ក្រុមតំណាងកម្ពុជា ភ្នំពេញក្រោនពិតជាធ្វើបានល្អ ក្នុងការប្រកួតពានរង្វាន់លំដាប់ទី២នៅទ្វីបអាស៊ី គឺ AFC Champions League Two រដូវកាល ២០២៦-២៧ ដោយឆ្លងកាត់ ២ប្រកួត ឈ្នះទាំង ២ប្រកួត មាន ៦ពិន្ទុពេញឈរកំពូលតារាង។
ស្របពេលក្រុមតំណាងកម្ពុជា មួយទៀតគឺព្រះខ័នរាជស្វាយរៀង ហាក់មិនសូវគាប់ប្រសើរដោយឆ្លងកាត់ ២ប្រកួត ចាញ់១ និងស្មើ ១ប្រកួត មាន ១ពិន្ទុ ឈរនៅចំណាត់ថ្នាក់លេខ៣។
ប្រកួតបន្ទាប់ភ្នំពេញក្រោន នឹងត្រូវជួប Kitchee ហុងកុង នៅទឹកដីកម្ពុជា ស្របពេលព្រះខ័នរាជស្វាយរៀង នឹងត្រូវជួប Tampines Rovers នៅទឹកដីសិង្ហបុរី ធ្វើការងារធ្ងន់ ដោយត្រូវការឈ្នះចាំបាច់ដើម្បីមានឱកាសឡើងទៅកាន់វគ្គបន្ត។ សម្រាប់ការប្រកួតបិទពូលរបស់ក្រុមទាំង ២ នឹងត្រូវធ្វើឡើងនៅថ្ងៃទី២៩ ខែតុលា ឆ្នាំ២០២៦។
ព្រះខ័នរាជស្វាយរៀង នៅពូល G ជាមួយជើងខ្លាំង Machida Zelvia ជប៉ុន Shanghai Shenhua ចិន Tampines Rovers សិង្ហបុរី ខណ: ភ្នំពេញក្រោន នៅពូល H ជាមួយក្រុមខ្លាំង Gangwon FC កូរ៉េខាងត្បូង Kitchee ហុងកុង Kuching City ម៉ាឡេស៊ី។
រំលឹកថា ឆ្លងកាត់មួយប្រកួតដូចគ្នាព្រះខ័នរាជស្វាយរៀង មាន ០ពិន្ទុ បន្ទាប់ពីចាញ់ក្រុម Machida Zelvia របស់ជប៉ុន ២-០ វគ្គជម្រុះពូល G ស្របពេលភ្នំពេញក្រោន មាន ៣ពិន្ទុ បន្ទាប់ពីយកឈ្នះ ក្រុម Kuching City របស់ម៉ាឡេស៊ី ក្នុងលទ្ធផល ២-១ វគ្គជម្រុះពូល H។
គួរបញ្ជាក់ថា បន្ទាប់ពីក្លិបកម្ពុជា ធ្វើបានល្អ សហព័ន្ធកីឡាបាល់ទាត់អាស៊ី AFC បានផ្ដល់កៅអីកន្លះ ១+១ ក្នុងពានរង្វាន់លំដាប់ទី២នៅទ្វីបអាស៊ី គឺ AFC Champions League Two រដូវកាល ២០២៦-២៧៕
