លោក Mohammad Barkindo អ្នកនយោបាយនីហ្សេរីយ៉ា និង ជាអគ្គលេខាធិការនៃក្រុមប្រទេសនាំចេញប្រេង OPEC បានទទួលមរណភាពក្នុងវ័យ ៦៣ឆ្នាំ ប៉ុន្មានថ្ងៃមុនពេលគាត់ត្រូវបានកំណត់ឲ្យបញ្ចប់អាណត្តិនៅអង្គការមួយនេះ។
ប្រធានសាជីវកម្មប្រេងជាតិរបស់នីហ្សេរីយ៉ា លោក Mele Kyari បានប្រកាសពីការស្លាប់របស់លោក Mohammaed Barkindo នៅក្នុងបណ្ដាញសង្គម Twitter នាព្រឹកថ្ងៃ ពុធ ទី ០៦ ខែ កក្កដា នេះ។
លោកបានបង្ហោះថា «យើងបានបាត់បង់លោកបណ្ឌិត Muhammad Barkindo ជាទីគោរពរបស់យើង។ លោក បានទទួលមរណភាពនៅម៉ោងប្រហែល ១១យប់ ថ្ងៃទី ០៥ ខែ កក្កដា ឆ្នាំ២០២២ (ម៉ោងក្នុងស្រុក) នេះជាការបាត់បង់ដ៏ធំធេងចំពោះយើង និង ក្រុមគ្រួសាររបស់លោក។ ចំណែកមូលហេតុនៃការស្លាប់របស់លោកមិនទាន់ត្រូវបានបង្ហាញឲ្យដឹងនោះទេ»។
លោក Barkindo បានកើតនៅឆ្នាំ ១៩៥៩ ក្នុងប្រទេសនីហ្សេរីយ៉ា និង ទទួលមរណភាពក្នុងវ័យ ៦៣ឆ្នាំ ដោយមរណភាពរបស់លោក Barkindo បានបង្កឲ្យមានការភ្ញាក់ផ្អើលយ៉ាងខ្លាំងដល់សមាជិកភាពនៃអង្គការ OPEC។
លោក Barkindo បានបម្រើការជាអគ្គលេខាធិការ OPEC ចាប់តាំងពីខែសីហា ឆ្នាំ ២០១៦ មក ហើយត្រូវបានគេរំពឹងថា នឹងបញ្ចប់អាណត្តិរបស់លោកជាអគ្គលេខាធិការ OPEC នៅថ្ងៃទី ៣១ ខែកក្កដា៕
