សិល្បៈជាតិ៖ នៅសល់មិនដល់មួយខែពិធីបុណ្យចូលឆ្នាំថ្មីប្រពៃណីជាតិខ្មែរនឹងខិតចូលមកដល់ ដូច្នេះតារាចម្រៀងជាច្រើនដួងបានសំរុកចេញបទចម្រៀងដើម្បីអបអរ។ យ៉ាងណាមិញតារាចម្រៀងវ័យក្មេងពីរដួងដែលទើបតែចេញបទចម្រៀងចូលឆ្នាំរបស់ខ្លួនគឺ ម៉ម ពេជ្ជរិទ្ធ និង នីកូ អាចរកចំនួនទស្សនាលើសមួយលានដងយ៉ាងស្រួល។
បទចម្រៀង «រាំរង្វើល» របស់លោក នីកូ ដែលជាបទចម្រៀងមួយចំណាយដើមទុនផលិតអស់ ៣ម៉ឺនដុល្លារ ដោយបានរៀបចំផ្ទាំងទស្សនីយភាពប្លែកភ្នែក មានដូចជាការសម្ដែងរបាំប្រជាប្រិយខ្មែរជាច្រើនទម្រង់ដូចជា របាំកណ្ដូបសេះ របាំឆៃយ៉ាំ របាំនេសាទ និងរបាំក្ងោកប៉ៃលិន ជាដើម។ លោក នីកូ បានលើកឡើងបន្ថែមថា ការលាយបញ្ចូលរបាំបុរាណ និង ល្បែងប្រជាប្រិយខ្មែរចូលក្នុង MV តែមួយ ព្រោះចង់បង្ហាញពីទំនៀមទំលាប់ប្រពៃណីវប្បធម៌ខ្មែរ ដែលតាំងពីបុរាណកាល ប្រជាជនខ្មែរតែងតែរាំលេងកម្សាន្តសប្បាយនាពេលពិធីបុណ្យចូលឆ្នាំខ្មែរ។ បទចម្រៀងរបស់លោកគិតត្រឹមថ្ងៃទី២៧ មីនា ឆ្នាំ២០២៣ មានចំនួនទស្សនា ១.៣លានដងនៅលើ Youtube។
ចំណែកឯបទចម្រៀង «កន្ទ្រឹមខកស្នេហ៍» របស់ ម៉ម ពេជ្ចរិទ្ធ ដែលជាបទចម្រៀងមួយបានចេញផ្សាយឱ្យអ្នកទស្សនាបានឃើញនៅលើ Youtube កាលពីថ្ងៃ១៨ មីនា ឆ្នាំ២០២៣ គឺជាបទចម្រៀងចង្វាក់កន្ត្រឹមមួយដែលជាចង្វាក់រាំនិងច្រៀងពេញនិយមក្នុងឱកាសចូលឆ្នាំ ក៏ជាបទមានការគាំទ្រច្រើនពីសំណាក់អ្នកគាំទ្រមិនចាញ់បទចម្រៀងផ្សេងៗនោះឡើយ។ បទចម្រៀងដែលជាស្នាដៃនិពន្ធទំនុកភ្លេងដោយ ម៉ម ពេជ្ជរិទ្ធ និងសហនិពន្ធទំនុកច្រៀងដោយ ម៉ម ពេជ្ររិទ្ធ និងលោកគ្រូ កៅ សេដា ទទួលបានចំនួនទស្សនាគិតត្រឹមថ្ងៃទី២៧ ខែមីនា ឆ្នាំ២០២៣ ចំនួន១.៨លានដង។
ជាការពិតណាស់ជាទម្លាប់ទៅហើយ ឱ្យតែជិតដល់រដូវចូលឆ្នាំប្រពៃណីជាតិ គ្រប់ផលិតកម្មចម្រៀង និងតារាចម្រៀងឯករាជ្យ រមែងច្រៀងបទចម្រៀងដែលមានទំនុកភ្លេង និងអត្ថន័យ ពាក់ព័ន្ធ រដូវចូលឆ្នាំខ្មែរជាប់ជាប្រចាំដូច្នេះហើយមិនមែនតែតារាចម្រៀងពីរដួងខាងលើនោះឡើយដែលមានបទចម្រៀងសម្រាប់អបអរចូលឆ្នាំ គ្រាន់តែបទចម្រៀងរបស់តារាទាំងពីរមានសន្ទុះគាំទ្រខ្លាំងគួរឱ្យកត់សម្គាល់ទើបត្រយងយកដំណឹងនេះមកចែករំលែកដល់អ្នកអានបានជ្រាប៕