សិល្បៈជាតិ៖ តាមការរៀបរាប់របស់តារាចម្រៀងប្រចាំផលិតកម្មថោនគឺ ករុណា ពេជ្រ នៅលើបណ្ដាញសង្គមហ្វេសប៊ុកនាពេលថ្មីៗនេះបានលម្អិតថា លោកបាននាំថវិកាចំនួន ៩០០ ដុល្លារ ដែលប្រមូលបានពីសប្បុរសជននាន មកជូនដល់លោកគ្រូ នូ ស៊ិប ដែលជាតារាចម្រៀង និងជាសិល្បករជើងចាស់កំពុងមានជំងឺប្រចាំកាយ។
ដោយឡែកគេបានឃើញលោក ករុណា ពេជ្រ ផ្ដើមមានសកម្មភាពប្រមូលថវិកាពីសប្បុរជននានាមកជួយដល់លោកគ្រូ នូ ស៊ិប កាលពីថ្ងៃទី ២២ ខែធ្នូ នេះ បន្ទាប់ពីលោកបានឃើញបងប្អូនអ្នកលេងបណ្ដាញសង្គម TikTok ចេញមុខមកអំពាវនាវឱ្យមានការជួយដល់លោកគ្រូ នូ ស៊ិប តាមរយៈការបរិច្ចាគប្រាក់ ១ដុល្លារចេញពីទឹកចិត្តអ្នកគាំទ្រ ទៅកាន់គណនី ABA របស់លោកគ្រូផ្ទាល់។
ត្រឹមរយៈពេលតែមួយថ្ងៃប៉ុណ្ណោះ លោក ករុណា ពេជ្រ បានបញ្ជាក់ថា ប្រមូលបានប្រាក់សរុបទាំងអស់ ៩០០ ដុល្លារ ហើយលោកបានយកទៅប្រគល់ជូនលោកគ្រូដោយផ្ទាល់ដៃ។
គួររំលឹកដែរថា បច្ចុប្បន្នសិល្បករជើងចាស់រូបនេះមានជំងឺប្រចាំកាយ ទាំងជំងឺលើសឈាម និងដុំសាច់គីស ទើបហេតុផលមួយដែលធ្វើឱ្យលោកគ្រូពិបាកនឹងឡើងច្រៀងនៅតាមកម្មវិធីផ្សេងៗទៀត ទោះជាមានអ្នកផលិតកម្មវិធីជាច្រើនព្យាយាមចង់ជួយហៅលោកគ្រូឱ្យឡើងនៅតាមកម្មវិធីនានាក្ដី។ លោកគ្រូ នូ ស៊ិប សព្វថ្ងៃមិនមានកូននោះឡើយ លោកអាស្រ័យនៅផ្ទះរបស់កូនធម៌ ជាមួយនឹងភរិយានិងចៅម្នាក់។
