«ព្រឹត្តិការណ៍អង្គរសង្ក្រាន្ត ក្រៅតែពីការជួបគ្នារវាងមនុស្ស ជាមួយវប្បធម៌រូបិយ និងអរូបិយ ហើយនោះ ព្រឹត្តិការណ៍នេះ ធ្វើឱ្យមានជំនួបបេះដូងរវាងបុរស និងស្រីផងដែរ»។ នេះជាប្រសាសន៍របស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា អញ្ជើញបើកព្រឹត្តិការណ៍អង្គរសង្ក្រាន្តឆ្នាំ២០២៣ និងអបអរសាទរខួប១០ឆ្នាំ នៃការបើកព្រឹត្តិការណ៍អង្គរសង្ក្រាន្តនៅព្រឹក ថ្ងៃសុក្រ ទី១៤ ខែមេសា ឆ្នាំ២០២៣។
ពិធីបើកនេះដែរក្រោមវត្តមានដ៏ខ្ពង់ខ្ពស់របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលធ្វើឡើងនៅនៅបរិវេណប្រាសាទបាយ័ន ខេត្តសៀមរាប រួមទាំងមន្ត្រីអ្នកមុខអ្នកការជាច្រើនរូបទៀត។ ព្រឹត្តិការណ៍អង្គរសង្ក្រាន្តឆ្នាំ ២០២៣ ប្រព្រឹត្តទៅចាប់ពីថ្ងៃទី ១៤ ដល់ ១៦ ខែមេសា ក្រោមប្រធានបទ”ក្តីស្រមៃ និងក្តីសង្ឃឹម” នឹងផ្តល់ឱកាសដល់ប្រជាជនកម្ពុជាទាំងអស់ក៏ដូចជាមិត្តភ័ក្តិអន្តរជាតិទាំងអស់បានជួបជុំគ្នារីករាយ និងទទួលបានបទពិសោធន៍មិនអាចបំភ្លេចបានក្នុងឆ្នាំថ្មីប្រពៃណីជាតិខ្មែរនេះ។
អត្ថបទពាក់ព័ន្ធ៖អស្ចារ្យមែន ! អ្នកទៅកម្សាន្តអង្គរសង្ក្រាន្តសៀមរាប កុំភ្លេចភ្ជាប់Wi Fi ប្រើឥតគិតថ្លៃ
សម្តេចតេជោ ហ៊ុន សែន បានមានប្រសាសន៍ថា៖«នៅសល់តែប៉ុន្មានម៉ោងទៀតប៉ុណ្ណោះ នឹងមានការផ្លាស់ទេវតាឆ្នាំចាស់ ជំនួសដោយទេវតាឆ្នាំថ្មី ហើយទោះទេវតាចាស់ ឬថ្មី គឺសុទ្ធតែជាកូនទេវតាដូចគ្នា»។
ប្រមុខរាជរដ្ឋាភិបាល បានបន្តថាប្រជាពលរដ្ឋកម្ពុជា កំពុងតែសប្បាយរីករាយនឹងបុណ្យចូលឆ្នាំថ្មីប្រពៃណីជាតិ។ សម្តេចតេជោ អំពាវនាវដល់អាជ្ញាធរ កម្លាំងសមត្ថកិច្ច យកចិត្តទុកដាក់ថែរក្សាសន្តិសុខសណ្តាប់ធ្នាប់ជូនប្រជាពលរដ្ឋ។ សម្តេចតេជោ បានរំលឹកថា ឆ្នាំ២០២០ និង២០២១ មិនបើកឱ្យមានការចូលឆ្នាំនោះទេ ដោយសារការរាតត្បាតជំងឺកូវីដ១៩ ហើយសម្តេចក៏បានអំណរគុណប្រជាពលរដ្ឋចូលរួមជាមួយរាជរដ្ឋាភិបាល ទទួលយកការសម្រេចចិត្តនោះ ដើម្បីប្រយុទ្ធប្រឆាំងនឹងជំងឺកូវីដ១៩។
អត្ថបទពាក់ព័ន្ធ៖ភូមិស៊ីហ្គេមនិងអាស៊ានប៉ារ៉ាហ្គេម បើកទ្វាស្វាគមន៍ភ្ញៀវជាតិនិងអន្តរជាតិ ក្នុងព្រឹត្តិការណ៍អង្គរសង្រ្កាន្ត៣ថ្ងៃពេញ
ជាមួយគ្នានេះដែរសម្តេចតេជោ ហ៊ុន សែន បានមានបង្ហើបថាមានកត្តាចំនួន៦ ដែលនាំឱ្យមាននូវព្រឹត្តិការណ៍អង្គរសង្ក្រាន្ត ក្នុងនោះរួមមាន៖
ទី១) គឺសុខសន្តិភាព ស្ថេរភាពនយោបាយ ជាកត្តាសំខាន់នាំមកនូវភាពសប្បាយរីករាយ។ គ្មានភាពសប្បាយរីករាយណាមួយកើតឡើងក្រោមគ្រាប់ផ្លោងនោះឡើយ។ សុខសន្តិភាពផ្តល់ឱកាសឱ្យមនុស្សធ្វើអ្វីៗតាមបំណង ឱ្យតែត្រូវច្បាប់។
ទី២) យកឈ្នះលើជំងឺកូវីដ១៩
ទី៣) ការមានហេដ្ឋារចនាសម្ព័ន្ធតភ្ជាប់
ទី៤) កត្តាមានមធ្យោបាយធ្វើដំណើរ
ទី៥) កត្តាប្រាក់ចំណូលរបស់ប្រជាពលរដ្ឋ
ទី៦) គឺគំនិតផ្តួចផ្តើម និងការធ្វើសកម្មភាពបានយ៉ាងល្អរបស់សហភាពសហព័ន្ធយុវជនកម្ពុជា។
អត្ថបទពាក់ព័ន្ធ៖ក្រុមផ្សព្វផ្សាយស៊ីហ្គេមនិងអាស៊ានប៉ារ៉ាហ្គេម ផ្នែកចល័តក្នុងអង្គរសង្រ្កាន្ត ត្រៀមខ្លួនស្វាគមន៍មហាជន រួចរាល់ហើយ
សម្តេចតេជោ ហ៊ុន សែន បានថ្លែងកោតសរសើរ និងវាយតម្លៃខ្ពស់ចំពោះកិច្ចប្រឹងប្រែងរបស់សហភាពសហព័ន្ធយុវជនកម្ពុជា។ ការបំបែកឯកទគ្គកម្មនៃការបត់បេះដូង ដែលមានរហូតដល់ជិត ៤លាននោះ ជាការបង្ហាញឱ្យឃើញនូវការចូលរួមដ៏អស្ចារ្យ។ សម្តេចតេជោចង់ឱ្យអង្គការកំណត់ត្រាពិភពលោក ពិចារណាគិតជាភាគរយប្រជាពលរដ្ឋ ដើម្បីផ្តល់តម្លៃលើការបំបែកកំណត់ត្រាបត់បេះដូង សម្រាប់ប្រទេសចង់បំបែកកំណត់ត្រារបស់កម្ពុជា។ សម្តេចតេជោ រំពឹងថាយុវជនកម្ពុជា នឹងអាចបំបែកកំណត់ត្រារាំម៉ាឌីហ្សុន ប្រមាណ ៤ពាន់នាក់នៅថ្ងៃស្អែក។
ជាមួយការវិនិយោគយ៉ាងគំហុកនៅខេត្តសៀមរាប សម្តេចតេជោ ចាត់ទុកថាបានធ្វើឱ្យខេត្តនេះក្លាយតារារះនាទិសឧត្តរ។ សម្តេចបន្តថា ការរៀបចំប្រជាពលរដ្ឋចេញពីតំបន់រមណីយដ្ឋានអង្គរ គឺជាកិច្ចខិតខំប្រឹងប្រែង ដើម្បីរក្សារមណីយដ្ឋានអង្គរក្នុងបញ្ជីសម្បត្តិបេតិកភណ្ឌពិភពលោក។
សម្តេចតេជោក៏បានថ្លែងអំណរគុណដល់បណ្តាប្រទេសជាមិត្ត ដែលបានជួយគាំទ្រដល់ការការពារប្រាង្គប្រាសាទអង្គរ ក៏ដូចជាប្រាង្គប្រាសាទដទៃទៀត។សម្តេចតេជោក៏បានថ្លែងអំណរគុណទូតអាមេរិក ដែលបានជួយនាំមកវិញនូវសម្បត្តិវប្បធម៌ខ្មែរ ដែលត្រូវបានជួញដូរនាពេលកន្លងមក៕