នៅម៉ោង១២ថ្ងៃត្រង់ថ្ងៃព្រហស្បត្តិ៍ ទី៨ ខែកក្កដា នេះ ក្លិបសូលទីឡូអង្គរ (Soltilo Angkor FC) សមាជិកពានរង្វាន់ Metfone Cambodian League 2021 បានប្រកាសតែងតាំង អ៊ុក សុធី (អតីត Messi ភ្នំពេញក្រោន) ជាគ្រូបង្វឹកក្រុមខ្លួនសម្រាប់បេសកកម្មបន្តទាំងក្នុងរដូវកាលឆ្នាំ២០២១ នេះ។
ក្លិបបញ្ជាក់ថា៖«យើងមានសេចក្តីរីករាយសូមប្រកាសជាផ្លូវការ លោកគ្រូ អ៊ុក សុធី ត្រូវបានតែងតាំងជាគ្រូបង្វឹករបស់យើង»។
អត្ថបទពាក់ព័ន្ធ៖គ្រូចាស់ក្រុមសូលទីឡូងអង្គរ ជូនពរ Messi ភ្នំពេញក្រោន ឱ្យជោគជ័យក្រោយបន្តតំណែងពីលោក
ថ្មីៗនេះ Messi ស្ថិតក្នុងសមាសភាពគ្រូជំនួយ២រូប ដែលបានជួយការងារលោកគ្រូបង្វឹកក្រុមជម្រើសជាតិកម្ពុជា ថ្មីជនជាតិជប៉ុន លោក Ryu Hirose ទៅប្រកួតក្នុងវគ្គជម្រុះពានរង្វាន់បាល់ទាត់ពិភពលោក 2022 FIFA World Cup និងវគ្គជម្រុះពាន AFC Asian Cup 2023 ប្រចាំទ្វីបអាស៊ី កាលពីខែមិថុនា កន្លងទៅនៅប្រទេសបារ៉ែន។ គ្រានោះ Keisuke Honda ដែលជាអ្នកចាត់ការទូទៅក្រុមជម្រើសជាតិកម្ពុជា និងជាម្ចាស់ភាគហ៊ុនក្នុងក្លិបសូលទីឡូអង្គរ ក៏បានធ្វើការជាមួយ អ៊ុក សុធី ដែរមុនតែងតាំងនៅថ្ងៃនេះ។
នេះជាការងារគ្រូបង្វឹកផ្លូវការរបស់ លោក អ៊ុក សុធី ក្រោយសម្រេចចិត្តព្យូរស្បែកជើងពីអាជីពជាកីឡាករបាល់ទាត់ក្នុងវ័យ៣២ឆ្នាំ កាលពីឆ្នាំ២០១៩ បន្ទាប់ពីរួមរស់ជាមួយក្លិបភ្នំពេញក្រោន អស់៩រដូវកាល។ កាលនៅភ្នំពេញក្រោន គ្រប់គ្នាហៅ សុធី ថាជា Messi។
អត្ថបទពាក់ព័ន្ធ៖ជម្រុះ World Cup៖ Messi ភ្នំពេញក្រោន និង ភា សុភ័ត្រា ជាគ្រូជំនួយក្រុមជម្រើសជាតិ
បេសកកម្មថ្មីរបស់ Messi ជាមួយសូលទីឡូអង្គរ គឺត្រូវដឹកនាំក្រុមជួបម្ចាស់ផ្ទះព្រះខ័នរាជស្វាយរៀង នៅវេលាម៉ោង៦ល្ងាចថ្ងៃសៅរ៍ ទី១០ ខែកក្កដា ឆ្នាំ២០២១ ខាងមុខនេះ៕
