«អ្នកបើកជំនួសខ្ញុំ ពេលស្រវឹង» គឺជាសេវាកម្មពាណិជ្ជកម្មបែបទំនើបមួយ ដែលចាត់ចែងអ្នកបើកបរមានជំនាញ និងអត្តសញ្ញាណច្បាស់លាស់ ឱ្យមកជួយបើករថយន្តផ្ទាល់ខ្លួនរបស់អតិថិជនជូនទៅដល់ផ្ទះដោយសុវត្ថិភាព នៅពេលម្ចាស់រថយន្តស្ថិតក្នុងស្ថានភាពស្រវឹង ឬមិនអាចបើកបរដោយខ្លួនឯងបាន។
ក្នុងនាមខ្ញុំជាស្មេរ ខ្ញុំសូមចែករំលែកបទពិសោធបន្តិចបន្តួចលើរឿងនេះ៖ ខ្ញុំនៅចាំបានយ៉ាងច្បាស់ កាលពីពេលខ្ញុំធ្វើដំណើរទៅប្រទេសចិន ខ្ញុំបានជួប និងហូបចុកជាមួយមន្ត្រីរាជការចិនម្នាក់។ នៅយប់នោះ គាត់បានបើករថយន្តផ្ទាល់ខ្លួនមកទទួលខ្ញុំនៅសណ្ឋាគារ។ បន្ទាប់ពីការពិសារគ្រឿងស្រវឹង និងជជែកគ្នារួចរាល់ គាត់មិនបានតាំងខ្លួនជា «អ្នកខ្លាំង» ឬប្រម៉ាត់ប្រម៉ង់បើករថយន្តទាំងស្រវឹងត្រឡប់ទៅវិញឡើយ។ ផ្ទុយទៅវិញ គាត់បានចុចបញ្ជាហៅសេវាកម្មអ្នកបើកបរជំនួសតាមកម្មវិធីទូរស័ព្ទ ភ្លាមៗ។ អ្នកបើកបរជំនួសនោះ បានមកបើករថយន្តជូនខ្ញុំត្រឡប់ទៅសណ្ឋាគារវិញដោយសុវត្ថិភាព ហើយក៏បានជូនមន្ត្រីរូបនោះទៅដល់ផ្ទះយ៉ាងសុខសាន្ត។
មន្ត្រីរូបនោះបានប្រាប់ខ្ញុំថា «ការប្រើសេវាបើកជំនួសបែបនេះ មិនត្រឹមតែជួយឱ្យយើងមិនប្រឈមមុខច្បាប់ និងកាត់បន្ថយគ្រោះថ្នាក់ប៉ុណ្ណោះទេ ប៉ុន្តែសំខាន់បំផុត គឺការពារកិត្តិយស និងអាជីពជាមន្ត្រីរាជការ មិនឱ្យបាត់បង់ដោយសារតែគ្រោះថ្នាក់ចរាចរណ៍នាពេលយប់នោះឡើយ»។ មិនមែនមានតែប្រទេសចិនទេ សេវាអ្នកបើកបរជំនួស ពេលស្រវឹង ក៏ពេញនិយមនៅបណ្ដាប្រទេសមួយចំនួនផ្សេងទៀតដែរ។
សូមចុចអាន៖ ទីទួលសុវត្ថិភាពព្រែកជីកត្រូវទឹកលិច អាជ្ញាធរបន្ទាយមានជ័យជម្លៀសពលរដ្ឋជាង ១០០គ្រួសារទៅទីតាំងថ្មី
តើហេតុអ្វីនៅកម្ពុជាហាក់មិនទាន់ពេញនិយម? កន្លងមក ទោះជាមានទំព័រហ្វេសប៊ុកមួយចំនួនធ្លាប់បានប្រកាសផ្តល់សេវានេះក៏ដោយ ក៏កត្តា កង្វះទំនុកចិត្តលើសុវត្ថិភាព» និងការខ្វះព័ត៌មានលម្អិត បានក្លាយជាល្បាំងរាំងស្ទះធ្វើឱ្យពលរដ្ឋមិនហ៊ានប្រថុយប្រើប្រាស់។ សម្រាប់ខ្ញុំ ខ្ញុំចង់ឃើញសេវាកម្មនេះដើរទាន់សភាពការណ៍ និងរីកចម្រើនខ្លាំង ព្រោះវាជាដំណោះស្រាយដ៏ចាំបាច់បំផុតនាពេលបច្ចុប្បន្ន។
បច្ចុប្បន្ន គ្រោះថ្នាក់ចរាចរណ៍នៅកម្ពុជា នៅតែជា «ឃាតកលាក់មុខ» ដ៏គួរឱ្យភ័យខ្លាច ដែលបានប្លន់យកជីវិតប្រជាពលរដ្ឋស្លូតត្រង់ជាមធ្យមពី ៤ ទៅ ៥ នាក់រៀងរាល់ថ្ងៃ។ ក្នុងចំណោមដើមហេតុចម្បងៗ ការបើកបរក្រោមឥទ្ធិពលនៃគ្រឿងស្រវឹង នៅតែជាឫសគល់នៃសោកនាដកម្មលើដងផ្លូវយ៉ាងធ្ងន់ធ្ងរ និងទាមទារឱ្យមានការទប់ស្កាត់ជាបន្ទាន់។
យោងតាមមាត្រា ៦(ថ្មី) មាត្រា៧(ថ្មី) មាត្រា ១០ (ថ្មី) នៃអនុក្រឹត្យលេខ ៣៩ អនក្របក និងមាត្រា ៧៧ (ថ្មី) នៃច្បាប់ស្តីពី ចរាចរណ៍គោក បានចែងថា អ្នក រថយន្ត ម៉ូតូ ម៉ូតូកងបី និងរ៉ឺម៉ក ដែលស្ថិតក្នុងស្ថានភាពស្រវឹងនឹងត្រូវទទួលទោសតាមច្បាប់ស្តីពី ចរាចរណ៍គោក ដូចខាងក្រោម៖
ចំពោះអ្នកមានជាតិស្រវឹងក្នុងខ្លួន កម្រិតជាតិអាល់កុលចាប់ពី ០,២៥-០,៣៩
- សម្រាប់អ្នកម៉ូតូ ត្រូវផាកពិន័យចំនួន ២៥ម៉ឺនរៀល។
- សម្រាប់អ្នក រថយន្តធុនស្រាល ត្រូវផាកពិន័យចំនួន ៤០ម៉ឺនរៀល។
- សម្រាប់អ្នករថយន្តធុនធ្ងន់ ត្រូវផាកពិន័យចំនួន ៨០ម៉ឺនរៀល។
ដោយឡែកចំពោះអ្នកមានជាតិស្រវឹងក្នុងខ្លួន កម្រិតជាតិអាលកុលចាប់ពី ០,៤០ឡើងទៅ - សម្រាប់អ្នកម៉ូតូ ត្រូវផាកពិន័យចំនួន ១លានរៀល។
- សម្រាប់អ្នករថយន្តធុនស្រាល ត្រូវផាកពិន័យចំនួន ២លានរៀល។
- សម្រាប់អ្នករថយន្តធុនធ្ងន់ ត្រូវផាកពិន័យចំនួន ៤លានរៀល។ ក្នុងករណីមិនរាងចាល ច្បាប់ស្តីពី ចរាចរណ៍គោក តម្រូវឱ្យបញ្ជូនទៅតុលាការ អនុវត្តតាមច្បាប់ នឹងត្រូវជាប់ទោសពន្ធនាគារពី ១ខែ ទៅ ៦ខែ និងពិន័យជាប្រាក់ពី ៨០ម៉ឺនរៀល ទៅ៤លានរៀល។
ដើម្បីទប់ស្កាត់អ្នកបើកបរក្នុងស្ថានភាពស្រវឹងនេះដែរ បទបញ្ជាយ៉ាងក្តៅគគុកពីសំណាក់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចគោលការណ៍បណ្ដេញមន្ត្រីក្នុងដែនសមត្ថកិច្ចរបស់ខ្លួន ទាំងមន្ត្រីស៊ីវិល និងកងកម្លាំងប្រដាប់អាវុធ ចេញពីក្របខណ្ឌ បើពួកគេបើកបរទាំងស្រវឹង ហើយបង្កគ្រោះថ្នាក់ចរាចរណ៍។ ការណ៍នេះ គឺដើម្បីលើកគុណតម្លៃមន្ត្រីរបស់ក្រសួង ដែលជាអង្គភាពអនុវត្តច្បាប់ចរាចរណ៍។ ការសម្រេចរបស់រដ្ឋមន្ត្រីក្រសួងមហាផ្ទៃនេះ ធ្វើឡើងក្នុងកិច្ចប្រជុំនិងស្ដាប់របាយការណ៍របស់អគ្គស្នងការដ្ឋាននគរបាលជាតិ អំពីកិច្ចការងារចុះពិនិត្យតាមប៉ុស្តិ៍នគរបាលរដ្ឋបាល តាមស្នងការដ្ឋាននគរបាលរាជធានី ខេត្ត នៅថ្ងៃទី២៦ ខែសីហា ២០២៦។
សម្រាប់មន្ត្រីរាជការ និងកងកម្លាំងប្រដាប់អាវុធ ការបើកបរទាំងស្រវឹង មិនត្រឹមតែប្រឈមនឹងការបាត់បង់ជីវិតប៉ុណ្ណោះទេ ប៉ុន្តែថែមទាំង «បាត់បង់អាជីព កិត្តិយស និងអនាគត» ភ្លាមៗផងដែរ។
ដើម្បីជំរុញឱ្យសេវាកម្ម «អ្នកបើកជំនួសខ្ញុំ» អាចដំណើរការបានទូលំទូលាយ និងបង្កើតទំនុកចិត្តនៅកម្ពុជា ដំណោះស្រាយរួមគ្នាមួយចំនួនគួរត្រូវបានលើកកម្ពស់៖
- កិច្ចសហការរវាងរដ្ឋ និងក្រុមហ៊ុនបច្ចេកវិទ្យា៖ ក្រសួងមហាផ្ទៃ ឬអគ្គស្នងការដ្ឋាននគរបាលជាតិ អាចពិចារណាគាំទ្រ ឬជំរុញក្រុមហ៊ុនបច្ចេកវិទ្យាក្នុងស្រុក និង App ធំៗ ឱ្យបង្កើតមុខងារ «Drive for me» ដោយមានការផ្ទៀងផ្ទាត់អត្តសញ្ញាណអ្នកបើកបរច្បាស់លាស់ មានកញ្ចប់ធានារ៉ាប់រង និងទទួលស្គាល់ស្តង់ដារសុវត្ថិភាពពីអាជ្ញាធរ ដើម្បីលុបបំបាត់ការបារម្ភ និងបង្កើតទំនុកចិត្ត ១០០% ជូនប្រជាពលរដ្ឋ។
- ការរួមចំណែកពីភោជនីយដ្ឋាន និងសន្តិសុខ៖ ហាងផឹកស៊ី ឬក្លឹបកម្សាន្ត គួរតែបណ្តុះបណ្តាលសន្តិសុខ ឬសហការជាមួយក្រុមហ៊ុនជំនាញ ក្នុងការផ្តល់សេវា «បើកឡានអតិថិជនជូនទៅផ្ទះ» ដោយសុវត្ថិភាព។
- ទម្លាប់ «ទុកឡាន-ជិះតាក់ស៊ី»៖ ប្រសិនបើមិនទាន់មានសេវាអ្នកបើកជំនួសផ្លូវការ ជម្រើសដ៏ល្អបំផុតគឺការទុកឡានចោលនៅកន្លែងផ្ញើឱ្យមានសុវត្ថិភាព រួចបញ្ជាហៅ TADA, PassApp ឬ Grab ជិះត្រឡប់ទៅផ្ទះ។
- ការរៀបចំផែនការមុនចាកចេញពីផ្ទះ៖ សម្រាប់មន្ត្រីក្រសួងមហាផ្ទៃ និងប្រជាពលរដ្ឋទូទៅ ប្រសិនបើដឹងថាមកពិសារគ្រឿងស្រវឹង គួរតែរៀបចំផែនការ «ជិះតាក់ស៊ី ឬកង់បីពីផ្ទះមកតែម្តង» ដោយមិនបាច់បើករថយន្តផ្ទាល់ខ្លួនមកឡើយ។
ការផ្លាស់ប្តូរទម្លាប់ និងការបង្កើតជម្រើសសេវាកម្ម «អ្នកបើកជំនួសខ្ញុំ» មិនត្រឹមតែជាដំណោះស្រាយអាជីវកម្មបែបទំនើបប៉ុណ្ណោះទេ ប៉ុន្តែគឺជាយន្តការសង្គមមួយដ៏សំខាន់ក្នុងការកាត់បន្ថយគ្រោះថ្នាក់ចរាចរណ៍ ការពារជីវិតមនុស្ស និងរក្សានូវអនាគតការងាររបស់មន្ត្រីរាជការឱ្យបានគង់វង្ស៕
ចុះអ្នកវិញ តើមានទស្សនៈដូចម្ដេចដែរ? រឿងបើកបរពេលស្រវឹងនេះ តើអ្នកមានយោបល់អ្វីទេ?
អត្ថបទ៖ ទស្សនៈស្មេរ
ប្រសិនបើប្រិយមិត្តមានបទវិភាគ អត្ថបទទស្សនៈ ឬមតិស្ថាបនាជុំវិញបញ្ហាសង្គម និងការកែលម្អសេវាសាធារណៈ សូមផ្ញើអត្ថបទរបស់លោកអ្នកមកកាន់សារព័ត៌មាន ត្រយង តាមរយៈ Telegram៖ 099 588 880 ទំនាក់ទំនងទូរស័ព្ទ៖ 066 999 434 ឬទំព័រហ្វេសប៊ុកផ្លូវការ Troryorng News។ យើងខ្ញុំរង់ចាំទទួល និងសហការផ្សព្វផ្សាយរាល់ទស្សនៈស្ថាបនាដើម្បីសង្គមយើង!