«អាគារនេះគឺមានសុភ័ណភាព គួរឱ្យទាក់ទាញជាទីបំផុត មានស្តង់ដារជាការិយាល័យធ្វើការ ហើយមន្ត្រី តាមប៉ុស្តិ៍ដែលទទួលបាននឹងសប្បាយរីករាយក្នុងការបំពេញភារកិច្ចបម្រើសេវាជូនប្រជាពលរដ្ឋ»។ នេះជាការលើកឡើងប្រកបដោយក្តីសោមនស្សរបស់ លោកបណ្ឌិត ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ ដែលបានសម្តែងនូវការគាំទ្រ និងវាយតម្លៃខ្ពស់ចំពោះគំនិតផ្ដួចផ្ដើម និងផែនការសាងសង់អគារប៉ុស្តិ៍នគរបាលរដ្ឋបាលឡើងវិញរបស់ស្នងការដ្ឋាននគរបាលខេត្តកំពត។
លោកបណ្ឌិត ទូច សុឃៈ បានគូសបញ្ជាក់ថា ការកសាងអគារប៉ុស្តិ៍នគរបាលដែលមានស្តង់ដារ មិនត្រឹមតែលើកកម្ពស់មុខមាត់ស្ថាប័នអនុវត្តច្បាប់ប៉ុណ្ណោះទេ ប៉ុន្តែថែមទាំងជាការផ្ដល់នូវបរិយាកាសធ្វើការងារដ៏សមរម្យ បង្កើតនូវកម្លាំងចិត្ត និងបង្កើនប្រសិទ្ធភាពការងារជូនមន្ត្រីនគរបាលមូលដ្ឋានក្នុងការបម្រើប្រជាពលរដ្ឋឱ្យបានកាន់តែល្អប្រសើរ។
លោកបណ្ឌិត ទូច សុឃៈ បានឱ្យដឹងបន្ថែមថា ក្រៅពីខេត្តកំពត ស្នងការដ្ឋាននគរបាលរាជធានី-ខេត្តមួយចំនួនទៀត ក៏បាន និងកំពុងចុះពិនិត្យ ជួសជុល និងអភិវឌ្ឍន៍អគារប៉ុស្តិ៍នគរបាលជាបន្តបន្ទាប់ផងដែរ។ លោកបានសម្តែងក្តីសង្ឃឹមថា តាមរយៈការអនុវត្តជាជំហានៗ ប៉ុស្តិ៍នគរបាលរដ្ឋបាលនៅទូទាំងប្រទេសនឹងកាន់តែមានភាពល្អប្រសើរឡើង ទាំងផ្នែកហេដ្ឋារចនាសម្ព័ន្ធអគារ ឧបករណ៍សម្ភារៈប្រើប្រាស់ និងការបន្ថែមក្របខ័ណ្ឌមន្ត្រីបំពេញការងារនៅមូលដ្ឋាន។
អ្នកនាំពាក្យរងក្រសួងមហាផ្ទៃរូបនេះ បានសង្កត់ធ្ងន់ពីទិសដៅការងារយ៉ាងច្បាស់ៗថា៖
«យើងអនុវត្តតាមគោលការណ៍ណែនាំដ៏ខ្ពង់ខ្ពស់របស់សម្តេចធិបតី គឺ “បង្រួមក្បាល ពង្រីកខ្លួន” ដោយពង្រឹងកម្លាំងនៅជើងក្រោមឱ្យកាន់តែច្រើន ដើម្បីការពារសន្តិសុខ និងបម្រើសេវាជូនប្រជាពលរដ្ឋ!»
ស្នងការខេត្តកំពត បង្ហាញផែនការសាងសង់ជាជំហានៗឆ្លើយតបទៅនឹងផែនការកែលម្អនេះ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានមានប្រសាសន៍បញ្ជាក់ថា ស្ថាប័នស្នងការដ្ឋានបាន និងកំពុងចាប់ផ្តើមត្រួតពិនិត្យ និងរៀបចំធ្វើឡើងវិញនូវអគារប៉ុស្តិ៍នគរបាលរដ្ឋបាល។ លោកបានឱ្យដឹងថា ការងារសាងសង់នេះនឹងត្រូវអនុវត្តជាជំហានៗ ដោយចាប់ផ្តើមដំបូងចេញពីបណ្តាប៉ុស្តិ៍ដែលស្ថិតនៅតាមដងផ្លូវជាតិ និងទីប្រជុំជន ហើយបន្ទាប់មកនឹងបន្តលាតសន្ធឹងទៅដល់បណ្តាប៉ុស្តិ៍នៅតំបន់ខាងក្នុងៗជាបន្តបន្ទាប់។ លោកស្នងការបានបន្ថែមទៀតថា ជាមធ្យម ដំណើរការសាងសង់អគារប៉ុស្តិ៍នគរបាលមួយខ្នងអាចប្រើប្រាស់រយៈពេលប្រមាណ ៣ ខែ ហើយខេត្តនឹងខិតខំជំរុញការងារនេះឱ្យប្រព្រឹត្តទៅជាបន្តបន្ទាប់ រហូតទាល់តែគ្រប់ប៉ុស្តិ៍នគរបាលទាំងអស់ក្នុងខេត្តទទួលបាននូវទីកន្លែងធ្វើការងារដ៏ត្រឹមត្រូវ និងសមរម្យ។
គួររំលឹកផងដែរថា កាលពីថ្ងៃទី២១ ខែកញ្ញា ២០២៦ លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានបង្ហោះសារ និងរូបភាពគំរូប្លង់អគារប៉ុស្តិ៍នគរបាលរដ្ឋបាលលើទំព័រហ្វេសប៊ុកផ្លូវការរបស់លោក ដើម្បបង្ហាញពីការប្តេជ្ញាចិត្តក្នុងការអនុវត្តតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ក្នុងការកសាង និងជួសជុលប៉ុស្តិ៍រដ្ឋបាលដែលមានសភាពទ្រុឌទ្រោមឡើងវិញទាំងអស់។
ការចេញផ្សាយផែនការនេះទទួលបានការចុច Like, Share និងចូលទៅ Comment អបអរសាទរ និងគាំទ្រយ៉ាងខ្លាំងក្លាពីសំណាក់មហាជន និងប្រជាពលរដ្ឋនៅលើបណ្តាញសង្គម។ មហាជនបានវាយតម្លៃថា នេះជាជំហានវិជ្ជមានមួយស្របតាមគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី និងក្រសួងមហាផ្ទៃ ដែលតែងតែចាត់ទុក «នគរបាលប៉ុស្តិ៍រដ្ឋបាល» ជាសេនាធិការជួរមុខយ៉ាងសំខាន់ ក្នុងការថែរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពភូមិ-ឃុំ ជូនប្រជាពលរដ្ឋនៅមូលដ្ឋានផ្ទាល់៕
