ក្រុមបាល់ទាត់ជម្រើសជាតិអ៊ីតាលី បានក្លាយជាក្រុមមានឈ្មោះឡើងទៅលេងវគ្គបន្តមុនគេ ក្រោយមានពិន្ទុច្រើនឆ្លងផុតវគ្គជម្រុះតាមពូល នៅក្នុងព្រឹត្តិការណ៍ប្រកួតបាល់ទាត់ជើងឯកប្រចាំទ្វីបអឺរ៉ុប UEFA Euro 2020។
លទ្ធផលប្រកួតក្នុងពូល A និង១គូក្នុងពូល B នៅយប់ថ្ងៃពុធ នេះមានដូចជា៖
-ទួរគី ០-២ វ៉ែល
-អ៊ីតាលី ៣-០ ស្វីស
-ហ្វាំងឡង់ ០-១ ស្វីស
ដូច្នេះនៅពូល A ក្រុមអ៊ីតាលី ឈ្នះ២ប្រកួតជាប់គ្នា មានឈ្មោះឡើងទៅវគ្គ១៦ក្រុមចុងក្រោយ ខណៈក្រុមវ៉ែល កំពុងឈរលេខ២មាន៤ពិន្ទុ ក្រុមស្វីស ទើបមាន១ពិន្ទុ និងក្រុមទួរគី នៅបាតតារាងមិនទាន់មានពិន្ទុកាន់។ ប្រកួតចុងក្រោយក្នុងពូល A នេះក្រុមស្វីស ត្រូវជួបទួរគី និងអ៊ីតាលី ជួបក្រុមវ៉ែល។
ចំណែកពូល B វិញក្រុមមានក្រុមចំនួន៣ មានពិន្ទុស្មើគ្នា ក្នុងនោះមានប៊ែលហ្សិក រុស្ស៊ី ហ្វាំងឡង់ ខណៈក្រុមដាណឺម៉ាក មិនទាន់មានពិន្ទុកាន់នៅឡើយទេ។ ៣ប្រកួតចុងក្រោយក្នុងពូលនឹងកាត់សេចក្តីថាក្រុមណាខ្លាំងជាងគេមានឈ្មោះឡើងទៅជុំបន្ត ដោយក្នុងនោះមានក្រុមដាណឺម៉ាក ជួបបែលហ្សិក ហើយក្រុមរុស្ស៊ី ប៉ះដាណឺម៉ាក និងហ្វាំងឡង់ ប៉ះបែលហ្សិក។
អត្ថបទពាក់ព័ន្ធ៖Euro៖ Lukaku, Schick និងRonaldo ទាត់ទីបានច្រើនគ្រាប់ តែ៣នាក់ទៀតធ្វើឱ្យ Own Goal
ត្រឡប់មកប្រកួតនៅយប់ថ្ងៃព្រហស្បតិ៍ នេះវិញជាការប្រកួតក្នុងពូល B និង C ដោយ៖
-អ៊ុយក្រែន ប៉ះ ម៉ាសេដូនាខាងជើង ម៉ោង៨យប់
-ដាណឺម៉ាក ប៉ះ បែលហ្សិក ម៉ោង១១យប់
-ហុល្លង់ ប៉ះ អូទ្រីស ម៉ោង២រំលងអាធ្រាត្រ
សូមបញ្ជាក់ថាពានរង្វាន់ UEFA Euro 2020 រៀបចំឡើងនៅ១១ប្រទេសផ្សេងគ្នាដោយសារតែស្ថានភាពកូវីដ-១៩ ចាប់ពីថ្ងៃទី១១ខែមិថុនា ដល់ថ្ងៃទី១១ ខែកក្កដា ឆ្នាំ២០២១ មាន២៤ក្រុមចូលរួមចែកជា៦ពូល ក្នុង១ពូលមាន៤ក្រុម។ ក្រុមខ្លាំងតាមពូលនីមួយៗមានឈ្មោះឡើងទៅលេងជុំបន្ទាប់ ហើយបន្តជម្រុះរហូតដល់វគ្គផ្ដាច់ព្រ័ត្រ ស្វែងរកម្ចាស់ជើងឯកប្រចាំឆ្នាំ៕
