កុមារី Alex Eala វ័យ១៦ឆ្នាំរបស់ហ្វីលីពីន និង Priska Madelyn Nugroho របស់ឥណ្ឌូណេស៊ី ដែលជាសមាជិកប្រទេសក្នុងតំបន់អាស៊ាន រកបានជ័យជម្នះរៀងៗខ្លួនជាលើកដំបូង ក្នុងព្រឹត្តិការណ៍វាយកូនបាល់អន្តរជាតិដែលធំជាងគេ១ក្នុងចំណោម៤លើពិភពលោក គឺ Wimbledon ក្នុងប្រទេសអង់គ្លេស វិញ្ញាសាវាយឯកត្តជនផ្នែកកុមារី។
អត្ថបទពាក់ព័ន្ធ៖ក្រោយឈ្នះពាននៅ French Open កុមារីតំបន់អាស៊ានរូបនេះតាំងចិត្តលេងនៅ Wimbledon ទៀត
កុមារី Alex Eala បច្ចុប្បន្នឈរចំណាត់ថ្នាក់លេខ២លើពិភពលោក បានយកឈ្នះកុមារី Solana Sierra របស់អាហ្សង់ទីន ដោយលទ្ធផល ៦-២ និង៦-៤ ក្នុងវគ្គ៦៤នាក់ចុងក្រោយ។ ក្រោយដណ្តើមបានជ័យជម្នះ កុមារី Alex Eala នឹងឡើងទៅជួបកុមារី A Mintegi del Olmo របស់អេស្ប៉ាញ ក្នុងវគ្គ៣២នាក់ចុងក្រោយ។
ចំណែក Priska Madelyn Nugroho វិញឈរចំណាត់ថ្នាក់លេខ១១ពិភពលោកបានប្រកួតឈ្នះកុមារី Lucie Havlíčková របស់សាធារណរដ្ឋឆែក ដោយលទ្ធផល ៦ទល់៣ និង៦ទល់៣ នៅវគ្គ៦៤នាក់ចុងក្រោយ ខណៈនាងត្រូវឡើងទៅជួបកុមារី Matilde Paoletti របស់អ៊ីតាលី ក្នុងវគ្គ៣២នាក់ចុងក្រោយជាបន្ត។
ក្មេងពិតមែនតែ Alex Eala និង Priska Madelyn Nugroho សម្រេចចិត្តចូលលេង២វិញ្ញាសានៅ Wimbledon ពោលគឺវិញ្ញាសាឯកត្តជននេះផង និងវិញ្ញាសាវាយគូផ្នែកកុមារី ផង។
វិញ្ញាសាវាយគូផ្នែកកុមារី អ្នកទាំង២ គឺAlex Eala និង Priska Madelyn Nugroho ចាប់ដៃគូប្រកួតជាលើកទី២ ខណៈបច្ចុប្បន្នមានចំណាត់ថ្នាក់លេខ៣ពិន្ទុលោកផ្នែកវាយគូកុមារី បន្ទាប់ពីឈ្នះជើងឯកពានរង្វាន់ Australian Open នៅអូស្ត្រាលីកាលពីឆ្នាំ២០២០ ជាមួយគ្នា។ អ្នកទាំង២ត្រូវជួបដៃគូ Erika Matsuda ជាជនជាតិជប៉ុន និង Valencia Xu ជនជាតិអាមេរិក ក្នុងវគ្គជម្រុះដំបូង។
អត្ថបទពាក់ព័ន្ធ៖បញ្ជីម្ចាស់ជើងឯកទាំង១៥វិញ្ញាសាក្នុងព្រឹត្តិការណ៍វាយកូនបាល់អន្តរជាតិ French Open
ព្រឹត្តិការណ៍វាយកូនបាល់ Wimbledon ជា Grand Slams ១ក្នុងចំណោម៤ លើលោក ដែលធំជាងគេ ក្នុងនោះមាន Australian Open (នៅអូស្ត្រាលី) French Open (បារាំង) និង US Open (នៅអាមេរិក)។ ការប្រកួតនៅឆ្នាំនេះរៀបចំពីថ្ងៃទី២៨ខែមិថុនា ដល់១១ ខែកក្កដា ឆ្នាំ២០២១ លើទីលានAll England Lawn Tennis and Croquet Clubក្នុងទីក្រុងឡុងដុង ដោយមាន១៥វិញ្ញាសា៕