ក្រុមបាល់ទាត់ជម្រើសជាតិកម្ពុជា បានធ្វើដំណើរមកដល់មាតុភូមិវិញហើយ នៅម៉ោង១១:៤០នាទីយប់ថ្ងៃអាទិត្យ ទី១៣ ខែមិថុនា ឆ្នាំ២០២១ ក្រោយចប់បេសកកម្មក្នុងវគ្គជម្រុះជុំទី២នៃពានរង្វាន់បាល់ទាត់ជើងឯកពិភពលោក 2022 FIFA World Cup Qatar ប្រចាំទ្វីបអាស៊ី។ នេះបើតាមការបញ្ជាក់ពីសហព័ន្ធកីឡាបាល់ទាត់កម្ពុជា។
អត្ថបទពាក់ព័ន្ធ៖គួច សុកុម្ភៈ ចាស់ជាងគេ ឡេង ណូរ៉ា ក្មេងជាងគេក្នុងបញ្ជីជម្រើសជាតិត្រៀម World Cup
យ៉ាងណាក្តីដំណើរមកដល់មាតុភូមិវិញក្រុមការងារគ្រូបង្វឹកនិងកីឡាករទាំងត្រូវធ្វើចត្តាឡីស័ក្ខរយៈពេល១៤ថ្ងៃសិន នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំរីករាយ ក្នុងខេត្តកំពង់ឆ្នាំង។ នេះបើតាមដំណឹងខ្សឹបប្រាប់ក្រៅផ្លូវការ។
មុនកីឡាករធ្វើដំណើរមកដល់ប្រធានសហព័ន្ធកីឡាបាល់ទាត់កម្ពុជា ឯកឧត្តម នាយឧត្តមសេនីយ៍ សៅ សុខា បានចុះត្រួតពិនិត្យទីតាំងសម្រាប់ធ្វើចត្តាឡីស័ករបស់កីឡាករ និងគណៈប្រតិភូក្រុមជម្រើសជាតិកម្ពុជា រួចរាល់ផងដែរ។
ចំពោះក្រុមជម្រើសជាតិកម្ពុជា វិញឆ្លងកាត់ការធ្វើតេស្តសុខភាពទាំងមុខចូលដល់ប្រទេសបារ៉ែន និងការធ្វើតេស្តមុនការប្រកួតទាំង៣លើក គ្រប់គ្នាសុទ្ធតែមានសុខភាពល្អមិនមានពាក់ព័ន្ធនឹងជំងឺកូវីដ-១៩ នោះទេ។
អត្ថបទពាក់ព័ន្ធ៖ជម្រុះ World Cup៖ខ្មែរម្នាក់នៅប្រទេសបារ៉ែន ស្កាត់ជួយចម្អិនម្ហូបដល់ក្រុមជម្រើសជាតិកម្ពុជា
ក្រុមជម្រើសជាតិកម្ពុជា នៅសល់បេសកកម្មប្រកួតក្នុងពានរង្វាន់ 2023 AFC Asian Cup ក្នុងវគ្គជម្រុះព្រមទាំងត្រូវប្រកួតពានរង្វាន់ជើងឯកតំបន់អាស៊ាន AFF Suzuki Cup នៅចុងឆ្នាំ២០២១ នេះផងដែរ។ ចំណែកលទ្ធផលក្នុងវគ្គជម្រុះ ពូល C ពានរង្វាន់ 2022 FIFA World Cup Qatar ក្រុមកម្ពុជា ប្រកួត៨លើក ស្មើ១លើក និងចាញ់៧លើក ព្រមទាំងទាត់បញ្ជូលទីគេបាន២គ្រាប់ និងរបូតវិញ៤៤គ្រាប់។
ក្រោយបញ្ចប់ការធ្វើចត្តឡីស័ក្ខ ១៤ថ្ងៃ កីឡាករនិងក្រុមការងារទាំងអស់ត្រូវបែកគ្នាត្រឡប់ចូលក្លិបរៀងៗខ្លួនវិញ ដើម្បីចូលរួមប្រកួតក្នុងពានរង្វាន់លីគកំពូលកម្ពុជា Metfone Cambodian League ឬពានរង្វាន់សម្តេចតេជោ ហ៊ុន សែន ឬ ពានរង្វាន់ AFC Cup 2021 ជាដើម៕
