យោងតាមសំណេររបស់តារាចម្រៀង Original និងជាអ្នកធ្វើការងារសង្គមដ៏លេចធ្លោរមួយរូបលោក អួន បឋម ហៅសាយ បានរៀបរាប់តាមរយៈបណ្ដាញសង្គមថា «លោកមិនអាចប្រារព្ធទិវាគុណឪពុក កុំថាឡើយសូម្បីតែឆៀងទៅគោរពវិញ្ញាណក្ខន្ធ» ក៏មិនអាចធ្វើបានព្រោះខេត្តលោក ជំងឺនេះកំពុងរីករាលដាលខ្លាំង។
សូមចុចអាន ព្រោះហេតុផលមួយតារាចម្រៀង សាយ សុខចិត្តដាក់ស្លាកលេខឡានខេត្តមិនខ្ចីដាក់លេខឡានភ្នំពេញ!
កាលពីរាត្រីទី២៣ ខែមិថុនា ឆ្នាំ២០២១ ម្សិលមិញនេះ លោក សាយ បានធ្វើការបង្ហោះរំលឹករូបភាពអនុស្សាវរីយ៍នៅមុខចេតិយលោកឪពុកជាទីគោរពរបស់ខ្លួនគំរប់ខួបមួយឆ្នាំនៃការបង្ហោះលើបណ្ដាញសង្គមបញ្ជាក់ពីទំហំទឹកចិត្តកូនប្រុសម្នាក់មានចំពោះលោកឪពុកទោះជាលោកបានចែកឋានរយៈពេល២០ឆ្នាំពេញ។
តារាចម្រៀងសំនៀងពីរោះ ដែលត្រូវកំព្រារងាព្រាត់ពីលោកឪពុកតាំងពីក្មេងរូបនេះបានផ្ដាំផ្ញើដែរថា បើសិនជាមនុស្សយើងគ្រប់គ្នាមានពេលវេលាហើយគួរតែជួបជុំក្រុមគ្រួសារ ប្រើពេលវេលាឱ្យមានតម្លៃ ផ្ដល់សេចក្ដីសុខឱ្យគ្នាទៅវិញទៅមក មុនពេលអ្វីៗកន្លងផុតទៅតាមកាលកំណត់របស់ធម្មជាតិ។
ឆ្នាំមុន សាយ នៅមានឱកាសបានឆ្លៀតទៅគោរពដួងវិញ្ញាណក្ខន្ធលោក និងបានបោសជូតសំអាតចេតិយ ក៏ដូចជាជួសជុលត្រង់ចំណុចទ្រុឌទ្រោម និងខូចខាតខ្លះៗ តែឆ្នាំនេះដោយសារតែនៅខេត្តរតនគិរី ដែលជាខេត្តកំណើតរបស់លោកមានការផ្ទុះរីករាលដាលជំងឺកូវីដ-១៩ ទើបធ្វើឱ្យលោកមិនអាចធ្វើដំណើរទៅគោរពដួងវិញ្ញាណក្ខន្ធលោកឪពុកបានដូចជារាល់ៗដង។
សូមរំលឹកឡើងវិញដែរថា លោក អួ៊ន បឋម (សាយ) ធ្លាប់បានបង្កើតព្រឹត្តិការណ៍រត់មួយដើម្បីរៃអង្គាសប្រាក់ជួយដល់មន្ទីរពេទ្យកុមារអង្គរ ដែលមានឈ្មោះថា «រត់ដើម្បីសប្បុរសធម៌ជាមួយសាយ» ដោយព្រឹត្តិការណ៍នោះប្រើរយៈពេលសរុប ៩៧ថ្ងៃ មានរយៈចម្ងាយផ្លូវសរុប ២៤០៨គីឡូម៉ែត្រ និងទទួលបានប្រាក់ឧបត្ថម្ភពីសប្បុរសជនសរុប ៤៧ម៉ឺនដុល្លារ៕
