មុននេះបន្តិចពោលគឺថ្ងៃទី២០ ខែកក្កដា ឆ្នាំ២០២១ នេះ លោក តាន់ គីមសួរ ឬដែលមហាជនប្រសិទ្ធិនាមថ្មីឱ្យថាអ្នកប្រយុទ្ធបៃតង បានចេញមកប្រកាសដំណឹងភ្ញាក់ផ្អើលថ្មីមួយទៀត ដោយលោកបានឱ្យដឹងថាពេលនេះលោកកំពុងតែប្រមូលផ្ដុំគ្រាប់ពូជផ្ការំដួលជិតគ្រប់១លានគ្រាប់ត្រៀមបាចទូទាំងផ្ទៃប្រទេសកម្ពុជាហើយ។
យោងតាមការបង្ហោះនៅលើផេកហ្វេសប៊ុករបស់ លោក តាន់ គីមសួរ បានបង្ហោះក្ដៅៗនេះបានឱ្យដឹងថា លោកសូមពញាក់អារម្មណ៍ពុកម៉ែបងប្អូនជនរួមជាតិទាំងអស់ លោកនិងក្រុមការងាររបស់លោកនៅពេលនេះបានប្រមូលគ្រាប់រំដួលជិតគ្រប់ ១លានគ្រាប់ហើយ ហើយនឹងធ្វើការលុញជាមួយដីជី រួចប្រើយន្តហោះតូចបាចសាចគ្រប់កន្លែងនៃប្រទេសកម្ពុជាយើង។
នៅក្នុងសំណេរនោះលោក តាន់ គីមសួរ ក៏បានធ្វើការរៀបរាប់ពីគុណប្រយោជន៍របស់ផ្កាតំណាងជាតិមួយនេះយ៉ាងក្បោះក្បាយដែរថា «ផ្ការំដួលគឺជាផ្កាដែលក្រអូប ដែលស្អាត ដែលតំណាងជាតិ ជាប្រភេទដើមឈើដែលងាយស្រួលដុះ ធន់នឹងកម្ដៅ ភ្លើងឆេះ ស្របនឹងអាកាសធាតុត្រជាក់បានល្អ»។
នេះមិនមែនជាលើកទីមួយឡើយដែល អ្នកប្រយុទ្ធបៃតងរូបនេះ និងក្រុមការងារបានរៀបចំកម្មវិធីបាចសាចគ្រាប់ពូជដើមឈើនៅលើទឹកដីនៃប្រទេសកម្ពុជា ព្រោះមុននេះ លោក និង ក្រុមការងារទើបតែបញ្ចប់យ៉ាងជោគជ័យនូវសកម្មភាពបាចសាចគ្រាប់ពូជដើមក្ងោកនៅទឹកដីនៃខេត្តកំពង់ស្ពឺ៕
សូមចុចអាន តាន់ គីមសួរ រំភើប យុទ្ធនាការព្យាបាលដំបៅផែនដីបានទទួលជោគជ័យ!