សិល្បៈជាតិ៖ SEA GAMES 2023 បានប្រព្រឹត្តិទៅយ៉ាងរលូន និងទទួលបានលទ្ធផលជាវិជ្ជមានពីក្រសែភ្នែកពិភពលោក ក្រៅពីការប្រកួតកីឡាដែលគួរឱ្យចាប់អារម្មណ៍ហើយនោះ អ្នកគាំទ្រវៀតណាមដ៏ស្រស់សោភាមួយរូប និងគណៈកម្មការគុនល្បុក្កតោជនជាតិកូរ៉េ ក៏ឆក់បានការចាប់អារម្មណ៍ពីសាធារណជនច្រើនគួរឱ្យកត់សម្គាល់។ ហេតុអ្វីបានជាអ្នកទាំងពីរនេះផ្ទុះការចាប់អារម្មណ៍ខ្លាំងនៅលើបណ្ដាញអនឡាញ?
មែនទែនទៅកម្ពុជាបានរង់ចាំអស់រយៈពេល ៦៤ឆ្នាំ ទើបអាចក្លាយជាម្ចាស់ផ្ទះរៀបចំការប្រកួត ដែលនេះគឺជាមោទនភាពមួយសម្រាប់ប្រជាជាតិកម្ពុជាទាំងមូល។ យ៉ាងណាមិញព្រឹត្តិការណ៍កីឡាដ៏ធំនេះ ក្រៅពីស្រូបទាញទេសចរណ៍ហើយនោះ ក៏ជាចំណែកមួយជួយផ្សព្វផ្សាយពីវប្បធម៌ និងអរិយធម៌ដ៏ផូរផង់របស់ជនជាតិកម្ពុជា ឱ្យមិត្តអាស៊ាន និងមិត្តបរទេសផ្សេងទៀតបានស្គាល់ពីកម្ពុជាកាន់តែស៊ីជម្រៅ។
ងាកមកព្រឹត្តិការណ៍កីឡាឯណេះវិញ គ្រប់វិញ្ញាសារប្រកួតរមែងមានការចូលរួមគាំទ្រពីអ្នកគាំទ្រពីបណ្ដាប្រទេសដែលមានអត្តពលិកខ្លួនចូលរួមប្រកួត ដោយក្នុងនោះអ្នកគាំទ្រវៀតណាមដ៏ស្រស់ស្អាតមួយរូបដែលត្រូវបានគេថតយកមកបង្ហោះចែករំលែកលើបណ្ដាញសង្គម មានសន្ទុះពេញនិយមច្រើនព្រោះតែរូបសម្រស់ដ៏ស្អាតនិងទឹកមុខក្រមិចក្រមើមរបស់នាង។ យោងតាមក្រុមអ្នកស៊ើបអង្កេតអនឡាញរបស់យើងបានរកឃើញថាស្រីស្រស់រូបនេះ មិនគ្រាន់តែជាអ្នកគាំទ្រធម្មតានោះឡើយ ប៉ុន្តែនាងមានឈ្មោះថា Hoà Minzy មានវ័យ ២៧ឆ្នាំ គឺជាតារាចម្រៀងនិងសម្ដែងអាជីពរបស់វៀតណាម។ ស្រីស្រស់រូបនេះមានបទពិសោធន៍សិល្បៈច្រើនតាមរយៈការចូលរួមប្រកួតប្រជែងកម្មវិធីសិល្បៈជាច្រើននៅក្នុងប្រទេសវៀតណាម នាងត្រូវបានប្រជាជនវៀតណាមទទួលស្គាល់ថាជាតារាចម្រៀងវ័យក្មេងដែលមានទឹកសំឡេងខ្លាំងល្អ។
ខណៈដែលបុគ្គលល្បីទីពីរគឺជាគណៈកម្មការកាត់សេចក្ដីក្នុងប្រភេទកីឡាគុនល្បុក្កតោរបស់ខ្មែរ ដែលមានរូបរាងសង្ហាមើលតែតារារហូតមានអ្នកចេញមកឆ្លើយតបពីសវតារបស់បុរសរូបនេះថា តាមពិតទៅលោកគឺជាតារាសម្ដែងនៅប្រទេសកូរ៉េខាងត្បូងមានឈ្មោះពិតថា Lee Jiseok អ្នកនិយមទស្សនារឿងបែបវាយប្រយុទ្ធគ្នា អាចនឹងស្គាល់លោកតាមរយៈរឿង «អ្នកចម្បាំងវ័យក្មេង» ឬ «Warrior Season1 និង Season2»។ បុរសវ័យក្មេងរូបនេះមិនត្រឹមតែជាតារាសម្ដែងបែបវាយប្រយុទ្ធមួយមុខប៉ុណ្ណោះទេ តែការដែលលោកទទួលបានតួនាទីជាគណៈកម្មការអន្តរជាតិកាត់ក្ដីក្នុងប្រភេទកីឡាគុនល្បុក្កតោ ព្រោះលោកគឺជា គ្រូបង្វឹកម្នាក់ស្ថិតក្នុងក្រុមគ្រូបង្វឹកសម្ដែងក្បាច់តេក្វាន់ដូពិភពលោក ជាប្រធានគ្រូបង្ហាត់ក្បាច់ការពារនៃកីឡាតេក្វាន់ដូ និងជាគ្រូបង្វឹកក្បាច់គុនប្រយុទ្ធដល់ក្រុមប្រតិបត្តិការពិសេសផងដែរ។
ព្រឹត្តិការណ៍ជាប្រវត្តិសាស្ត្រកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ បើសម្លឹងលើទស្សនៈវិជ្ជមានដោយមិនប្រើគំនិតអគតិណាមួយនោះ គេអាចសម្គាល់បានថា ប្រទេសកម្ពុជា ទទួលបានជោគជ័យយ៉ាងត្រចះត្រចង់ពីភាពជាម្ចាស់ផ្ទះនៃការរៀបចំព្រឹត្តិការណ៍ប្រកួតកីឡាដ៏ធំមួយនេះ ព្រោះមិនថាបណ្ដាញសារព័ត៌មានទូទាំងសកលលោកដែលមកចូលរួមតាមដានក្នុងព្រឹត្តិការណ៍នេះ បានចុះផ្សាយចំណុចនិងរឿងរ៉ាវល្អៗយ៉ាងច្រើនពីប្រទេសនិងប្រជាជនកម្ពុជាប៉ុណ្ណោះទេ សូម្បីតែអ្នកគាំទ្រកីឡាករបរទេស ដែលធ្វើដំណើរមកកាន់ប្រទេសកម្ពុជាបានលើកឡើងនូវសំឡេងដូចគ្នាថា អ្វីដែលខ្លួនបានឮពីកម្ពុជា មិនមែនជាការពិតនោះឡើយ ប្រជាជនកម្ពុជា មានភាពរួសរាយរាក់ទាក់ មានស្នាមញញឹម មានទឹកចិត្តល្អ ទទួលស្វាគមន៍ពួកខ្លួន យ៉ាងកក់ក្ដៅ ដោយមិនប្រកាន់ថាជាជាតិសាសន៍ណានោះឡើយ៕
