ក្រុមបាល់ទាត់ Al Ahly SC សមាជិកពានរង្វាន់លីគកំពូលនៃប្រទេសអេហ្ស៊ីប បានយកឈ្នះជើងឯកពានរង្វាន់ទ្វីបអាហ្វ្រិក CAF Champions League ជាលើកទី១០ និងក្រុមដែលឈ្នះពានរង្វាន់នេះច្រើនជាងគេ ក្រោយយកឈ្នះលើក្រុម Kaizer Chiefs របស់អាហ្រ្វិកខាងត្បូង នៅវគ្គផ្ដាច់ព្រ័ត្រ៣ទល់០ នាយប់ថ្ងៃសៅរ៍ សប្ដាហ៍នេះ។
អត្ថបទពាក់ព័ន្ធ៖ក្លិបជោគជ័យមួយនៅទ្វីបអាហ្រ្វិកបន្ថែមទូដាក់ពាន
ការប្រកួតនេះដែរធ្វើឡើងនៅទីលានកីឡដ្ឋាន Stade Mohammed V ក្នុងទីក្រុង Casablanca ប្រទេសម៉ារ៉ុក ក្រោមការកាត់សេចក្តីពីសំណាក់លោកអាជ្ញាកណ្ដាល Pacifique Ndabihawenimana ជនជាតិប៊ូរុនឌី។ កីឡាករ Mohamed Sherif,Mohamed Magdy Mohamed Morsy,Amr Mohamed Eid El Soleya ជាអ្នករកបានគ្រាប់បាល់ជ័យជម្នះឱ្យក្រុមរបស់ខ្លួនម្នាក់១គ្រាប់។
ទន្ទឹមនឹងគ្នានេះដែរកីឡាករ Mohamed Sherif បានឈ្នះស្បើកជើងមាសប្រចាំរដូវកាល២០២០-២១ នេះផងដែរ បន្ទាប់ពីរកបានគ្រាប់បាល់៦គ្រាប់ម្នាក់ឯងច្រើនជាងកីឡាករដទៃ។
អត្ថបទពាក់ព័ន្ធ៖សហព័ន្ធបាល់ទាត់ទ្វីបអាហ្វ្រិក គាំទ្រគំនិតប្រកួត World Cup ២ឆ្នាំម្តង ព្រោះចំណេញខ្លាំង
ពានរង្វាន់ 2020–21 CAF Champions League មានក្រុមចូលរួមសរុប៥៤ក្រុមមកពី៤២ប្រទេស ក្នុងសមាជិកសហព័ន្ធកីឡាបាល់ទាត់ទ្វីបអាហ្រ្វិក ដោយដំណើរការពីថ្ងៃទី២៨ ខែវិច្ឆិកា ឆ្នាំ២០២០ ដល់ថ្ងៃទី១៧ ខែកក្កដា ឆ្នាំ២០២១។ ក្នុងនាមជាម្ចាស់ជើងឯកក្រុម Al Ahly SC ទទួលបានទឹកប្រាក់លើកទឹកចិត្ត២.៥លានដុល្លារអាមេរិក ហើយក្រុមជើងឯករង Kaizer Chiefs ទទួលបានប្រាក់រង្វាន់ ១.២៥លានដុល្លារអាមេរិក។
ដូច្នេះក្រុម Al Ahly SC មានឈ្មោះតំណាងឱ្យទ្វីបអាហ្រ្វិក ទៅចូលរួមប្រកួតក្នុងពានរង្វាន់ 2021 FIFA Club World Cup ជាមួយក្រុមខ្លាំងៗមកពីតំណាងទ្វីបនានាជុំវិញពិភពលោក ដែលត្រូវរៀបចំនៅប្រទេសជប៉ុន ក្នុងខែធ្នូ ឆ្នាំ២០២១ ខាងមុខ។ កាលពីឆ្នាំ២០២០ កន្លងទៅក្រុម Al Ahly SC បានឈរចំណាត់ថ្នាក់លេខ៣ក្នុងពានរង្វាន់នេះក្រោយចាញ់ក្រុម Bayern Munich របស់អាល្លឺម៉ង់ មកពីអឺរ៉ុប ដោយលទ្ធផល ២ទល់០ តែយកឈ្នះក្រុមPalmeiras របស់ប្រេស៊ីល មកពីទ្វីបអាមេរិកខាងជើង ដោយបាល់ប៉េណាំងទីកាត់សេចក្តី ៣ទល់២ ក្រោយប្រកួតស្មើគ្នា០ទល់០៕
