សិល្បៈជាតិ៖ បន្ទាប់ពីឈ្នះមកុដ Miss Grand Cambodia 2023 នៅរាត្រីថ្ងៃទី ១៩ សីហា កន្លងមកនេះ ម្ចាស់មកុដគឺកញ្ញា ភឹម ស្រីនោ នៅតែទទួលរងពាក្យសម្ដីរិះគន់ពីហ្វេនអ្នកគាំទ្រ និងអ្នកសិល្បៈមួយចំនួន ដោយពួកគេយល់ឃើញថា តំណែងម្ចាស់មកុដក្នុងឆ្នាំនេះ សមណាស់តែបានទៅលើកញ្ញា អ៊ិន លក្ខណា ដែលមានកំពស់ខ្ពស់ជាងម្ចាស់មកុដ ប៉ុន្តែផ្ទុយមកវិញនាងបែរជាទទួលបានតំណែងត្រឹមលំដាប់រងទី ២ ទៅវិញ។
បើទោះបីមានការមិនពេញចិត្តយ៉ាងក្ដី ក៏មានអ្នកជំនាញមួយចំនួនបានបង្ហាញពីគំនិតផ្ទុយស្រឡះពីអ្នករិះគន់ទៅវិញ ដោយពួកគេលើកអំណះអំណាងពីចំណុចស័ក្ដិសមរបស់បវរកញ្ញា ភឹម ស្រីនោ មកវិភាគ។
ក្នុងនោះ លោក Pey Pey Dy បានលើកឡើងថា ៖ «Nano best answer.មកុដអត់ចំឡែកទេ » ដែលការលើកឡើងរបស់លោកបែបនេះមានអ្នកគាំទ្រច្រើន ។ ហើយលោកក៏បានបកស្រាយបន្ថែមទៀតថា ៖ «ចំពោះខ្ញុំ ខ្ញុំរំពឹងប៉ៃលិន និងក្រចេះ តែក្រោយពីបានស្តាប់ចម្លើយក្នុងវគ្គ Top5 ខ្ញុំគិតថា Nano សមនឹងទទួលបាន។ ស្រលាញ់អ្នកណាក៏ដោយ តែត្រូវយកការពិតនិងសមត្ថភាពរបស់មនុស្សម្នាក់ៗ»។
ជាមួយគ្នានេះ កញ្ញា ណាសា ឌី បានបង្ហាញមតិថាគាំទ្រចំពោះកញ្ញា ភឹម ស្រីនោ ផងដែរ។ កញ្ញាបានលើកឡើងជាច្រើនចំណុចមកបង្ហាញប្រាប់មហាជនឱ្យបានដឹង។
ចំពោះលោក ប្រាក់ សំណាង ដែលជាគ្រូបង្រៀនជំនាញ Soft skill នៃស្ថាប័ន Miss Grand Cambodia 2023 ក៏បានលើកឡើងដែរថា បេក្ខភាពផ្លូវការទាំង ២៥ រូប ពួកគេសុទ្ធតែមានសមត្ថភាព និងចំណុចខ្លាំងរៀងៗខ្លួន។ ប៉ុន្តែ ភឹម ស្រីនោ មិនដែលចុះចាញ់វិញ្ញាសាណាមួយនោះឡើយ ទោះបីលទ្ធផលចេញមកល្អ ឬមិនល្អ។ ស្រីនោ ធ្វើបានល្អខ្លាំងមែនទែនក្នុងវគ្គ Close Door Interview ដោយនាងបានបង្ហាញគោលជំហរច្បាស់លាស់ និងបានបង្ហាញសមត្ថភាពនិយាយជាភាសាអង់គ្លេស-ថៃ ឱ្យគណៈកម្មការបានឃើញ ទោះបីការនិយាយនោះត្រូវ ឬខុសក៏ដោយ ក៏នាងក្លាហានបង្ហាញឱ្យគ្រប់គ្នាឃើញថា នាងពិតជាមានការប្តេជ្ញា និងការខិតខំប្រឹងប្រែងខ្ពស់ពិតមែន។ សូម្បី បេក្ខភាពភាគច្រើនក៏បានបង្ហាញការគាំទ្រលើ ស្រីនោ ដែរ។ មួយវិញទៀត ស្រីនោ មានការរៀបចំខ្លួនបានល្អស្អាត និងអាចបកស្រាយចម្រៀងបានពីរោះ ដែលចំនុចនេះគឺជាកត្តាដែលត្រូវនឹងអ្វីដែលស្ថាប័ន Miss Grand International ចង់បាន។
យ៉ាងណាមិញ លោកស្រី អឹម សុគន្ធា ដែលជាអគ្គនាយិការបស់ស្ថាប័នMiss Grand Cambodia 2023 ក៏បានមានប្រសាសន៍ថា ៖ «នាងខ្ញុំមិនខឹង មិនអន់ចិត្តទេសម្រាប់ បងប្អូនមួយចំនួនដែលគាត់គិតមកលើខ្ញុំយ៉ាងណា… តែនាងខ្ញុំបានប្រាប់ហើយកម្មវិធី ត្រូវតែសុក្រឹត ខ្វះតែបន្តិចក៏មិនបានដែរ ឱកាសមានតែ1នាទីទេ… ហើយបើចង់អោយidolរបស់អ្នកទទួលបានមកុដនៅឆ្នាំណាមួយត្រូវតែចេះលើកទឹកចិត្តគាត់ កុំបង្កបញ្ហា…ពីព្រោះកម្មវិធីនេះនាងខ្ញុំរៀបចំអស់ថវិកាច្រើនណាស់ យកបេះដូងនឹងក្ដីស្រលាញ់មកធ្វើជូនដល់ជាតិ…សូមប្រើសារcomment របស់អ្នក មកជាប្រយោជន៍ដល់បេក្ខនារីដែលអ្នកស្រលាញ់… នឹងផ្ដល់កម្លាំងចិត្តដល់ក្រុមការងារMiss Grand ទាំងអស់ពួកគាត់អត់បានគេងជាង10ថ្ងៃហើយ ..»។
លោកស្រី អ៊ឹម សុគន្ធា បានបន្តថា ៖ «បេក្ខនារីទាំងអស់ចូលប្រើពេលវេលាមួយនេះយកបទពិសោធន៍ហាត់រៀន ហើយរៀបចំខ្លួនអោយរួចរាល់ជាបវរកញ្ញាសំរាប់ឆ្នាំណាមួយ ស្វែងយល់ពីកម្មវិធីថា Grandត្រូវការអ្វី?? នោះអ្នកនឹងមានសំឡេងគាំទ្រកាន់តែខ្លាំងទូទាំងប្រទេស100%ដើម្បីត្រៀមខ្លួន ទៅយកមកុដឱ្យប្រទេសកម្ពុជានៅថ្ងៃណាមួយ…ទោះបីជាការជ្រើសរើសមួយនេះបងប្អូនមួយចំនួនមិនពេញចិត្ត តែនាងខ្ញុំគិតថាការជ្រើសរើសរបស់ខ្ញុំសក្ត័សមបំផុតដែលខ្ញុំជាអ្នកដឹកនាំនៃកម្មវិធី Miss Grand Cambodia 2023។ ខ្មែរស្រលាញ់ខ្មែរ ប្រទេសតូចតែបេះដូងធំ…សូមលើកទឹកចិត្តដល់គាត់ Phoem Sreyno ដែលបវរកញ្ញាតំណាងប្រទេសកម្ពុជាឆ្នាំ 2023 ទាំងអស់គ្នាក្នុងនាមជាខ្មែរដូចគ្នា»។
ដោយឡែកទៀតនោះ យោងពី Beauty Pageant Reviews ដែលមហាជនទទួលស្គាល់ថា ជាអ្នកដែលគាំទ្រ និងលម្អិតលើវិស័យបវរកញ្ញាក្នុងប្រទេសកម្ពុជា ក៏បានយល់ឃើញថា ៖ «ការខិតខំតស៊ូមិនដែលក្បត់នរណាម្នាក់ឡើយ ! ថ្ងៃនេះបងពិតជាមានមោទកភាពណាស់ចំពោះកូនស្រី មកុដនិងរត់មករកមនុស្សដែលស័ក្ដិសម អូនព្យាយាមច្រើនហើយ លើកនេះអូនក៏ស៊ូច្រើនមកដែរ នៅពីក្រោយភាពជោគជ័យមួយនេះ ហ្វេនគេមិនបានដឹងទេថាយើងខំប៉ុណ្ណា តែបងជឿថាថ្ងៃណាមួយគេនិងយល់ អរគុណសម្រាប់ពាក្យជូនពរមកកាន់នាង»។
សូមជម្រាបថា ក្រៅពីអ្នកជំនាញដែលមើលឃើញពីសមត្ថភាពពិតរបស់កញ្ញា ភឹម ស្រីនោ ហើយនោះ កញ្ញា ពេជ្រ វត្តីសារ៉ាវឌ្ឍី បានសន្យាជាមួយហ្វេនអ្នកគាំទ្រថា មុនចេញបេសកកម្មទៅប្រកួតនៅប្រទេសវៀតណាម ស្រីនោ នឹងត្រូវហ្វឹកហាត់ជាមួយ វត្តី ចំនួន១ខែពេញ ហើយវត្តី នឹងស្វែងរកភាពជាស្រីនោ ពិតឱ្យកាន់តែច្បាស់ ដើម្បីទទួលបានវិជ្ជាគុនបន្ថែមឱ្យកាន់តែច្បាស់ និងមានឱកាសឈ្នះមកុដកម្រិតអន្តរជាតិ។ គ្រប់គ្នានឹងរង់ចាំអ៊ុតមើលថា ភឹម ស្រីនោ ដែលតំណាងឱ្យប្រទេសកម្ពុជា នឹងធ្វើបានកម្រិតណា នៅលើឆាកអន្តរជាតិ នៅប្រទេសវៀតណាម?