សិល្បៈជាតិ៖ ថ្មីៗនេះពិធីករ សុខ រ៉ាស៊ី ចេញមកបង្ហាញមុខជនរងគ្រោះទី ៧ ដែលលោក អ៊ិន សុភិន បានជំពាក់លុយហើយគេចវេសមិនព្រមចូលខ្លួនដោះស្រាយ ដោយក្នុងនោះលោកបានបញ្ជាក់ថា ទឹកប្រាក់ចំនួន ១៥០០០ ដុល្លារដែលលោក អ៊ិន សុភិន ជំពាក់ជាយូរមកហើយនោះ ក៏នៅមិនទាន់បានទទួលបានដំណោះស្រាយអ្វីសូម្បីតែមួយរៀលលុយខ្មែរ បើទោះបីជាពឹងតុលាការក៏គ្មានពន្លឺយុត្តិធម៌ដែរ។
នៅថ្ងៃទី ១៧ ខែកក្កដា ឆ្នាំ ២០២៣ នេះ លោក សុខ រ៉ាស៊ី បានបង្ហាញមុខ VJ Dada ដែលលោកក៏ជាជនរងគ្រោះដោយសារលោក អ៊ិន សុភិន ជំពាក់លុយ និងបានបង្ហោះសារប្រាប់មហាជនជាសាធារណៈនៅលើបណ្ដាញសង្គមហ្វេសប៊ុកថា ៖ «ជនរងគ្រោះទី7 ហើយ ទាំងតារាសម្តែង ពិធីករ អ្នករៀបចំឆាក បុគ្គលិក គ្រូបង្វឹកបាល់ទាត់ លុយខ្ញុំ 15000$ គ្មានបានសូម្បីមួយរៀល លុយខ្មែរ ពឹងតុលាការ ប្រហែល 20ឆ្នាំទៀតបាន បានលុយមើលទៅ តើអ្នកណាអាចជួយបាន?»។
ងាកមក VJ Dada វិញ លោកបានចេញមុខបង្ហោះវីដេអូប្រាប់មហាជននៅថ្ងៃទី ១៦ ខែកក្កដា ឆ្នាំ ២០២៣ឱ្យដឹងថា លោក អ៊ិន សុភិន ដែលជាអគ្គនាយកក្រុមហ៊ុនមហាហង្ស បានជំពាក់លុយលោកចំនួនជាង ១០០០ ដុល្លារថ្លៃដែលលោកធ្វើជាពិធីករក្នុងកម្មវិធី Mister and Miss Supranational Cambodia 2023 តាំងពីអំឡុងខែមេសា រហូតដល់ខែ កក្កដា នេះ ដោយមិនព្រមចូលខ្លួនដោះស្រាយ ហើយព្យាយាមគេចវេស សូម្បីតែទាក់ទងតាមលេខទូរស័ព្ទក៏មិនព្រមលើក ឬ Chat , Comment នៅលើហ្វេសប៊ុកក៏មិនព្រមឆ្លើយតបវិញដែរ។ លោកបញ្ជាក់ទៀតថា មិនមែនមានតែលោកម្នាក់ទេជាជនរងគ្រោះ សូម្បីតែពិធីការិនី និងក្រុមជួលសម្ភារៈភ្លើងឧបករណ៍ Live រៀបចំកម្មវិធីនោះក៏នៅមិនទាន់បានទទួលលុយដោះស្រាយដូចគ្នា។
គួររំលឹកដែរថា កន្លងមកនេះ លោក អ៊ិន សុភិន គឺមានបញ្ហារឿងជំពាក់លុយកាក់ជាមួយនឹងបុគ្គលិក តួសម្ដែង កីឡាករ និងអ្នកសិល្បៈជាច្រើនរូបទៀត ដែលលោកហាក់មិនអើពើដោះស្រាយឱ្យពួកគេ រហូតអ្នកទាំងនោះអត់ទ្រាំលែងបានក៏ចេញមកទម្លាយបញ្ហានៅលើបណ្ដាញសង្គម ដើម្បីរកអន្តរាគមន៍ណាមួយ។
ចូលអាន៖ អស់ការអត់ទ្រាំ លោក សុខ រ៉ាស៊ី ប្រកាសប្ដឹងលោក អ៊ិន សុភិន ទៅតុលាការ!
សម្រាប់ករណីខាងលើនេះដែរ គេនៅមិនទាន់ឃើញមានការប្រតិកម្មតបវិញពីសំណាក់លោក អ៊ិន សុភិន ក្នុងព្រឹកថ្ងៃនេះនៅឡើយទេ។ ត្រយងនឹងផ្សាយដំណឹងបន្តទៀតបើមានការបកស្រាយណាមួយចេញពីលោក អ៊ិន សុភិន ឬភាគីពាក់ព័ន្ធផ្សេងៗទៀត៕
