័ត៌មាននៅផ្ទះព្រះអាទិត្យ ឬ Baan Phra Athit នាព្រឹកថ្ងៃទី ៧ ខែកញ្ញា ឆ្នាំ ២០២៦ លោក ស៊ុនធិ បានបើកកកាយលាតត្រដាងពីភាពមិនតម្លាភាព អំពើពុករលួយក្នុងជួរមន្ត្រី និងការបរាជ័យក្នុងការគ្រប់គ្រងអំណាចរបស់រដ្ឋាភិបាលបច្ចុប្បន្ន ជាពិសេសលោកបានសំដៅចំៗទៅកាន់នាយករដ្ឋមន្ត្រីជំនាន់ទី ៣២ នេះតែម្ដង។ យុទ្ធនាការបាតុកម្មនេះ ត្រូវបានរៀបចំឡើងក្នុងគោលបំណងរុញច្រានឱ្យមានការផ្លាស់ប្តូរបុគ្គលិកដឹកនាំរដ្ឋ ដើម្បីធានាការពារបូរណភាពទឹកដី អធិបតេយ្យភាពជាតិ និងស្តារទំនុកចិត្តរបស់ប្រជាពលរដ្ឋថៃឡើងវិញ ដែលកំពុងតែធ្លាក់ចុះដល់កម្រិតទាបបំផុត។

រលកនៃបាតុកម្មទ្រង់ទ្រាយធំមួយ នឹងចាប់ផ្តើមបោះជំហានជាប្រវត្តិសាស្ត្រនៅថ្ងៃទី ១០ ខែកញ្ញា ឆ្នាំ ២០២៦ ខាងមុខ ដោយលោក ស៊ុនធិ គ្រោងនឹងដឹកនាំក្បួនបាតុករ និងក្រុមគាំទ្រនយោបាយជាតិនិយមរបស់លោកទៅកាន់ស្ថានទូតអ៊ីស្រាអែល ប្រចាំទីក្រុងបាងកក ដើម្បីដាក់លិខិតតវ៉ា និងអានសេចក្តីថ្លែងការណ៍ជាសាធារណៈ ពាក់ព័ន្ធនឹងសកម្មភាពរបស់ក្រុមវិនិយោគិនបរទេស និងពួកនាយទុនប្រផេះដែលកំពុងជ្រកកោន និងក្តោបក្តាប់សេដ្ឋកិច្ចក្នុងស្រុកថៃ។

ទោះបីជាលោក ស៊ុនធិ បានប្រើវាហាសាស្ត្រអះអាងថា ការបាតុកម្មនេះមិនមែនជាការអំពាវនាវឱ្យកងទ័ពចេញធ្វើ «រដ្ឋប្រហារ» នោះទេ ប៉ុន្តែវាគឺជាសញ្ញាព្រមានយ៉ាងធ្ងន់ធ្ងរទៅកាន់រដ្ឋាភិបាលលោក អនុទិន ថា ភាពស្អុយរលួយ និងការអសមត្ថភាពក្នុងការជួយសង្គ្រោះប្រជាជន លែងជាអ្វីដែលសង្គមថៃអាចអត់ឱនឱ្យបានទៀតហើយ។ លោកបានសង្កត់ធ្ងន់ថា ទោះបីជាត្រូវឈរតស៊ូតែម្នាក់ឯងក៏ដោយ ក៏លោកនឹងបន្តដឹកនាំចលនានេះ រហូតទាល់តែមានការកែទម្រង់ការដឹកនាំប្រទេសឱ្យមានសីលធម៌ ភាពស្មោះត្រង់ និងតម្កល់ផលប្រយោជន៍ជាតិជាធំឡើងវិញជារៀងរហូត៕