កីឡាករ Charlie Machell បានចាកចេញពីក្លិបវិសាខា របស់កម្ពុជា កាលពីដើមខែឧសភា កន្លងទៅ ខណៈពេលនេះបានលេចលឺថានឹងចូលរួមជាមួយក្លិប Perak សមាជិកពានរង្វាន់លីគកំពូលម៉ាឡេស៊ី Malaysia Super League ដើម្បីត្រៀមប្រកួតជើងទី២ រដូវកាលឆ្នាំ២០២១ នេះ។
Welcome to Perak Yob!@CharlieMachell pic.twitter.com/lY04Sq1rf0
— yob4ever.com (@yob4e) June 12, 2021
ក្លិប Perak នៅមិនទាន់ប្រកាសរឿងនេះផ្លូវការនៅឡើយទេ ប៉ុន្តែសារព័ត៌មាន transfermarkt បានបញ្ជាក់ពីការចូលរួមរបស់កីឡាករអង់គ្លេសរូបនេះ តាំងពីថ្ងៃទី១ ខែមិថុនា ឆ្នាំ២០២១ មកម៉្លេះ ក្នុងបញ្ជីកីឡាករបរទេសទាំង៥នាក់ក្នុងក្រុម ចាស់របស់ ធារី ចន្ថាប៊ីន បូកជារួមជាមួូយកីឡាករបារាំង-កូឌីវ័រ Ghislain Guessan កីឡាករហ្គាណា Nana Poku កីឡាករលីបង់-ប៊ុលហ្គារី Samir Ayass និងកីឡាករឥណ្ឌូណេស៊ី-កាម៉េរ៉ូនZoubairou Garba។
អត្ថបទពាក់ព័ន្ធ៖កីឡាករអង់គ្លេស Charlie Machell និងក្លិបវិសាខា ប្រកាសចែកផ្លូវគ្នាទាំងលីគកំពុងសម្រាក
កីឡាករ Charlie Machell កាលពីពេលថ្មីៗលើហ្វេសប៊ុករបស់ខ្លួនថានឹងប្រកាសពីដំណឹងល្អក្នុងពេលឆាប់ៗ។
ចំពោះកីឡាករCharlie Machell វ័យ២៦ឆ្នាំ ធ្លាប់ជាយុវជនថ្នាលនៅក្លិបបាល់ទាត់ Newcastle United របស់អង់គ្លេស ហើយនៅឆ្នាំ២០១៧ រូបគេបានចុះកិច្ចសន្យាកីឡាករអាជីពជាមួយក្លិប Thisted FC នៅដាណឺម៉ាក ខណៈនៅឆ្នាំ២០១៨ បានផ្ទេរទៅក្លិប 07 Vestur នៅកោះVágar និងនៅឆ្នាំ២០១៩ បានធ្វើដំណើរមកកាន់ប្រទេសកម្ពុជា ដោយចូលរួមក្នុងក្លិបព្រះខ័នរាជស្វាយរៀង តែនៅឆ្នាំ២០២០ បានចេញទៅចូលរួមក្លិប Hougang United នៅលីគសិង្ហបុរី និងនៅឆ្នាំ២០២១ នេះបានត្រឡប់មកកាន់ប្រទេសកម្ពុជាម្តងទៀតដោយចូលរួមជាមួយក្លិបវិសាខា៕
