កាតារ ជាក្រុមបាល់ទាត់ជម្រើសជាតិនៅក្រៅតំបន់តែមួយគត់ដែលត្រូវបានអញ្ជើញឱ្យចូលរួមប្រកួតក្នុងពានរង្វាន់បាល់ទាត់ជើងឯក 2021 CONCACAF Gold Cup ដែលនឹងចាប់ផ្ដើមនៅពាក់កណ្ដាលខែកក្កដា ឆ្នាំ២០២១ ខាងមុខ ខណៈក្រុមរបស់អាស៊ីមួយនេះបានប្រកួតឈ្នះក្រុមជម្រើសជាតិ អែលសាល់វាឌ័រ ១ទល់០ នៅយប់ថ្ងៃអាទិត្យ នេះ។
អត្ថបទពាក់ព័ន្ធ៖រកឃើញក្រុមខ្លាំងទាំង៧ឡើងទៅវគ្គចែកពូលពាន 2021 FIFA Arab Cup
ប្រកួតមិត្តភាពអន្តរជាតិនៅលើទីលានកីឡដ្ឋាន Stadion Aldo Drosina ក្នុងទីក្រុង Pula ប្រទេសក្រូអាត ក្រុមជម្រើសជាតិកាតារ បានរកគ្រាប់បាល់ជ័យជម្នះដោយថ្វីជើងកីឡាករ Almoez Ali នៅនាទី៦៩ (សូមទស្សនាក្នុងវីដេអូ) ខណៈកីឡាករ Abdulaziz Hatem ត្រូវលោកអាជ្ញាកណ្ដាល Ivan Bebek របស់ក្រូអាត ពិន័យកាតក្រហមតាំងពីនាទីទី២០។
ពានរង្វាន់ CONCACAF Gold Cup ជាការប្រកួតជើងឯកដែលមានក្រុមជម្រើសជាតិនៅទ្វីបអាមេរិកខាងជើង, អាមេរិកកណ្ដាល និងតំបន់ការ៉ាប៊ីន ហើយរៀបចំនៅរាល់២ឆ្នាំម្តង ខណៈក្រុមជម្រើសជាតិម៉ិចស៊ីកូ ជាអ្នកឈ្នះជើងឯកបានច្រើនជាងគេគឺរហូតដល់១១លើកឯណោះ។
អត្ថបទពាក់ព័ន្ធ៖Xavi Hernandez បន្តកិច្ចសន្យាដឹកនាំក្លិបនៅកាតារដល់ឆ្នាំ២០២៣
សម្រាប់ការប្រកួតពានរង្វាន់ CONCACAF Gold Cup ឆ្នាំនេះគ្រោងធ្វើឡើងនៅសហរដ្ឋអាមេរិក ចាប់ពីថ្ងៃទី១០ ខែកក្កដា ដល់ថ្ងៃទី១ ខែសីហា ឆ្នាំ២០២១ ដោយមានក្រុមចំនួន១៦ចូលរួមចែកជា៤ពូល ហើយក្រុមលេខ១និងលេខ២តាមពូលនីមួយៗមានឈ្មោះឡើងទៅលេងជុំបន្ទាប់ និងបន្តជម្រុះរហូតដល់វគ្គផ្ដាច់ព្រ័ត្រ៕
