សិល្បៈអន្តរជាតិ៖ ជក់ដាច់បាយដាច់ទឹកហើយសម្រាប់អ្នកនិយមគាំទ្ររឿងភាគកូរ៉េ ក្រោយបានតាមដានរឿងភាគថ្មីបែបកំប្លែងលាយរ៉ូមែនទិកថ្មី «King The Land» ដែលបុរសសង្ហា Lee Jun Ho បានចាប់ដៃគូសម្ដែងជាមួយនឹងស្រីស្អាត Im Yoona ដោយសាច់រឿងនេះបរិយាយពីបុរសម្នាក់មើលងាយស្នាមញញឹមនិងនារីម្នាក់មានស្នាមញញឹមលើបបូរមាត់គ្រប់ពេលវេលា។
សូមអាន៖ រូបភាពអាពាហ៍ពិពាហ៍រវាង Yoona និង Lee Jong Suk ត្រូវបានទម្លា.យមកក្រៅ!
សូមអាន៖ Junho ប៉ះគ្នាវិញនឹងស្រីស្អាត YoonA ក្នុងរឿងភាគរ៉ូម៉ែនទិកសើចចុកពោះ «King the Land»
យោងតាមការផ្សាយពីកាសែត Yonhap របស់កូរ៉េ តារាចម្រៀងប៉ុប២ដួង ដែលបានវិវត្តន៍ខ្លួនមកជាតារាសម្ដែងគឺអតីតសមាជិកក្រុមចម្រៀង 2PM លោក Lee Jun Ho និង Girl Generation កញ្ញា Yoona បានចាប់ដៃគូគ្នាសម្ដែងជាលើកដំបូងនៅក្នុងរឿង «King The Land» ដោយតួអង្គដែល Jun Ho សម្ដែងគឺជាកូនទាយាទម្នាក់របស់សណ្ឋាគារដ៏ប្រណិតមួយរបស់កូរ៉េមានឈ្មោះថា Goo Won។
ជីវិតរបស់ Goo Won ត្រូវប្រឈមមុខនឹងសង្គ្រាមដណ្ដើមទ្រព្យសម្បត្តិ ខណៈដែលតួអង្គដែល Yoona សម្ដែងមានឈ្មោះថា Cheon Sa Rang គឺជាបុគ្គលិកក្នុងសណ្ឋាគារដែលតែងតែមានស្នាមញញឹមនៅលើមុខជានិច្ច រហូតដល់ថ្ងៃមួយដែលនាងបានជួបនឹង Goo Won គ្រប់យ៉ាងបានផ្លាស់ប្ដូរ។
នៅក្នុងកម្មវិធីសន្និសីទកាសែតរឿង «King The Land» Lee Jun Ho បានថ្លែងឱ្យដឹងថាការដែលលោកជ្រើសរើសសម្ដែងក្នុងរឿងនេះព្រោះតែលោកចង់សម្ដែងរឿងដែលមានទាំងសំណើចផង និងរ៉ូមែនទិកផង ខណៈដែលបញ្ហាប្រឈមដ៏ធំបំផុតសម្រាប់លោកក្នុងរឿងនេះគឺធ្វើយ៉ាងទប់សើចឱ្យជាប់។ «ខ្ញុំចាប់ផ្ដើមគិតដល់មូលហេតុដែល Goo Won ស្អប់ញញឹម ពេលដែលខ្ញុំកំពុងតែសម្ដែងតួអង្គមួយនេះ។ ខ្ញុំប្រាប់ខ្លួនជាប្រចាំហាមសើចពេលកំពុងថត ហើយវាពិតជាពិបាកណាស់សម្រាប់ខ្ញុំ។ ខ្ញុំហាត់ប្រាណខ្លាំងណាស់ដើម្បីឱ្យរាងកាយស្លៀកពាក់ឈុតអាវធំសមសួនស្អាត»។
ចំណែក Im Yoona អតីតសមាជិក SNSD បានលើកឡើងក្នុងពេលនោះដែរថាខ្លួនជ្រើសរើសសម្ដែងរឿងថ្មីនេះដោយសារតែជាប់ចិត្តនឹងចរិតគួរឱ្យស្រលាញ់របស់តួឯកស្រី។ «នេះគឺជាលើកទីមួយដែលខ្ញុំសម្ដែងរឿងបែបកំប្លែងលាយមនោសញ្ចេតនា។ ខ្ញុំចង់សម្ដែងតួអង្គដែលមានភាពស្រស់ស្រាយ និងធូរស្រាល ព្រោះកាលពីសម្ដែងរឿង «Big Mouth» តួអង្គដែលខ្ញុំសម្ដែងពិតជាតានតឹងណាស់។
រឿងភាគថ្មីរបស់ទូរទស្សន៍ JTBC នេះមានចាក់ផ្សាយរៀងរាល់ថ្ងៃ សៅរ៍និងអាទិត្យ នៅលើ App Netflix មានចំនួនសរុប ១៦ភាគ៕
ប្រភព៖ បរទេស