កីឡាករ Soukaphone Vongchiengkham សមាជិកក្នុងក្រុមជម្រើសជាតិឡាវ ដែលគេដាក់រហស្សនាមថាជា Messi ឡាវ នោះបាន សម្រេចចិត្តចុះកុងត្រាចូលរួមជាមួយក្លិប Udon Thani F.C សមាជិកពានរង្វាន់លីគកម្រិតទី២របស់ថៃ (Thai League 2) សម្រាប់រដូវកាលឆ្នាំ២០២១-២២ខាងមុខ។
បើតាមសេចក្តីប្រកាសរបស់ក្លិបដែលមានមូលដ្ឋាននៅខេត្ត Udon Thani មួយនេះនៅរសៀលថ្ងៃទី១៨ ខែមិថុនា ឆ្នាំ២០២១ បញ្ជាក់ថា កីឡាករកម្ពស់ ១.៥៨ម៉ែត្រខាងលើនឹងចូលក្នុងបញ្ជីកីឡាករកូតាអាស៊ាន ក្នុងក្រុមខ្លួន ជាមួយកីឡាករបរទេស៣រូបផ្សេងទៀតរួមមានកីឡាករប្រេស៊ីល Thales Lima កីឡាករក្រូអាត Aleksandar Kapisoda និងកីឡាករអាល្លឺម៉ង់ Arnold Suew។ ក្លិបក៏ទើបតែតែងតាំងលោក Fernando Sales គ្រូបង្វឹកជនជាតិប្រេស៊ីល ជាគ្រូបង្វឹកកាលពីពេលថ្មីៗផងដែរ។
អត្ថបទពាក់ព័ន្ធ៖Messi ឡាវ៖«ប្រទេសឡាវទាំងមូល នឹងគាំទ្រជម្រើសជាតិវៀតណាម ទៅប្រកួតWorld Cup»
រូបគេជាកីឡាករឡាវ ទី២ដែលបានចូលរួមលេងនៅលីគទី២ប្រទេសថៃ បន្ទាប់ពីកីឡាករ Phoutthasay Khochalern ដែលជាសមាជិកក្រុម Nakhon Pathom United។
កីឡាករ Soukaphone Vongchiengkham វ័យ២៩ឆ្នាំជាខ្សែបម្រើ ធ្លាប់លេងនៅក្លិប Ezra FC ក្នុងស្រុកកំណើត រហូតដល់ឆ្នាំ២០១២ ផ្ទេរទៅលេងក្លិប Krabi របស់ថៃ មុនបន្តទៅចូលរួមក្រុម Phitsanulokនៅឆ្នាំ២០១៤ ក្នុងជើងទី១ ហើយជើងទី២ ប្តូរទៅក្លិបSaraburi។
នៅឆ្នាំ២០១៥ រូបគេបានត្រឡប់ទៅស្រុកកំណើតដោយចូលរួមក្នុងក្រុម Lanexang United ហើយនៅឆ្នាំ២០១៦ ជើងទី១ ត្រឡប់ទៅចូលរួមក្រុម Ezra FC ហើយជើងទី២ ត្រឡប់ទៅក្រុម Lanexang United។ នៅឆ្នាំ២០១៧ ចេញទៅក្រុម Vientiane United មុនធ្វើដំណើរទៅថៃ ម្តងទៀតនៅឆ្នាំ២០១៨ ដោយចូលរួមក្លិប Sisaket ក្នុងលីគកំពូលថៃ រហូតដល់ឆ្នាំ២០១៩ ទៅចូលរួមក្រុម Chainat Hornbill។ នៅឆ្នាំ២០២០ ផ្ទេរទៅក្រុម PT Prachuap មុនត្រឡប់ទៅកាន់ក្រុម Uthai Thani កាលពីរដូវកាលមុន៕